بە مەبەستی دۆزینەوەی هەلی كار و بەشداری كردنیان لە بازاڕەكانی هەرێمی كوردستان رۆژی دووشەممە 6/6/2016 شاندێكی كۆمپانیاكانی شاری كرمانشان لە سێكتەرەكانی (ئاودێری، پزیشكی، پلاستیكی، رێگاوبان و شیرەمەنی) سەردانی ژووری بازرگانی و پیشەسازی هەولێریان كرد لە لایەن ماجد جەلال ئەندامی ئەنجومەنی كارگێڕی ژوور پێشوازییان لێكرا.
لە كۆبوونەوەیەك دا كە هەریەكە فێروز زارەئی بەرپرسی بەشی بازرگانی و پەیوەندییەكان و مەهدی فراهانی بەرپرسی پێشووی بازرگانی لە كونسوڵخانەی ئێران لە هەولێر ئامادەبوون.
لە سەرەتای كۆبوونەوەكەدا ماجد جەلال وتەی بەخێرهێنانی پێشكەش كردو تیایدا رۆڵی كۆمپانیا ئێرانیەكانی بەرز نرخاند لە بەشداری كردنیان لە ئاوەدانكردنەوەی هەرێم و بازاڕەكانی كوردستان، هیوای خواست كۆمپانیاكان و بازرگانانی شاری كرمانشانیش بتوانن هاوشێوەی شارەكانی تری كۆماری ئیسلامی ئێران لەم كاروانە دانەبڕێن.
ئەندامی ئەنجومەنی كارگێڕی ژووریش جەختی لە پتەوكردنی پەیوەندییە بازرگانی و ئابووری یەكانی نێوان هەردوولا كردەوە ئامادەیی ژووری نیشاندا بۆ هەموو جۆرە هاوكارییەك و پتەوكردنی زیاتری ئەم پەیوەندییە.
لە لایەن خۆشیەوە مەهدی فراهانی پاڵپشتی بازرگانان و كۆمپانیاكانی وڵاتەكەی بۆ هەرێم دووپات كردەوە وتی: ئێمە وەكو كونسوڵخانەی ئێران لە هەولێر هەمیشە لە هەوڵی پتەوكردنی پەیوەندییەكان داین و لە هەوڵ داین كۆمپانیاكان و بازرگانانی ئێران بە هەموو شارەكانیەوە بانگێشت بكەین بۆ هەرێم و بەشداربن لە بازاڕەكانی هەرێمی كوردستان.
رۆژی 30/5/2016 دووەمین كۆبوونەوەی ئەنجومەنی ئەمیندارانی پەیمانگای كوردستان لە بارەگای ژووری بازرگانی و پیشەسازی هەولێر ئەنجام درا.
لەم كۆبوونەوەیە گفتوگۆی زیاتر كرا لەسەر چۆنیەتی یارمەتی دانی كۆمپانیاكان لە رێگەی بەرزكردنەوەی ئاستیان و چۆنیەتی راكێشانیان بۆ وەبەرهێنان، هەر لەم كۆبوونەوەیە مەحمود رەئوف كەریم وەكو سەرۆكی ئەنجومەن و د. وەسفی تاهیر قەهوەچی وەكو جێگری سەرۆكی ئەنجومەن لە رێگای هەڵبژاردنەوە لە لایەن ئەندامەكانەوە هەڵبژێردران.
چۆنیەتی هەنگاوەكانی كاركردن و پلانی ئەم پەیمانگایە گفتوگۆی لە بارەیەوە كرا وا بڕیاریشە لە ماوەی داهاتوو دا لە نێو خاوەنكاران لە كوردستان بڵاویبكەنەوە.