بە مەبەستی پیرۆزبایی بە بۆنەی دەست بەكاربوونی وەكو وەزیر، دارا جەلیل خەیات سەرۆكی ژوور بە یاوەری ژمارەیەك لە ئەندامانی ئەنجومەنی كارگێڕی ژوور سەردانی دیوانی وەزارەتی كرد و لە لایەن محەممەد قادر هاودیانی وەزیری كار و كاروباری كۆمەڵایەتی لە حكومەتی هەرێمی كوردستان پێشوازی لێكرا.
لە دیدارێكدا سەرۆكی ژوور پیرۆزبایی لێكرد بە بۆنەی دەست بەكاربوونی وەكو وەزیر وهیوای سەركەوتنی بۆ خواست لە ئەركەكەیدا، هەردوولا جەختیان لە هەماهەنگی نێوانیان كردەوە.
رۆژی 18/1/2015 دارا جەلیل خەیات سەرۆكی ژوور پێشوازی لە ئاتیس سجۆنیتس باڵیۆزی لاتڤیا لە عێراق و توركیا و ئێران كرد.
لە دیدارێكدا كە سەرۆ دزەیی سەرۆكی لقی هەولێری یەكێتی بەڵێندەرانی هەرێمی كوردستان و ئەندامانی ئەنجومەنی كارگێڕی ژوور ئامادەی بوون، ئاتیس وێڕای دەربڕینی خۆشحاڵی خۆی بۆ سەردانی شاری هەولێر رایگەیاند، كە ئەو هاتوەە بۆ ئەوەی پەرە بە پەیوەندییەكانیان بدەن لەگەڵ هەرێمی كوردستان بە تایبەت لە كەرتی ئابووری و بازرگانی، چونكە هەرێمی كوردستان لە رووی پێشكەوتن و سەقامگیری زۆر جیاوازە لەگەڵ ناوچەكانی تری عێراق.
هەروەها تیشكی خستە سەر ئەوەی كە تا ئێستا پەیوەندییە بازرگانیەكانیان لەگەڵ هەرێمی كوردستان تاكە كەسی بووە و پەرەیەكی ئەوتۆی پێنەدراوە و ژوورە بازرگانیەكان بوونەتە قونسوڵی ئێمە لە بۆ بازرگانیكردن و پەیوەندی ئابووری.
روونیشی كردەوە كە ئەوان وەكو سەرەتایەك قونسوڵی فەخری دادەنێن لە هەرێم و پاشان هەنگاو بە هەنگاو دەست بەكردنەوەی قونسوڵخانە دەكەن لە شاری هەولێر.
هەروەها باڵوێزی لاتڤیا تیشكی خستە سەر ئەوەی كە جگە لە بازرگانیكردن هیوا خوازە لە رووی گەشت و گوزاریشەوە پەرە بە پەیوەندییەكانیان بدرێت.
پاشان كورتە باسێكی لەسەر چۆنیەتی كار و دەرفەت لە وڵاتی لاتڤیا پێشكەش بە ئامادەبووان كردو، رایگەیاند كە ئەوان بە نیازن لە چەند مانگی داهاتوو بە شاندێكی گەورەی بازرگانیەوە سەردانی هەرێمی كوردستان بكەنەوە.
لای خۆیەوە سەرۆكی ژوور خۆشحاڵی خۆی بەم سەردانە دەربڕی و رایگەیاند بە كردنەوەی قونسوڵ و پێدانی ڤیزا لە شاری هەولێر بۆ بازرگانان و هاوڵاتیان گرنگترین فاكتەرە بۆ پەرەپێدانی كەرتی بازرگانی و ئابووری لە نێوان هەردوولا.
ئەوەشی خستە روو كە هەرێمی كوردستان لە هەموو روویەكەوە دەوڵەمەندە ، حكومەتی هەرێمی كوردستانیش پاڵپشتی تەواو لە هەر لایەن و ووڵاتیك دەكات كە بیەووێت بەشدار بێت لە ئاوەدانكردنەوەی هەرێمی كوردستان و وەبەرهێنان ئەنجام بدات.
ووڵاتی لاتڤیاش ئەزموونی دەوڵەمەندە بە تایبەت لە بواری كشتوكاڵی و گەشت و گوزار.
سەرۆكی ژوور دووپاتی كردەوە كە ئەوان بە هەموو شێوەیەك پاڵشتی ئەوان دەكەن سوپاسی ئەو دەست پێشخەریەشی لێكردن.
پاشان لە لایەن ئامادەبووانەوە پرسیار و راو بۆچوونەكان ئاڵوگۆڕ كرا.
بە مەبەستی پتەوكردنی پەیوەندییەكان و ناردنی وەبەرهێنەرانی، رۆژی 15/1/2015 شاندێكی كۆمەڵەی كارسازانی تورك سەردانی ژووریان كردو لە لایەن دارا جەلیل خەیات سەرۆكی ژوور پێشوازییان لێكرا.
لە دیدارێكدا كە بەشێك لە ئەندامانی ئەنجومەنی كارگێڕی ژوور و جێگر و ئەندامانی ئەم كۆمەڵەیە ئامادەی بوون باس لە هەل و چۆنیەتی كاركردن و وەبەرهێنان لە هەرێمی كوردستان كرا و هەردوولا تەئكیدیان لەسەر پتەوكردنی پەیوەندییەكانی نێوانیان و زیاتر هەماهەنگی هەردوولا دووپات كرایەوە.
سەرۆكی ژووریش پاڵپشتی خۆیی و ژووری بازرگانی و پیشەسازی هەولێری بۆ هەموو جۆرە هاوكارییەك دەربڕی.
ئێوارەی هەمان رۆژیش بە ئامادەبوونی نەوزاد هادی پارێزگاری هەولێر و دارا جەلیل خەیات سەرۆكی ژووری بازرگانی و پیشەسازی هەولێر و جەمیل هەركی سەرۆكی كۆمەڵەی كارسازانی تورك و فەردا جەمیل جێگری كۆمەڵە و سەرۆكی كۆمەڵەی كارسازانی خانمانی كوردستان و زیاتر لە 105 كارساز لە باكووری كوردستان و ژمارەیەك لە بازرگانان و كارسازانی هەرێمی كوردستان، بۆ زیاتر یەكتر ناسین و پتەوكردنی پەیوەندییەكانیان لە هۆتێل دیڤان لە شاری هەولێر دیدارێك لە نێوان كارسازانی باكوور و باشووری كوردستان بەڕێوەچوو.
لە دەستپێكی دیدارەكەدا رێناس هەركی سەرۆكی كۆمەڵەی كارسازانی تورك ووتەیەكی پێشكەش كرد و ووتی ئامانجی ئێمە لەم دیدارە پتەوكردنی پەیوەندیەكانە لە گەڵ كارسازانی باشووری كوردستان و ئەمەش دەبێتە دەستپێكێك بۆ یەكترناسین.
پاشان فەردا جەمیل جێگری هەمان كۆمەڵە و سەرۆكی كۆمەڵەی كارسازانی خانمانی كوردستان ووتی: بەهۆی ئەمنیەت و سەقامگیری، كوردستان بووەتە جێگایەك بەبێ هیچ ترسێك دەتوانیت كار و وەبەرهێنان بكەین ئەم رۆژەشی بە رۆژێكی مێژوویی لە قەڵەمدا و ووتیشی كارسازانی خانمان و پیاوان پێكەوە كاردەكەن لەسەر خاكی كوردستان.
دواتر نەوزاد هادی لە ووتەیەكدا گرنگی ئەم دیدارەی خستە روو خۆشحاڵی خۆی دەربڕی بە هاتنی ئەم گرووپە لە باكوور و رایگەیاند كە ئەوان دەتوانن لەگەڵ كارسازانی ئێرە پێكەوە میكانیزمێك دابرێژن بۆ كاركردن، ووتیشی جێگەی شانازی ئێمەیە كە بتوانن لێرە كاربكەن و جێ ی پەنجەیان دیاربێت لە ئاوەدانكردنەوەی هەرێمی كوردستان.
دارا جەلیل خەیات سەرۆكی ژوور رایگەیاند كە حكومەت و دام و دەزگاكانی حكومەت زۆر بە ئەكتیڤیانە كاریان لەسەر ئەوە كردووە كە خەڵكی كوردستانی باكوور سوود لە هەل و ئیش و كارەكانی هەرێمی كوردستان وەرگرن هیوای بەردەوامبوونی پەیوەندییەكانیش دەخوازین.
جێگەی ئاماژە پێكردنە كە كۆمەڵەی كارسازانی تورك لە ساڵی 2014 لە شاری هەولێر بە سەرۆكایەتی رێناس هەركی و فەردا جەمیل دامەزرا.