لە دیدارێكدا كە بەشێك لە ئەندامانی ئەنجومەنی كارگێڕی ژوور و عەبدوڵا كیسكن بەرپرسی هەرێمیەكان لە رێكخراوی هەناردەكارانی توركیا ئامادەی بوون باس لە دوایین پێشهاتە بازرگانیەكانی نێوان هەرێمی كوردستان و توركیا كرا.

مستەفا یێڵماز وتی: ئێمە وەكو بەشی بازرگانی لە كونسوڵخانەی توركیا لە هەولێر بە هەماهەنگی لەگەڵ رێكخراوی هەناردەكارانی توركیا بە نیازین لە 6/2/2016 بە بەشداری نزیكەی 70 كۆمپانیای توركی لە گشت سێكتەرەكان سەردانی هەولێر بكەن بۆ ئەوەی لە نزیكەوە خاوەن كۆمپانیا و بازرگانان بەشدار بن لە بازاڕەكانی هەرێمی كوردستان و بەرهەمەكانیان نمایش بكەن و لەگەڵ خاوەن كۆمپانیا و بازرگانانی هەرێم كۆببنەوە.

وتیشی: وا چاوەڕوان دەكرێت وەزیری بازرگانی توركیا یاوەری ئەم شاندە بكات.

سەبارەت بە پێدانی ڤیزای توركیا بۆ بازرگانانی هەرێم بەرپرسی بەشی بازرگانی لە كونسوڵخانەی توركیا وتی: ئێمە لە ئێستادا بە نیازین سیستەمێكی نوێ دابنێین تایبەت بۆ بازرگانان و رۆژانە كاتژمێرێكی تایبەت تەرخان دەكرێت بۆ رایی كردنی مامەڵەكانیان و پێدانی ڤیزا لە ماوەیەكی كورت.

لە لایەن خۆشیەوە جێگری سەرۆكی ژوور سوپاسی كردن بۆ ئەم هەنگاوە و ئامادەیی ژووری بازرگانی و پیشەسازی هەولێری دەربڕی بۆ هەموو ئاسانكارییەك و هاوكارییەك بۆ ئەم شاندە.