رێککه‌وتی 6/11/2012، به‌ڕێز دارا جه‌لیل خه‌یات سه‌رۆکی ژووری بازرگانی و پیشه‌سازی هه‌ولێر له‌باره‌گه‌ی ژوور، پێشوازی له‌به‌ڕێز نه‌واف کلیچ سه‌رۆکی کۆمه‌ڵه‌ی خاوه‌نکار و پیشه‌وه‌رانی تورکی عێراقی TISIAD له‌تورکیا و شاندێکی کۆمه‌ڵه‌ی ناوبراو کرد، که‌ له‌ژماره‌یه‌ک ئه‌ندامی ئه‌و‌ کۆمه‌ڵه‌یه‌ پێکهاتبوون. له‌سه‌ره‌تای دیداره‌که‌دا، که به‌‌ئاماده‌بوونی به‌ڕێزان سۆران ئه‌بوبه‌کر جێگری سه‌رۆکی ژوور و ژماره‌یه‌ک له‌ئه‌ندامانی ده‌سته‌ی کارگێڕی ژوور به‌ڕێوه‌چوو، به‌ڕێز دارا جه‌لیل خه‌یات سه‌رۆکی ژوور له‌وته‌یه‌کیدا به‌ناوی ئه‌ندامانی ده‌سته‌ی کارگێڕی ژوور‌ به‌خێرهێنانی شاندی میوان کرد و ئاماژه‌ی به‌وه‌دا که‌ به‌به‌رده‌وامی شانده‌ بازرگیانییه‌کان له‌پارێزگا‌کانی تورکیاوه سه‌ردانی ژوور ده‌که‌ن، که‌ ئه‌مه‌ش جێی دڵخۆشی هه‌ردوولایه‌، چونکه‌ نزیکبوونی هه‌ردوولا له‌یه‌کتری ئه‌نجامی ئه‌رێنی لێده‌که‌وه‌ێته‌وه‌. وتیشی:"‌کوردستان رۆژ له‌دوای رۆژ پێشده‌که‌وێت و به‌‌ره‌و ئاینده‌یه‌کی باشتر هه‌نگاو ده‌نێت، ئه‌مه‌ش وایکردووه‌ که‌ ژماره‌یه‌کی زۆری کۆمپانیای بیانی روو له‌م هه‌رێمه‌ بکه‌ن. لای خۆیه‌وه‌، به‌ڕێز نه‌واف کلیچ که‌سه‌رۆکایه‌تی شانده‌که‌ی ده‌کرد، خۆشحاڵی خۆی ده‌ربڕی به‌بۆنه‌ی سه‌ردانیکردنی ژوور و پێشوازیلێکردنیان له‌لایه‌ن به‌رپرسانی ژووره‌وه‌، هه‌روه‌ها باسی له‌کاروباره‌کانی کۆمه‌ڵه‌که‌ی کرد که‌باره‌گه‌ی سه‌ره‌کی له‌شاری (مێرسین)ـه، هه‌روه‌ها ‌ ئامانجی سه‌ردانه‌که‌ی خسته روو که‌ ئه‌ویش ده‌ستپێکردنی په‌یوه‌ندی دۆستایه‌تییه‌ له‌گه‌ڵ ژوور و کردنه‌وه‌ی لقێکی کۆمه‌ڵه‌که‌یانه‌ له‌هه‌ولێری پایته‌ختدا. له‌کۆتایی دیداره‌که‌شدا، به‌ڕێز دارا جه‌لیل خه‌یات سه‌رۆکی ژوور ئاماده‌یی ژووری به‌مه‌به‌ستی هاریکاری ئه‌ندامانی شاندی میوان خسته‌روو.   

بڵاوكراوه‌ته‌وه‌ له‌ هه‌واڵ
سێ شەممە, 20 تشرینی دووەم 2012 23:06

شاندێکی بازرگانی سویسرا سه‌ردانی ژووری کرد

رێککه‌وتی 6/11/2012، به‌ڕێز دارا جه‌لیل خه‌یات سه‌رۆکی ژووری بازرگانی و پیشه‌سازی هه‌ولێر له‌باره‌گه‌ی‌ ژوور، پێشوازی له‌شاندێکی سویسرا کرد، که‌ له‌ژماره‌یه‌ک سیاسه‌ته‌مه‌دار و دپلۆماتکار و خاوه‌نکار و پسپۆری ئابووری پێکهاتبوون. له‌سه‌ره‌تای دیداره‌که‌دا، به‌ڕێز دارا جه‌لیل خه‌یات سه‌رۆکی ژوور به‌گه‌رمی به‌خێرهێنانی شاندی میوان کرد و هیوای مانه‌وه‌یه‌کی باشی بۆ خواستن له‌هه‌ولێری پایته‌ختدا، پاشان تیشکی خسته‌ سه‌ر ره‌وشی به‌نکداری له‌عێراق به‌گشتی و کوردستان به‌تایبه‌تی له‌و قۆناغانه‌ی که‌ له‌ماوه‌ی چه‌ند ده‌یه‌ی رابردوودا پێیدا تێپه‌ڕی کردووه‌. هه‌روه‌ها به‌ڕێز خه‌یات وتی:"پاش ساڵانێکی زۆر عێراق به‌رووی دونیای ده‌ره‌وه‌دا کراوه‌ته‌وه‌، ئێستاش ره‌وشی کوردستان له‌هه‌موو بارێکه‌وه‌ سه‌قامگیره‌‌، به‌شێوه‌یه‌ک بۆته‌ ‌ده‌ر‌وازه‌یه‌ک و زۆربه‌ی هاووڵاتییانی گه‌شتیاری عێراقی له‌هه‌ولێره‌وه ده‌چنه‌ ده‌ره‌وه‌ی وڵات و، به‌پێچه‌وانه‌‌شه‌وه‌ خه‌ڵکانی بیانی دێنه‌ کوردستان و به‌و په‌ڕی ئارامییه‌وه‌ ژیان ده‌گوزه‌رێنن." هه‌روه‌ها تیشکی خسته‌سه‌ر کاروباره‌کانی به‌نکه‌ ناوخۆیی و بیانییه‌کان له‌عێراقدا و وتی:"له‌ماوه‌ی چه‌ند ساڵی داهاتوودا به‌نکه‌ ناوخۆییه‌کان به‌پێی سیسته‌مێکی نوێی به‌نکی ناوه‌ندی، ده‌بێت ئاستی سه‌رمایه‌کانیان زۆر به‌رز بکه‌نه‌وه، هاوکات به‌نکه‌ بیانییه‌کانیش له‌گه‌ڵ ئه‌و ره‌وته‌ نوێیه‌ی کارکردندا پڕۆ‌ژه‌کانی خۆیان راده‌په‌ڕێنن، هیواشی خواست که‌ وڵاتانی ئه‌وروپا به‌تایبه‌تی سویسرا به‌نک یان لقه‌ به‌نکی خۆیان له‌کوردستاندا بکه‌نه‌وه‌، چو‌نکه ده‌بنه‌ یارمه‌تده‌رێک بۆ ئه‌و کۆمپانیا ئه‌وروپییانه‌ی که‌له‌هه‌رێمدا کار ده‌که‌ن." هه‌روه‌ها به‌ڕێز خه‌یات به‌رزکردنه‌وه‌ی ئاستی په‌یوه‌ندییه‌ دوو قۆڵییه‌کانی نێوان کوردستان و سویسرای به‌گرنگ زانی و وتی:"خوازیارین سویسرییه‌کان له‌کوردستان ده‌ستبه‌کارکردن بکه‌ن و له‌و باره‌شه‌وه‌ هیچ کۆسپێک له‌به‌رده‌میاندا نییه‌، هه‌روه‌ها پێمان وایه‌ که‌ کردنه‌وه‌ی هێڵی ئاسمانی راسته‌وخۆ له‌نێوان کوردستان و سویسرا له‌گه‌ڵ کردنه‌وه‌ی سه‌نته‌رێكی بازرگانی سویسرایی له‌هه‌ولێردا کاره‌ بازرگانییه‌کانی نێوان هه‌ردوولا زیاتر پێش ده‌خات." لای خۆیه‌وه‌، به‌ڕێز پاوڵ ئه‌ندرێ رۆوخ که‌ سیاسه‌ته‌مه‌دار و خاوه‌نکارێکی به‌ناوبانگه‌ له‌سه‌ر ئاستی ئه‌وروپادا و سه‌رۆکی کۆمه‌ڵه‌ی دۆستایه‌تی (ڤالیاس - سویسرا کوردستان) و خاوه‌نی یه‌كێک له‌کۆنترین به‌نکه‌کانی جیهانه‌، وێڕای سوپاسگوزاری و پێزانینی خۆی و ئه‌ندامانی شاندی یاوه‌ری له‌به‌رامبه‌ر پێشوازیلێکردنیاندا، وتی:"به‌راستی پێشکه‌وتنی کوردستان بۆ ئێمه‌ شتێكی سه‌رنجراکێشه و رێزێکی زۆرمان بۆ ئه‌م هه‌رێمه‌ هه‌یه‌، بۆیه‌ ئێستا گرنگه‌ بۆ سویسرییه‌کان که‌بوونیان له‌م هه‌رێمه‌دا هه‌بێت و، ئێمه‌ خوازیارین که‌ په‌یوه‌ندی دۆستایه‌تی رۆشنبیری و کۆمه‌ڵایه‌تی و بازرگانی و ئابووری توندوتۆڵ له‌کوردستاندا دروست بکه‌ین و، ئامانجی سه‌ره‌کیمان زانینی پێدوایستییه‌کانی هه‌رێمه‌ له‌نزیکه‌وه تاکو له‌ئاینده‌دا خزمه‌ت بکه‌ین، چونکه‌ ئێره‌ باشترین شوێنه‌ بۆ کارکردن." راشیگه‌یاند و وتی:"ئێمه‌ بڕیارمان داوه‌ که‌ گروپێکی بازرگانی له‌کوردستاندا د‌روست بکه‌ین، لێره‌‌شه‌وه داوه‌تێکی فه‌رمی ئاڕاسته‌ی ژووره‌که‌تان ده‌که‌ین تاکو له‌ئاینده‌دا شاندێک رێکبخه‌ن و سه‌ردانی وڵاته‌که‌مان بکه‌ن." له‌کۆتایی دیداره‌که‌شدا، به‌ڕێز خه‌یات ئاماده‌یی ژووری به‌مه‌به‌ستی هاریکاری و کارئاسانی بۆ هه‌ر شاندێکی سویسرایی ده‌ربڕی که‌ سه‌ردانی کوردستان بکات، هاوکات دیاری رێزلێنانی ژووری به‌خشییه‌ ئه‌ندامانی شاندی میوان.   

بڵاوكراوه‌ته‌وه‌ له‌ هه‌واڵ

رێککه‌وتی 5/11/2012 به‌سه‌رپه‌رشتی به‌ڕێزان دارا جه‌لیل خه‌یات سه‌رۆکی ژووری بازرگانی و پیشه‌سازی هه‌ولێر و جاپ ڤاندراگه‌ر سه‌رۆکی ئه‌نجومه‌نی هۆڵه‌ندی بۆ په‌ره‌پێدانی بازرگانی NCH ، دیدارێکی بازرگانی له‌نێوان ژماره‌یه‌ک له‌خاوه‌نکاران و نوێنه‌رانی کۆمپانیا لۆکاڵی و هۆڵه‌ندییه‌کان له‌هۆڵی کۆبوونه‌و‌ه‌کانی باره‌گه‌ی ژوور، سازکرا. چاوپێکه‌وتنه‌که‌ش به‌ئاماده‌بوونی به‌ڕێزان سۆران ئه‌بوبه‌کر جێگری سه‌رۆک و ئه‌بوبه‌کر له‌شکری سه‌رۆکی یانه‌ی بازرگانی کوردی- هۆڵه‌ندیKDBC و ژماره‌یه‌ک له‌ئه‌ندامانی ده‌سته‌ی کارگێڕی ژوور و هه‌ردوو ده‌زگه‌ی (NCH ، KDBC ) به‌ڕێوه‌چوو. له‌سه‌ره‌تای چاوپێکه‌وتنه‌که‌دا، به‌ڕێز دارا جه‌لیل خه‌یات سه‌رۆکی ژوور وێڕای به‌خێرهێنانی شاندی میوان وتی:"هیوادارین ئه‌م سه‌ردانه‌تا‌ن ببێته‌ ده‌ستپێکی قۆناغێکی گه‌شه‌سه‌ندووی په‌یوه‌ندییه دوو قۆڵییه‌کانی نێوانمان." روونیکرده‌وه‌ و وتی:"به‌ستنی په‌یوه‌ندیمان له‌گه‌ڵ ده‌زگه‌ هاوچه‌شنه‌کانمان له‌هۆڵه‌ندا بۆ هه‌رێمی کوردستان زۆر گرنگه‌، چونکه‌ هۆڵه‌ندا ئه‌زموون و زانیاری و ته‌که‌نۆلۆجیای باشی له‌بواری کشتوکاڵدا هه‌یه‌ و ئێره‌ش خوازیاری پێشخستنی که‌رتی کشتوکاڵه‌ به‌بوونی زه‌وی به‌پیت و ئاووهه‌وای له‌بار، جگه‌ له‌وه‌ش هۆڵه‌ندا له‌بواری نه‌وت و گازدا پێشکه‌تووه‌ و ئه‌مه‌ش ده‌کرێت بۆ کوردستان ببێته‌ یارمه‌تده‌ر چونکه‌ ئێمه له‌وڵاتێکی نه‌وتیداین." له‌لایه‌کی دیکه‌وه‌ به‌ڕێز خه‌یات ئاماژه‌ی به‌سه‌ردانێکی شاندێكی بازرگانی ژووره‌کانی کوردستان بۆ هۆڵه‌ندا کرد، که‌ له‌مانگی ئه‌یلوولی ئه‌مساڵدا بۆ به‌مه‌به‌ستی چه‌ند چالاکییه‌کی په‌یوه‌ندیدار به‌بواری بازرگانی ئه‌نجامدرا. لای خۆیه‌وه‌، به‌ڕێز جاپ ڤاندراگه‌ر که‌سه‌رۆکایه‌تی شانده‌که‌ی ده‌کرد، وێڕای ده‌ربڕینی سوپاسگوزاری خۆی و ئه‌ندامانی شانده‌که‌ی له‌به‌رامبه‌ر پێشوازی لێکردنیاندا، وتی:"ئێمه‌ ده‌توانین له‌سێکته‌ره‌کانی کشتوکاڵ و پیشه‌سازی‌دا یارمه‌رتده‌ر بین بۆ کوردستان." ئاماژه‌ی به‌گرنگی ئاودا و وتی:"له‌ماوه‌ی چه‌ند ساڵی داهاتوودا کێشه‌ی که‌مبوونه‌وه‌ی ئاو له‌جیهاندا سه‌رهه‌ڵده‌دات، کۆمپانیاکانی هۆڵه‌نداش شاره‌زایی باشیان له‌بواری چاره‌سه‌رکردنی ئاو (ریسایکلین)دا هه‌یه‌، بۆیه‌ ده‌کرێت کۆمپانیاکانمان له‌و بواره‌دا خزمه‌تگوزاری خۆیان پێشکه‌ش به‌کوردستان بکه‌ن. " وتیشی:"من توانیم حکومه‌تی هۆڵه‌ندا دڵنیا بکه‌مه‌وه‌ له‌وه‌ی که‌ کوردستان وه‌ک پارچه‌کانی دیکه‌ی عێراق نییه‌، به‌ڵکو جیاواز‌ و پێشکه‌وتووه‌، له‌کاتی گه‌ڕانه‌وه‌شمان به‌هۆڵه‌ندییه‌کان راده‌گه‌یه‌نین که‌ کوردستان زۆر له‌هۆڵه‌ندا سه‌لامتتره‌ بۆ ژیان و کاری بازرگانی." له‌درێژه‌ی دانیشتنه‌که‌دا، لایه‌نی هۆڵه‌ندی داوه‌تنامه‌یه‌کی فه‌رمییان ئاڕاسته‌ی ئه‌ندامانی ده‌سته‌ی کارگێڕی ژوور و خاوه‌نکارانی کوردستان کرد به‌مه‌به‌ستی سه‌ردانیکردنی هۆڵه‌ندا له‌سه‌ره‌تای ساڵی داهاتوودا. دواترنوێنه‌رانی کۆمپانیا لۆکاڵییه‌کان له‌گه‌ڵ نوێنه‌رانی کۆمپانیا هۆڵه‌ندییه‌کان وێڕای ناساندنی خۆیان و سروشتی کاری کۆماپانیاکانیان به‌یه‌کتری، بیرورایان ئاڵوگۆڕکرد. جێی ئاماژه‌یه‌، ئه‌و کۆمپانیا هۆڵه‌ندییانه‌ی که‌ به‌شدارییان له‌چاوپێکه‌تنه‌که‌دا کرد، تایبه‌تمه‌ندوون به‌‌بواره‌کانی راوێژکاری یاسایی و ژمێریاری و ئاو، په‌یوه‌ندییه بازرگانی‌ و پیشه‌سازییه‌کان، کشتوکاڵ و ‌ئاژه‌ڵداری و کێڵگه‌ی په‌له‌وه‌ڕ و به‌ربوومه‌کانی شیر، ریسایکلینی خۆراک و ئاو، بیناسازی و د‌روستکردنی خانو و خێوه‌تی ئاماده‌کراو، گواستنه‌وه‌، شاره‌زان. له‌کۆتایی دیداره‌که‌شدا، دیاری رێزلێنانی له‌نێوان سه‌رۆکی ژوور و سه‌رۆکی شاندی میوان گۆڕدرایه‌وه‌.   

بڵاوكراوه‌ته‌وه‌ له‌ هه‌واڵ

رێککه‌وتی 4/11/2012، به‌ئاماده‌بوونی سه‌رۆک و جێگری سه‌رۆکی ژووری بازرگانی و پیشه‌سازی هه‌ولێر و پارێزگاری براشۆڤ‌ی رۆمانیا، دیدارێكی بازرگانی له‌نێوان ژماره‌یه‌ک له‌بازرگان و نوێنه‌رانی کۆمپانیاکانی هه‌ردوو پارێزگه‌ی هه‌ولێر و براشۆڤ‌ له‌باره‌گه‌ی ژوور به‌ڕێوه‌چوو. له‌سه‌ره‌تای دیداره‌که‌دا، به‌ڕێز دارا جه‌لیل خه‌یات سه‌رۆکی ژوور وێڕای به‌خێرهێنانی شاندی میوان، باسی له‌مێژووی په‌یوه‌ندییه‌کانی نێوان هه‌ردوو گه‌لی کوردستان و رۆمانیا کرد و سوپاسگوزاری و ده‌ستخۆشی ژووری بازرگانی ئاڕاسته‌ی حکومه‌تی بوخارست کرد به‌بۆنه‌ی کردنه‌وه‌ی کونسوڵخانه‌ی وڵاته‌که‌یان له‌هه‌ولێری پایته‌خت و وتی:"بوونی کونسوڵخانه‌ی رۆمانیا له‌کوردستان، زه‌مینه‌یه‌کی باش ده‌ڕه‌خسێنێت بۆ ئه‌نجامدانی کاری بازرگانی و وه‌به‌رهێنان له‌نێوان هه‌ردوولادا، هه‌ڵبه‌ت ئێمه‌ له‌کوردستاندا له‌زۆر بواری جیاواز ده‌کرێت سوود له‌شاره‌زاییه‌کانی وڵاتی رۆمانیا وه‌ر‌بگرین." لای خۆیه‌وه‌ به‌ڕێز ئه‌ریستۆتل کانسێسکو پارێزگاری براشۆڤ له‌وته‌یه‌کیدا سوپاسگوزاری خۆی و ئه‌ندامانی شاندی یاوه‌ری ئاڕاسته‌ی ژووری بازرگانی کرد به‌بۆنه‌ی سازدانی ئه‌م دیداره و ئاماژه‌ی به‌وه‌دا که‌له‌پاش کردنه‌وه‌ی کونسوڵخانه‌ی رۆمانیا له‌هه‌ولێر و واژۆکردنی رێککه‌وتننامه‌ی دۆستایه‌تی نێوان هه‌ردوو پارێزگه‌ی هه‌ولێر و براشۆڤ، دیداره‌کان چڕتر ده‌کرێنه‌وه‌ و خاوه‌نکارانی براشۆڤیش به‌و په‌ڕی ئاماده‌ییه‌وه‌ له‌کوردستاندا کاری بازرگانی ئه‌نجام ده‌ده‌ن. وتیشی:"پاش به‌ئه‌ندامبوونمان له‌یه‌کێتی ئه‌وروپا، وڵاته‌که‌مان زۆر پێشکه‌وت، لێره‌ش هه‌وڵێکی زۆر بۆ پێشخستنی کوردستان هه‌یه‌، بۆیه‌ ده‌کرێت ئه‌و شاره‌زاییه زۆره‌ی ده‌ستمان که‌وتووه‌، بۆ کوردستانی بگوازینه‌وه‌، ئه‌ویش به‌لێکنزیکردنه‌وه‌ی بازرگانانی هه‌ردوولا له‌یه‌کتری. راشیگه‌یاند و وتی:"پاش ئه‌وه‌ی هه‌ولێر و براشۆڤ بوونه‌ ده‌سته‌خوشکی یه‌کتری، لێره‌وه‌ داوه‌تێکی فه‌رمی ئاڕاسته‌ی ژووری بازرگانی و خاوه‌نکارانی کوردستان ده‌که‌م به‌مه‌به‌ستی سه‌ردانیکردنی پارێزگه‌ی براشۆڤ." له‌لایه‌کی دیکه‌وه‌، به‌ڕێز خه‌یات ئاماده‌یی ژووری ده‌ربڕی به‌مه‌به‌ستی سه‌رخستنی ئه‌م ئه‌رکه‌ی که‌ به‌ڕێز پارێزگاری براشۆڤ خستوویه‌ته‌ ئه‌ستۆی خۆی، هاوکات ئاماژه‌ی به‌وه‌دا که‌ ئه‌گه‌ر له‌داهاتوویه‌کی نزیکدا ڤیزا له‌کونسوڵخانه‌ی‌ رۆمانیا بدرێت به‌هاووڵاتیانی کوردستان و هێڵی ئاسمانی (هه‌‌ولێر- بوخارست)یش بکرێته‌وه‌، هه‌ڵبه‌ت رۆڵێکی کاریگه‌ر ده‌بینن له‌چڕکردنه‌وه‌ی په‌یوه‌ندییه‌ دوو قۆڵییه‌کاندا. له‌به‌شیکی دیکه‌ی دیداره‌که‌دا، به‌رێز سۆران ئه‌بوبه‌کر جێگری سه‌رۆکی ژوور له‌وته‌یه‌کیدا ئاماژه‌ی به‌گرنگی کارئاسانیکردن بۆ خاوه‌نکارانی هه‌ردوولادا له‌لایه‌ن ده‌زگه‌ په‌یوه‌ندا‌ره‌کانی کوردستان و رۆمانیا، ئه‌ویش به‌مه‌به‌ستی سه‌ردانیکردنی ئه‌و پێشه‌نگه‌یانه‌ی که‌ ناوه‌ناوه‌ له‌هه‌ولێر و براشۆڤ سازده‌کرێن. وتیشی:"ده‌ستپێکردنی کار و پڕۆژه‌ی کۆمپانیا رۆمانییه‌کان له‌کوردستان به‌کردنه‌وه‌ی لق یان کۆمپانیای سه‌ربه‌خۆی تایبه‌ت به‌خۆیان ده‌ست پێده‌کات، هاوشێوه‌ی کۆمپانیاکانی دیکه‌ی بیانی که‌ئێستا ژماره‌یان له‌کوردستاندا گه‌یشتۆته‌ نزیکه‌ی 2 هه‌زار کۆمپانیا." روونیکرده‌وه‌ و وتی:"زۆربه‌ی کار وپڕۆژه‌کانی داهاتوو له‌کوردستاندا ده‌خرێنه‌ بواری کشتوکاڵه‌وه، چونکه‌ ئێستا حکومه‌ت بڕیاری داوه‌ و پلانی بۆ داڕشتووه‌ که‌ سێکته‌ری کشتوکاڵی له‌هه‌رێمدا پێشبخات، له‌م باره‌وه‌شه‌وه‌ کوردستان پێویستی ته‌واوی به‌توانا و ته‌که‌نۆلۆجیا و شاره‌زایی رۆمانییه‌کانه‌." جێی ئاماژه‌یه‌، له‌دیداره‌که‌دا به‌ڕێزان میهای پاسکۆ جێگری پارێزگاری براشۆڤ و ژماره‌یه‌ک له‌ئه‌ندامانی ده‌سته‌ی کارگێڕی ژوور و رۆبه‌رت رۆسلیسکۆ راوێژکاری ئابووری له‌باڵیۆزخانه‌ی رۆمانیا له‌به‌غدا و چه‌ند میدیایه‌کی ناوخۆیی ئا‌ما‌ده‌بوون. ئه‌و کۆمپانیا رۆمانییانه‌ی که‌ له‌رێی نوێنه‌ره‌کانیانه‌وه‌ سه‌ردانی باره‌گه‌ی ژووریان کرد، له‌بواره‌کانی بیناسازی و که‌لوپه‌ل و پێداویستییه‌کانی باڵه‌خانه‌، کشتوکاڵ و کێڵگه‌ و به‌رهه‌مهێنانی په‌له‌وه‌ڕ، ئاودێڕی، دامه‌زراندنی سیسته‌می دابه‌شکردنی په‌خشی که‌ناڵه‌ ته‌له‌فزیۆنییه‌کان بۆ باڵه‌خانه‌ و ماڵان و چه‌ند بوارێکی دیکه‌دا شاره‌زابوون. له‌کۆتایی دیداره‌که‌شدا، دیاری رێزلێنان له‌نێوان هه‌ردوولادا گۆڕدرایه‌وه‌.   

بڵاوكراوه‌ته‌وه‌ له‌ هه‌واڵ

رێککه‌وتی 4/11/2012، به‌ئاماده‌بوونی سه‌رۆکی ژووری بازرگانی و پیشه‌سازی هه‌ولێر و نوێنه‌ری وه‌زاره‌تی بازرگانی و پیشه‌سازی هه‌رێمی کوردستان، دیدارێكی بازرگانی له‌نێوان ژماره‌یه‌ک له‌بازرگان و نوێنه‌رانی کۆمپانیاکانی هه‌ردوو پارێزگه‌ی هه‌ولێر و ئازه‌ربایجانی رۆژئاوا (ورمێ)ی ئێراندا له‌باره‌گه‌ی ژوور، به‌ڕێوه‌چوو. له‌سه‌ره‌تای دیداره‌که‌دا، به‌ڕێز دارا جه‌لیل خه‌یات سه‌رۆکی ژوور به‌ناوی ئه‌ندامانی ده‌سته‌ی کارگێڕی ژووره‌وه‌ به‌خێرهێنانی شاندی میو‌انی کرد و وتی:"ئێستا په‌یوه‌ندییه ئابوورییه‌کانی نێوان هه‌رێمی کوردستان و کۆماری ئیسلامی ئێران له‌ئاستێكی باشدایه‌، یه‌ك له‌هۆکاره‌کانیش بۆ ئه‌نجامدانی دیداری له‌م شێوه‌یه‌ی نێوان هه‌ردوولامان ده‌گه‌ڕێته‌وه." هه‌روه‌ها به‌ڕێز خه‌یات ئاماژه‌ی به‌وه‌دا که‌ له‌ئاینده‌یه‌کی نزیکدا کۆنفڕانسێكی ئابووری فراوان له‌نێوان هه‌رێمی کوردستان و ئێران له‌هه‌ولێر ساز ده‌کرێت، که‌ خودی به‌ڕێز سه‌رۆکی حکومه‌ت به‌گرنگییه‌وه‌ لێی ده‌ڕوانێت و بۆ ئه‌و مه‌به‌سته‌ش لیژنه‌یه‌کی تایبه‌تی به‌سه‌‌رۆکایه‌تی وه‌زیری ئاوه‌دانکردنه‌وه پێکهێناوه‌. هیواشی خواست که‌ بتوانرێت له‌ئاینده‌یه‌کی نزیکدا ناوچه‌یه‌کی پیشه‌سازی بۆ مه‌به‌ستی دامه‌زراندنی کارخانه‌ی ئێرانی د‌روست بکرێت، که‌ ئه‌مه‌ش ده‌بێته‌ هۆی به‌رزبوونه‌وه‌ی ئاستی ئابووری کوردستان و کۆماری ئیسلامی ئێران، ئه‌مه‌ش یه‌کێکه له‌به‌نده‌کانی نێو ئه‌و یاداشته‌ی که‌ پێشتر له‌نێوان هه‌ردوو ژووری بازرگانی هه‌ولێر و ورمێدا واژۆکراوه‌. لای خۆیه‌وه‌ به‌ڕێز ئه‌میر شاسوار سه‌رۆکی شاره‌ پیشه‌سازییه‌کانی ورمێ که‌هاوکات سه‌رۆکایه‌تی شاندی میوانی ده‌کرد، له‌وته‌یه‌کیدا وێڕای ده‌ربڕینی خۆشحاڵی خۆیان به‌سه‌ردانیکردنی هه‌ولێری پایته‌خت و ژووری بازرگانی، ئاماژه‌ی به‌ره‌وشی پیشه‌سازی ورمێ دا و وتی:"ئێستا ئێمه‌ خاوه‌نی 19 ناوچه‌ی پیشه‌سازین، بۆیه‌ له‌و رووه‌وه‌ ئاماده‌ین هاوکاری هه‌رێمی کوردستان بکه‌ین، چ بۆ دروستکردنی ناوچه‌ی پیشه‌سازی یان راهێنانی پیشه‌وه‌ران بێت، هه‌ڵبه‌ت ئه‌مه‌ش له‌رێی په‌ره‌پێدانی په‌یوه‌ندییه‌ ئابوورییه‌کانمانه‌وه ده‌بێت." پاشان به‌ڕێز فیدائه‌دین محه‌مه‌د ئه‌مین گه‌ردی ئه‌ندامی ده‌سه‌ته‌ی کارگێڕی ژوور له‌وته‌یه‌کیدا ئاماژه‌ی به‌گرنگی یاسای وه‌به‌رهێنان دا له‌کوردستان و وتی:"هیچ رێگریییه‌ک له‌به‌رده‌م کاری بازرگانی و وه‌به‌رهێنانی ئێرانییه‌کان نییه‌ له‌کوردستاندا، هه‌روه‌ها ئاماده‌یی ژووری له‌پێناو هاریکاریکردنی شاندی میوان خسته‌روو." دواتر، به‌ڕێز عه‌زیز عه‌دۆ به‌ڕێوه‌‌به‌ری گشتی وه‌زاره‌تی بازرگانی و پیشه‌سازی له‌وته‌‌یه‌کیدا ئاماژه‌ی به‌وه‌دا که‌له‌ماوه‌ی چه‌ند ساڵی رابردوودا په‌یوه‌ندییه دوو قۆڵییه‌کانی نێوان هه‌ردوولا ئاڕاسته‌یه‌کی زۆر باشتری به‌خۆوه‌ گرتووه‌، ئه‌ویش به‌کردنه‌وه‌ی خاڵی سنووری نێوده‌وڵه‌تی له‌نێوان هه‌رێمی کوردستان و کۆماری ئیسلامی ئێران، دووپاتیشیکرده‌وه‌ که‌ پێویسته‌ لایه‌نه‌ حکومییه‌کانی هه‌ردوولا زیاتر کارئاسانی بۆ بازرگانانی هه‌ردوولا بکه‌ن تاکو گرفته‌کانی بواری بازرگانی نه‌مێنن. وتیشی:"له‌ئێراندا ئه‌زموونی باش هه‌یه‌ له‌بواره‌کانی بازرگانی و پیشه‌سازی، بۆیه‌ خوازیارین ئه‌و ئه‌زموونانه‌ بۆ کوردستان بگوازرێته‌وه‌، چونکه‌ ئێساتا کوردستان له‌حاڵی گه‌شه‌سه‌ندندایه‌ و هه‌لی کار و بڕیار و یاسای با‌ش له‌به‌رده‌ستدان. پاشان ئه‌ندامانی شاندی میوان و بازرگانانی هه‌ولێر خۆیان و پێگه‌ی کارکردن و سروشتی کاری کارگه‌ و کۆمپانیاکانیان به‌یه‌کتری ناساند، هه‌روه‌ها کۆمه‌ڵێک پرسیاریان ئاڕاسته‌ی یه‌کتر و به‌رپرسانی هه‌ردوولا کرد، که‌ سه‌رجه‌میان له‌چۆنێتی ده‌ستبه‌کاربوون به‌‌کاری بازرگانی و پیشه‌سازی ده‌بینییه‌وه‌، هاوکات له‌لایه‌ن ئه‌ندامانی ده‌سته‌ی کارگێڕی ژوور به‌وردی و وه‌ڵامی پێویستیان درایه‌وه. جێی ئاماژه‌یه‌، له‌دیداره‌که‌دا به‌ڕێزان ئیبراهیم محه‌مه‌د سۆفی جێگری سه‌رۆک و ژماره‌یه‌ک له‌ئه‌ندامانی ده‌سته‌ی کاڕگێری ژوور و نه‌جات سه‌نگی ئه‌ندامی ده‌سته‌ی کارگێڕی ژووری بازرگانی و پیشه‌سازی ورمێ ئاماده‌بوون. ئه‌و کۆمپانیا ئێر‌انییانه‌ی که‌ له‌رێی نوێنه‌ره‌کانیانه‌وه‌ سه‌ردانی باره‌گه‌ی ژووریان کرد، له‌بواره‌کانی بیناسازی و که‌لوپه‌ل و پێداویستییه‌کانی باڵه‌خانه‌، کشتوکاڵ و به‌رهه‌ههێنانی خوارده‌مه‌نی و ئالیکی ئاژه‌ڵ و په‌له‌وه‌ڕ، به‌سته‌به‌ندی به‌رهه‌مه‌ کشتوکاڵییه‌کان، به‌رهه‌مهێنانی که‌لوپه‌لی وه‌رزشی و پزیشکی، به‌رهه‌مه‌کانی نه‌وت و گاز، دروستکردنی ناوچه‌ی پیشه‌سازی، دروستکردنی ئامێری کارگه‌کان شاره‌زابوون. له‌کۆتایی دیداره‌که‌شدا، دیاری رێزلێنان له‌نێوان هه‌ردوولادا گۆڕدرایه‌وه‌.   

بڵاوكراوه‌ته‌وه‌ له‌ هه‌واڵ
سێ شەممە, 20 تشرینی دووەم 2012 23:04

کونسوڵی فه‌ڕه‌نسا سه‌ردانی ژوور ده‌کات

رێککه‌وتی 24/10/2012، به‌ڕێز دارا جه‌لیل خه‌یات سه‌رۆکی ژووری بازرگانی و پیشه‌سازی هه‌ولێر له‌باره‌گه‌ی ژوور، پێشوازی له‌به‌ڕێز ئالان گێبخات کونسوڵی گشتی فه‌ڕه‌نسا له‌هه‌ولێر و شاندی یاوه‌ری کرد. له‌سه‌ره‌تای دیداره‌که‌دا، که‌ تیایدا به‌ڕێز سۆران ئه‌بوبه‌کر جێگری سه‌رۆکی ژوور ئاماده‌یبوو، به‌ڕێز دارا جه‌لیل خه‌یات سه‌رۆکی ژوور به‌گه‌رمی به‌خێرهێنانی کونسوڵی کرد و هیوای سه‌رکه‌وتنی بۆ خواست له‌کاره‌کانیدا، هه‌روه‌ها خۆشحاڵی خۆیشی ده‌ربڕی به‌وه‌ی ماوه‌یه‌که‌ به‌ڕێز گێبخات وه‌ک کونسوڵی نوێ ده‌ست به‌کاره‌کانی کردووه. هه‌روه‌ها به‌ڕێز خه‌یات ئاماژه‌ی به‌په‌یوه‌ندی دۆستانه‌ی له‌مێژینه‌ی نێوان هه‌ردوو گه‌لی کوردستان و فه‌ڕه‌نسا دا به‌تایبه‌تی له‌پاش کردنه‌وه‌ی کونسوڵخانه‌ی حکومه‌تی پاریس له‌هه‌ولێری پایته‌ختدا. لای خۆیه‌وه‌، به‌ڕێز ئالان گێبخات وێڕای ده‌ربڕینی سوپاسگوزاری خۆی له‌به‌رامبه‌ر پێشوازی لێکردنیدا، باسی له‌کاروباره‌کانی ئێستای کونسوڵخانه‌ کرد، هه‌روه‌ها تیشکی خسته‌ سه‌ر دامه‌زراندنی په‌یمانگه‌ی رۆشنبیری فه‌ڕه‌نسی له‌هه‌ولێر به‌وه‌ی ده‌زگه‌یه‌کی گرنگه له‌سه‌ر ئاستی رۆژهه‌ڵاتی ناوه‌ڕاست و له‌(دیمه‌شق و به‌یروت)یش نووسینگه‌یان هه‌یه‌ و کار له‌پێناو به‌رزکردنه‌وه‌ی ئاستی هونه‌رمه‌ندان و پێشخستنی ره‌وتی رۆشنبیری و هونه‌ری ده‌که‌ن له‌ناوچه‌که‌دا، بڕیاریشه‌ ئه‌و ناوه‌نده‌ له‌گه‌ڵ هاتنی شاندێکی بازرگانی فه‌ڕه‌نسادا بۆ هه‌ولێر له‌سه‌ره‌تای مانگی تشرینی دووه‌می ئامساڵدا بکرێته‌وه‌. به‌ڕێز گێبخات روونیکرده‌وه و وتی:"ئه‌و شانده‌ بازرگانییه‌ به‌شداری کۆنفڕانسێكی بازرگانی ده‌کات که‌ بڕیاره‌ له‌هه‌ولێر ببه‌سترێت، هاوکات ژماره‌یه‌ک دیدار له‌گه‌ڵ چه‌ند ده‌زگه‌یه‌کی گرنگی ئابووری له‌کوردستاندا ئه‌نجام ده‌ده‌ن." له‌میانه‌ی تاوتوێکردنی به‌رنامه‌که‌ی کونسوڵخانه‌دا، به‌ڕێز خه‌یات ئاماده‌یی ژووری به‌مه‌به‌ستی پشتگیریکردن له‌هه‌رهه‌نگاوێکی گرنگی ئابووری فه‌ڕه‌نسا له‌کوردستان خسته‌ روو و وتی:"پێشتر چه‌ندین جار شاندی بازرگانی له‌کوردستان سه‌ردانی وڵاتی فه‌ڕه‌نسایان کردووه و ئه‌نجامی ئه‌رێنیان لێکه‌وتۆته‌وه‌، هه‌ڵبه‌ت هاتنی شانده‌ فه‌ڕه‌نسییه‌کانیش به‌‌هه‌مان شێوه‌ سوودی ‌ئابوورییان بۆ هه‌ردوولا ده‌بێت."   

بڵاوكراوه‌ته‌وه‌ له‌ هه‌واڵ

رێککه‌وتی 23/10/2012، به‌ڕێز دارا جه‌لیل خه‌یات سه‌رۆکی ژووری بازرگانی و پیشه‌سازی هه‌ولێر له‌باره‌گه‌ی ژوور، پێشوازی له‌شاندێكی به‌نکی نێوده‌وڵه‌تی کرد، که‌ له‌‌به‌ڕێزان زیاد به‌در سه‌رۆکی نێردراوی به‌نک‌ له‌عێراق و خاتوو سیلڤیا زولو و خاتوو تاتینا بۆگاتیره‌ڤا به‌ڕێوه‌به‌رانی ناوچه‌یی له‌کێشوه‌رانی ئه‌وروپا و ئه‌فریقیا له‌به‌نکی ناوبراو کرد. له‌سه‌ره‌تای دیداره‌که‌دا، به‌ڕێز دارا جه‌لیل خه‌یات سه‌رۆکی ژوور وێڕای به‌گه‌رمی به‌خێرهێنانی شاندی میوان، ئاماژه‌ی به‌وه‌دا که‌ له‌هه‌رێمی کوردستاندا چاوه‌ڕێی ئه‌نجامدانی پڕۆژه‌ی گرنگن له‌لایه‌ن به‌نکی نێوده‌وڵه‌تییه‌وه، چونکه‌ له‌ئێستادا کوردستان به‌هۆی سه‌قامگیری باری ئاسایش تیایدا سێکته‌ره‌کانی ژیان بووژا‌وه‌ته‌وه به‌تایبه‌تی له‌بواری گه‌شتوگوزاردا که‌ دروستکردنی هوتێل و خواردنگه‌ و ناوچه‌ی گه‌شتیاری زیاتر پێویسته، هه‌روه‌ها بواره‌کانی کشتوکاڵ و پیشه‌سازیش چۆنه‌ته‌ نێو به‌رنامه‌ی ستراتیژی و درێژخایه‌نی حکومه‌ته‌وه‌، که‌ وه‌به‌رهێنانێکی زیاتریان پێویسته‌، له‌هه‌موو ئه‌مانه‌شدا ده‌کرێت به‌نکی نێوده‌وڵه‌تی رۆڵی چالاک و گرنگی خۆی له‌کوردستاندا بگێرێت. لای خۆیه‌وه‌، ‌ به‌ڕێز زیاد به‌در، وێڕای ده‌ربڕینی سوپاسگوزاری له‌به‌رامبه‌ر پێشوزای لێکردنیاندا، ئامانجی سه‌ردانه‌که‌ی خسته‌ روو که‌ ئه‌ویش بریتی‌یه‌ له‌ئاماده‌باشی به‌نکه‌که‌یان به‌مه‌به‌ستی به‌شداریکردن له‌پڕۆژه‌ گرنگه‌کانی وه‌به‌رهێنان له‌گه‌ڵ کۆمپانیا گه‌وره‌ لۆکاڵییه‌کانی هه‌رێمدا، هاوکات ئاماژه‌ی به‌و پڕۆژه‌ گرنگانه‌ کرد که‌ له‌عێراق و کوردستاندا له‌ماوه‌ی ساڵانی رابردوودا له‌گه‌ڵ وه‌به‌رهێنه‌رانی دیکه‌دا ئه‌نجامیان داوه. به‌رێز به‌در وتیشی:"به‌نکه‌که‌ی ئێمه‌ له‌ژێر سایه‌ی رێکخراوی نه‌ته‌وه‌ یه‌کگرتووه‌کان به‌قه‌با‌ره‌یه‌کی گه‌و‌ره‌ی داراییه‌وه‌ پشکداری پڕۆژه‌کان ده‌کات له‌رێی 100 نووسینگه‌ی (IFC) له‌سه‌رانسه‌ری جیهاندا. لای خۆیا‌نه‌وه هه‌ردوو خاتوو سیلڤیا زولو و تاتینا بۆگاتیره‌ڤا وێڕای ئاڕاسته‌کردنی چه‌ند پرسیارێکی گرنگ بۆ به‌ڕێز سه‌رۆکی ژوور که‌هاوکات وه‌ڵامی پێویستیان درایه‌وه‌، به‌تێروته‌سه‌لی باسیان له‌دیدی به‌نکه‌کیان کرد له‌باره‌ی هه‌ندێ سێکته‌ری وه‌ک کشتوکاڵ و پیشه‌سازی و خزمه‌تگوزاری، راهێنانی کادیر و کارمه‌ندانی به‌توانا و شاره‌زا به‌مه‌به‌ستی به‌دامه‌زراوه‌کردنی ده‌زگه‌ ئابوورییه‌کان له‌هه‌ردوو که‌رتی گشتی و تایبه‌تیدا. ‌‌ لای خۆیه‌وه‌، به‌ڕێز خه‌یات وێڕای پشتگیریکردن له‌ئامانجه‌کانی به‌نکی نێوده‌وڵه‌تی له‌عێراق و کوردستان، تیشکی خسته‌ سه‌ر ره‌وشی وه‌به‌رهێنان له‌کوردستاندا، هه‌روه‌ها به‌رنامه‌ی حکومه‌تیشی له‌بواری پێشخستنی که‌رته‌کانی کشتوکاڵ و گه‌شتوگوزار و پیشه‌سازی بۆ ساڵانی ئاینده‌ خسته‌ به‌رباس. له‌کۆتایی دیداره‌که‌شدا، به‌ڕێز سه‌رۆکی ژوور وێڕای ئاماده‌یی ژوور به‌مه‌به‌ستی هارکاریکردنی کاره‌کانی به‌نکی نێوده‌وڵه‌تی له‌کوردستاندا، دیاری رێزلێنانی به‌خشییه‌ ئه‌ندامانی شاندی میوان.   

بڵاوكراوه‌ته‌وه‌ له‌ هه‌واڵ

رێککه‌وتی 22/10/2012، به‌ڕێز دارا جه‌لیل خه‌یات سه‌رۆکی ژووری بازرگانی و پیشه‌سازی هه‌ولێر له‌باره‌گه‌ی ژوور، پێشوازی له‌به‌ڕێز لیچ ستێفانیاک باڵیۆزی نوێی پۆڵه‌ندا له‌عێراق کرد، که‌ به‌بۆنه‌ی ده‌ستبه‌کاربوونی له‌ئه‌رکه‌ تازه‌که‌یدا سه‌ردانی ژووری کرد. له‌سه‌ره‌تای دیداره‌که‌دا، که‌تێدا به‌ڕێزان سۆران ئه‌بوبه‌کر جێگری سه‌رۆکی ژوور و ژماره‌یه‌ک له‌ئه‌ندامانی ده‌سته‌ی کارگێڕی ژوور ئاماده‌ی بوون، به‌ڕێز دارا جه‌لیل خه‌یات سه‌رۆکی ژوور به‌گه‌رمی به‌خێرهێنانی باڵیۆزی نوێی کرد و پیرۆزبایی لێکرد به‌بۆنه‌ی ده‌ستبه‌کاربوونی وه‌ک باڵیۆزی نوێی وڵاته‌که‌ی له‌عێراق و ئاماژه‌ی به‌وه‌دا که‌ هه‌ماهه‌نگی به‌رده‌وام و له‌نزیکه‌وه‌ ئاگاداربوونی هه‌ردوولا له‌یه‌کتری هۆکارێكی باش ده‌بێت بۆ پێشخستنی کاره‌کان به‌تایبه‌تی چالاکییه‌ بازرگانییه‌کان ئه‌مه‌ش به‌قازانجی زیاتر بۆ هه‌ردوو گه‌لی کوردستان و پۆڵه‌ندا کۆتایی دێت. هه‌روه‌ها به‌ڕێز خه‌یات وتی:"پۆڵه‌ندا وڵاتێکه‌ شاره‌زایی باشی له‌بواری ئاوه‌دانکردنه‌وه‌دا هه‌یه‌ و کاری کۆمپانیا پۆڵه‌ندییه‌کانیش له‌رووی نرخه‌وه‌ گونجاوتره‌ وه‌ک له‌هه‌ندێک وڵاتی دیکه‌، بۆیه‌ هه‌وڵی ئێمه‌ بۆ ئه‌وه‌یه‌ که‌ ‌وه‌به‌رهێنه‌ر و خاوه‌نکاری ئه‌و وڵاته‌ بێنینه‌ کوردستان تاکو له‌به‌شداریکردنیان له‌پڕۆسه‌ی ئاوه‌دانکردنه‌وه‌ی هه‌رێمدا دوانه‌که‌ون، له‌م پێناوه‌شدا هیوادارین باڵۆزخانه‌ی پۆڵه‌ندا هاوکارمان بێت." لای خۆیه‌وه‌، به‌ڕێز باڵیۆز لیچ ستێفانیاک وێڕای ده‌ربڕینی سوپاسگوزاری خۆی له‌به‌رامبه‌ر پێشوازی لێکردنیدا، وتی:"ئێمه‌ زۆر کاری گرنگمان له‌به‌ر ده‌ستدایه‌ که‌ بڕیاره‌ له‌داهاتوودا ئه‌نجامیان بده‌ین، له‌وانیش کردنه‌وه‌ی کونسوڵخانه‌ی وڵاته‌که‌مان له‌هه‌ولێری پایته‌ختی هه‌رێمی کوردستان له‌سه‌ره‌تای ساڵی نوێدا، هه‌روه‌ها ئاماده‌کاریش ده‌که‌ین به‌مه‌به‌ستی هێنانی ستافێک له‌که‌ناڵه‌ ته‌له‌فزیۆنییه‌کانی پۆڵه‌ندا بۆ کوردستان تاکو فلیمێکی دیکۆمێنتاری له‌باره‌ی هه‌رێمه‌وه‌ بۆ پۆڵه‌ندییه‌کان ئاماده‌ بکه‌ن." هه‌روه‌ها به‌ڕێز باڵیۆز روونیکرده‌وه‌ و وتی:"کردنه‌وه‌ی کونسوڵخانه‌ له‌ هه‌ولێر ده‌بێته‌ هۆی دروستبوونی متمانه‌ لای پۆڵه‌ندییه‌کان به‌کوردستان، کونسوڵخانه‌که هه‌ردوو کاروباری دپلۆماسی و بازرگانی له‌گه‌ڵ هه‌رێم رێک ده‌خات، هه‌روه‌ها ئاماده‌کاردنی فلیمه‌که‌ش له‌سه‌ر کوردستان وێنه‌ی ئه‌م هه‌رێمه‌ وه‌ک خۆی ده‌گوازێته‌وه‌ بۆ پۆڵه‌نه‌دییه‌کان، به‌وه‌ی ئاسایش و ئارامی له‌م به‌شه‌ی عێراقدا هه‌یه‌ و جیاوازه‌ له‌گه‌ڵ ناوچه‌کانی دیکه‌ی ئه‌م وڵاته‌دا، بۆیه‌ ئێمه‌ به‌م کارانه‌مان هه‌وڵی راکێشانی کۆمپانیا و خاوه‌نکارانی پۆڵه‌ندا ده‌ده‌ین بۆ کوردستان." له‌به‌شێکی دیکه‌ی دیداره‌که‌دا، به‌ڕێز سۆران ئه‌بوبه‌کر جێگری سه‌رۆکی ژوور، ئاماژه‌ی به‌وه‌دا که‌ ئێستا کوردستان بۆته‌ سه‌نته‌رێکی بازرگانی ناسراو له‌سه‌ر ئاستی جیهاندا، هه‌روه‌ها ده‌رگه‌یه‌کی فراوانی بازرگانیشه‌ ‌ بۆ هه‌موو عێراق، ئه‌مه‌ش وایکردووه‌ که‌ زۆربه‌ی کۆمپانیا بیانییه‌کان خوازیاربن بێنه‌ هه‌رێم به‌مه‌به‌ستی کارکردن و لقیشیان بۆ هه‌موو عێراق لێره‌دا بکه‌نه‌وه. له‌کۆتایی دیداره‌که‌شدا، به‌ڕێز دارا جه‌لیل خه‌یات سه‌رۆکی ژوور، وێڕای پێشوازی و پشتگیری له‌و ئامانجا‌‌نه‌ی که‌ باڵیۆزی نوێی پۆڵه‌ندا باسی لێوه‌کردن، وتی:"کردنه‌وه‌ی کونسوڵخانه‌ی پۆڵه‌ندا له‌هه‌ولێر ماوه‌ی نێوان هه‌ردوولامان نزیکتر ده‌کاته‌وه‌، بۆیه‌ ئێمه‌ وه‌ک ژوور ئاماده‌ین له‌و رووه‌وه‌ هاوکار و یارمه‌تده‌رتان بین.   

بڵاوكراوه‌ته‌وه‌ له‌ هه‌واڵ

رێککه‌وتی 22/10/2012، به‌ڕێز دارا جه‌لیل خه‌یات سه‌رۆکی ژووری بازرگانی و پیشه‌سازی هه‌ولێر له‌باره‌گه‌ی ژوور، پێشوازی له‌شاندێکی بازرگانی تورکی کرد، که‌ له‌نوێنه‌ری نزیکه‌ی 15 کۆمپانیای پارێزگه‌ی ئه‌نتاڵیا پێکهاتبوون. له‌سه‌ره‌تای دیداره‌که‌دا، که به‌‌ئاماده‌بوونی به‌ڕێزان سۆران ئه‌بوبه‌کر جێگری سه‌رۆکی ژوور و ژماره‌یه‌ک له‌ئه‌ندامانی ده‌سته‌ی کارگێڕی ژوور به‌ڕێوه‌چوو، به‌ڕێز دارا جه‌لیل خه‌یات سه‌رۆکی ژوور له‌وته‌یه‌کیدا به‌ناوی ئه‌ندامانی ده‌سته‌ی کارگێڕی ژووره‌وه‌ به‌خێرهێنانی شاندی میوان کرد و وتی:"به‌به‌رده‌وامی شانده‌ بازرگیانییه‌کان له‌پارێزگا‌کانی تورکیاوه سه‌ردانی ژوور ده‌که‌ن، ئه‌مه‌ش کاریگه‌ری راسته‌وخۆی ئه‌رێنی له‌سه‌ر په‌یوه‌ندییه‌ دوو قۆڵییه‌کانمان دروست کردووه‌، بۆیه‌ هیوادارین له‌رێی ئه‌م په‌یوه‌ندییانه‌وه‌ سوود به‌بازرگانان و هه‌ردوو گه‌لی کوردستان و تورکیا بگه‌یه‌نین." هه‌روه‌ها به‌ڕێز خه‌یات دواو و تی:"له‌کوردستاندا ره‌وشه‌که‌ له‌گه‌شه‌سه‌ندندایه به‌‌ره‌و ئاینده‌یه‌کی روونتر و باشتر، هه‌ڵبه‌ت له‌م پڕۆسه‌یه‌دا کوردستان پێویستی به‌کار و پڕۆژه‌کانی کۆمپانیا تورکییه‌کانه‌." لای خۆیه‌وه‌، به‌ڕێز گول ته‌کین سه‌رۆکی کۆمپانیای دۆسیات که‌هاوکات سه‌رۆکایه‌تی شانده‌که‌ی ده‌کرد، سوپاسگوزاری خۆی و ئه‌ندامانی شانده‌که‌ی راگه‌یاند له‌به‌رامبه‌ر پێشوازیلێکردنیان و وتی:"خۆشحاڵێن که‌ سه‌ردانی ژوورمان کردووه‌ و هیوادارین ئێمه‌ش وه‌ک هه‌ر کۆمپانیایه‌‌کی دیکه‌ی تورکی که‌ له‌کوردستاندا کار ده‌که‌ن، ده‌رفه‌تی کار بقۆزینه‌وه‌، هه‌ڵبه‌ت له‌م ئه‌رکه‌ماندا ده‌مانه‌وێت خزمه‌ت بکه‌ین و سوودیشی بۆ ئێمه‌ هه‌بێت." پاشان ئه‌ندامانی شاندی میوان، وێڕای ناساندنی خۆیان و پۆسته‌کانیان، باسیان له‌سروشتی کاری کۆمپانیاکانیان کرد و دووپاتیان کرده‌وه‌ که‌ ئاماده‌ن له‌کوردستاندا کار بکه‌ن. جێی ئاماژه‌یه‌، کۆمپانیاکانی شاندی میوان که‌له‌رێی نوێنه‌ره‌کانیانه‌وه سه‌ردانی ژووریان کرد، له‌ سێکته‌ره‌ جۆراجۆره‌کانی وه‌ک بیناسازی، وزه‌ی خۆر، کشتوکاڵ، مۆبیلیات و چه‌ند بوارێكی دیکه‌دا شاره‌زان. له‌کۆتایی دیداره‌که‌شدا، به‌ڕێز دارا جه‌لیل خه‌یات سه‌رۆکی ژوور ئاماده‌یی ژووری به‌مه‌به‌ستی هاریکاری ئه‌ندامانی شاندی میوان خسته‌روو، هاوکات دیاری رێزلێنان له‌نێوان هه‌ردوولادا، گۆڕدرایه‌وه‌.   

بڵاوكراوه‌ته‌وه‌ له‌ هه‌واڵ

رێککه‌وتی 17/10/2012، له‌مه‌راسیمی پێشکه‌شکردنی دووه‌مین ئه‌جێندای کاره‌کانی هه‌رێمی کوردستان، که‌ به‌ئاماده‌بوونی نوێنه‌ری سه‌رۆکی حکومه‌تی هه‌رێمی کوردستان به‌ڕێز عه‌لی سندی وه‌زیری پلاندانانی هه‌رێم و نه‌وزاد هادی پارێزگاری هه‌ولێر و دارا جه‌لیل خه‌یات سه‌رۆکی یه‌کێتی ژووره‌کانی بازرگانی و پیشه‌سازی هه‌رێمی کوردستان و ژماره‌یه‌ک له‌وه‌زیر و په‌رله‌مانتار و سه‌رۆک و جێگرانی سه‌رۆک و ئه‌ندامانی ده‌سته‌ی کارگێڕی ژووره‌کانی بازرگانی و پیشه‌سازی هه‌ولێر و سلێمانی و دهۆک و به‌رپرسانی حکومی و حزبی و کونسوڵ و نوێنه‌رانی وڵاتان و که‌سانی ئه‌کادیمی و مامۆستایانی زانکۆ میدیاکاران، نوێنه‌رانی رێکخراوه‌کانی کۆمه‌ڵی مه‌ده‌نی، پیاوانی کار و نوێنه‌ری کۆمپانیاکان، له‌سه‌نته‌ری رۆشنبیری و کۆمه‌ڵایه‌تی ژووری بازرگانی و پیشه‌سازی هه‌ولێر به‌ڕێوه‌چوو، به‌ڕێز دارا جه‌لیل خه‌یات سه‌رۆکی ژوور به‌ناوی ئه‌نجومه‌نی کارگێڕی ژووره‌وه‌ وته‌یه‌کی پێشکه‌ش کرد، که‌ ئه‌مه‌ی لای خواره‌وه‌ ده‌قه‌که‌یه‌تی: (به‌ڕێزان ... خۆشحاڵین كه‌ئه‌مڕۆ به‌شداری له‌مه‌راسیمی پێشكه‌شكردنی دووه‌مین ئه‌جێندای كاری هه‌رێمی كوردستان دا ده‌كه‌ین، كه‌ به‌ری ماندووبوونی ستافێكی شاره‌زای بواری ئابووری سه‌نته‌ری زانیاری وتوێژینه‌وه‌ی ستراتیژی كوردستانه‌. بێگومان ماوه‌یه‌كی زۆر پێی خه‌ریك بوون و دوای پێداچوونه‌وه‌ به‌ئه‌جێندای یه‌كه‌م كه‌ به‌ر له‌ (5) ساڵ ئاماده‌كرابوو، هه‌روه‌ها ئه‌نجامدانی ژماره‌یه‌ك له‌دیدار و كۆبوونه‌وه‌ خۆش به‌ختانه‌ ئه‌وا ئه‌مڕۆ پێشكه‌ش به‌حكومه‌تی هه‌رێمی كوردستان ده‌كرێت به‌مه‌به‌ستی ئه‌وه‌ی كه‌ وه‌ك بنه‌مایه‌ك بۆ به‌ره‌و پێشبر‌دنی ئابووری كوردستان كه‌ڵكی لێ وه‌ربگیرێ. به‌پێی زانیاریمان وه‌ك لایه‌نێكی په‌یوه‌ندیدار به‌بواری ئابووری، وه‌ به‌ دواداچوونمان له‌سه‌ر پڕۆسه‌ی به‌ره‌و پێشجوونی ئابووری، كۆمه‌ڵێك له‌و گرفتانه‌ی كه‌ له‌ئه‌جێندای پێشوودا هاتبوون، ئێستا چاره‌سه‌ر كراون. بێگومان له‌گه‌ڵ ئه‌و به‌ره‌و پێشچوونانه‌ی كه‌ له‌سه‌ر ده‌ستی كابینه‌ یه‌ك له‌‌دوای یه‌كه‌كانی حكومه‌ت هاتونه‌ته‌ دی، له‌ماوه‌ی نێوان ئه‌جێندای یه‌كه‌م و ئه‌م ئه‌جێندایه‌دا چه‌ندین گرفتی دیكه‌ هاتوونه‌ته‌ پێش، دڵنیام ئه‌م ئه‌جێندایه‌ به‌شێوه‌یه‌كی زانستی ده‌ست نیشانی كردوون به‌پێی جیاوازی له‌سێكته‌ره‌ ئابوورییه‌كاندا، ئه‌وه‌ی چاوه‌ڕێ ده‌كرێت له‌حكومه‌تی هه‌رێمی كوردستان ئه‌وه‌یه‌ كه‌ به‌رنامه‌ بۆ چاره‌سه‌ریكردنی یه‌كه‌یه‌كه‌ی ئه‌و گرفتانه‌ دابڕێژێت بۆ ئه‌وه‌ی ئابووری وڵاته‌كه‌مان به‌ره‌و پێشتر بچێت. له‌راستیدا ئه‌و جۆره‌ هه‌ڵوێستانه‌ی حكومه‌ت بۆ ئێمه‌ی بازرگان و نوێنه‌رانی كه‌رتی تایبه‌ت هانده‌رێكی زۆر گرنگه‌ بۆ به‌شداریكردنی زیاتر له‌پڕۆسه‌ی ئاوه‌دانكردنه‌وه‌ی هه‌رێمی كوردستاندا، له‌كاتێكدا كه‌ گرنگی پێدانی حكومه‌ت به‌بواری ئابووری و له‌چوارچێوه‌ی سیسته‌می بازاڕی ئازاد په‌یامێكی ئاشكرایه، ته‌نانه‌ت ته‌نها له‌ماوه‌ی چه‌ند مانگێكی ده‌ست به‌كاربوونی كابینه‌ی حه‌فته‌می هه‌رێمی كوردستان ئه‌و گرنگیدانه‌ سه‌لمنیدراوه، له‌سه‌ر ئاستی باڵادا چه‌ندین كۆبوونه‌وه‌ی فراوان به‌مه‌به‌ستی پێشخستنی ئابووری ساز كراوه‌ ، چه‌‌ندین لیژنه‌ی تایبه‌تیش بۆ لێكۆڵینه‌وه‌ی زیاتر و ده‌ستنیشان‌كردنی خاڵه‌ لاواز و به‌هێزه‌كانی چه‌ند سیكته‌رێكی ئابووری به‌تایبه‌ت له‌بواری كشتوكاڵ، پیشه‌سازی، گه‌شتیاری پێك‌هێنراوه‌، كه‌ بوه‌ مایه‌ی ده‌ركردنی چه‌‌ندین رینمایی و راسپارده‌ بۆ وه‌زاره‌ت و لایه‌نه‌ په‌یوه‌ندیداره‌كان. ئه‌وه‌ی ماوه‌ته‌وه‌ بریتییه‌ له‌ده‌ركردنی چه‌ند پلان و رێنمایی و یاسایه‌ك كه‌ پێویسته‌ حكومه‌ت هه‌وڵ بدات بۆ ده‌سته‌به‌ركردنیان له‌به‌ر ئه‌وه‌ی رۆڵی گرنگیان هه‌یه‌ له‌ده‌ربازبوون له‌سیسته‌می ئیشتراكی و سه‌نترالیه‌ت و گه‌یشتن به‌سیسته‌می ئابووری ئازاد، كه‌ به‌داخه‌وه‌ تا ئێستا ژماره‌یه‌كی زۆر له‌وه‌زاره‌ته‌كان به‌هه‌مان ئه‌و یاسایانه‌ كار ده‌كه‌ن كه‌ له‌‌سه‌رده‌می ئیشتراكی له‌ئێراقدا ده‌ركراون، وه‌ له‌خود و هه‌ڵسوكه‌وتكردنی هه‌ندێك له‌به‌رپرسه‌كانیش ره‌نگی داوه‌ته‌وه‌. له‌كۆتاییدا جێی خۆیه‌تی ده‌ست خۆشی له‌سه‌نته‌ری زانیاری و توێژینه‌وه‌ی ستراتیژی كوردستان و رێكخراوی (Cipe)، وه‌ به‌تایبه‌تی ستافی ئاماده‌‌كردنی ژماره‌ دووی ئه‌جێندای كاری هه‌رێمی كوردستان و هه‌موو ئه‌وانه‌ی كه‌ هاوكاریان بوون، بكه‌ین. وه‌ هیوادارین ببێته‌ بنه‌مایه‌ك بۆ چاره‌سه‌ركردنی ئه‌و گرفتانه، له‌و سێكته‌رانه‌دا كه‌ له‌و ئه‌جێندایه‌دا كاریان له‌سه‌ر كراوه، له‌ڕێگه‌ی پێكهێنانی لیژنه‌یه‌كی پسپۆر بۆ كاركردن له‌سه‌ر یه‌كه‌ یه‌كه‌ی گرفته‌كان. هیوادارین به‌هه‌موو لایه‌ك بتوانین سیمایه‌كی تازه‌تر و پێشكه‌وتووتر به‌ وڵاته‌كه‌مان ببه‌خشین و ئابووری وڵاته‌كه‌مان به‌هێزتر بكه‌ین، بۆ ئه‌وه‌ی بێكاری به‌ ته‌واوی بنبڕ بكه‌ین و ژیانێكی به‌خته‌وه‌رانه‌ بۆ هاوڵاتیان ده‌سته‌به‌ر بكه‌ین. سوپاس ...)   

بڵاوكراوه‌ته‌وه‌ له‌ هه‌واڵ

بڵاوکراوه‌کان

ڕۆژنامه‌ی بازرگانی سه‌رده‌م

ڕێبه‌ری ژوور

هه‌واڵی چاوه‌ڕوانكراو

سعر الصرف

به‌های گۆرینه‌وه‌ی دیناری عیراقی به‌ دولاری ئه‌مری...

«
»
« February 2020 »
Mon Tue Wed Thu Fri Sat Sun
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29  

نرخی دراو

نرخی دراو

کەشوهەوای هه‌ولێر

ئاگاداری

Copyright © 2012 Erbil Chamber. All Rights Reserved. سه‌ره‌وه‌ ↑