رۆژی 25ی ئادار ئەنتۆلی ماریێنتس سەفیری ئۆكڕانیا لە عێراق و ئەڤێریانۆڤ ئۆلێگ بەڕێوبەری كۆمپانیای (limited liability company) و دەشتی شێوەزور بەڕێوبەری هەمان كۆمپانیا لە رۆژهەڵاتی ناوەڕاست سەردانی ژووریان كردو لە لایەن دارا جەلیل خەیات سەرۆكی ژوور و ژمارەیەك لە ئەندامانی ئەنجومەنی كارگێڕی ژوور پێشوازیان لێكرا.
لە دیدارێكدا سەفیری ئۆكڕاینا خۆشحاڵی خۆی بەم سەردانە دەربڕی و وتیشی كاتێك كە دێم بۆ هەولێر هەست بە غەریبی ناكەم و وا هەست دەكەم دێمە ماڵی خۆم و من هەردەم هەوڵم داوە زیاتر پەرە بە پەیوەندیەكانمان بدەین، وە داوەتەكیشی پێشكەشی ژوور كرد بۆ بەشداری كردن لە كۆڕبەندێكی ئابووری كە لە 4 ی حوزەیران لە كییڤ پایتەختی ئۆكڕاینا سازدەكرێ.
پاشان ئەڤێریانۆڤ ئۆلێگ بەڕێوبەری كۆمپانیای (limited liability company) ئامانجی كۆمپانیاكەیانی روون كردەوە كە ئەوان كۆمپانیایەكی تایبەتن بە دروست كردنی ئۆتۆمبێلی بارهەڵگر و بەرگری شارستانی و ئەمبوڵانس و ئۆفیسیشمان لە شاری هەولێر كردۆتەوە چونكە ئێمە هەرێمی كوردستان بە ئایندەیەكی گەش دەبینین و هیوا خوازیشین بەشداری لە پێشانگاكانی هەولێر بكەین و بەشداربین لە خزمەت كردن.
لە لایەن خۆشیەوە سەرۆكی ژوور زۆر سوپاسی كردن بۆ ئەو هەوڵ و ماندوبوونە بە تایبەتی سەفیری ئۆكڕاینا، ئامادەیی خۆی و ژووریشی نیشاندا بۆ هەموو هاوكارییەك و پاڵپشتیەك، روونیشی كردەوە كە سەركەوتنی ئابووری هەر ووڵاتێك بە دروستكردنی پەیوەندی باش لەگەڵ ووڵاتان دێتە دی.