رۆژی 23/7/2018 د. دارا جەلیل خەیات سەرۆكی ژوور پێشوازی كرد نیرانجان ئاسوكار راناسنغا باڵیۆزی وڵاتی سریلانكا لە عێراق و د. ئەحمەد جەلالەددین كونسوڵی فەخری وڵاتی سریلانكا لە هەولێر.

لە دیدارێكدا باڵیۆزی سریلانكا وتی: حكومەتی سریلانكا لە رێگەی دانانی چەندین پرۆگرام و بیرۆكە هەوڵ بۆ پتەوكردنی پەیوەندییەكان دەدات لەگەڵ هەرێمی كوردستان بە تایبەت لە سێكتەرەكانی كشتوكاڵ، پیشەسازی، گەشت و گوزار و كەلتور.

وتیشی: پەیوەندییەكانمان لەگەڵ هەرێمی كوردستان لەسەر بنەمای سوودی هاوبەشی دوولایەنە دەبێت.

دەربارەی پەیوەندی بازرگانی عێراق بە گشتی لەگەڵ وڵاتی سریلانكا لە ئێستادا باڵیۆز وتی: بەگشتی ئاڵوگۆڕە بازرگانیەكان لەگەڵ عێراق لە ئاستێكی باش دایە بە تایبەت كە وڵاتی سریلانكا لە رووی بەرهەمهێنان و كوالێتی باشی چایە لە ریزبەندی یەكەم دێت لە جیهان، ساڵانە 310 ملیۆن كیلۆ بە 853 كارگەی چا بەرهەم دەهێنین لە 5 مانگی یەكەمی ئەمساڵ وڵاتی عێراق بە هاوردەكردنی 35 ملیۆن كیلۆ ساڵانە لە ریزبەندی یەكەم دێت.

 

 

 

لە لایەن خۆیەوە سەرۆكی ژوور خۆشحاڵی خۆی دەربڕی و رایگەیاند: پەیوەندییە بازرگانیەكانی نێوان عێراق بە گشتی و هەرێمی كوردستان بە تایبەتی لەگەڵ وڵاتی سریلانكا مێژووین، خوازیاری پەرەپێدانی زیاترن.

وتیشی: ئێمە وەكو ژوور ئامادەین بۆ پەرەپێدانی پەیوەندییە بازرگانیەكان، دەتوانین بە شاندێكی بازرگانی سەردانی سریلانكا بكەین و خاوەن كار و كۆمپانیا و بازرگانانی وڵاتی سریلانكاش سەردانمان بكەن و كۆبوونەوە و دیدار لەگەڵ بازرگانانی هەرێمی سازبكەن، ئێمەش وەكو ژوور هوكار و پاڵپشت دەبین لە هەموو روویەكەوە.

شایانی باسە لەم دیدارە سۆران ئەبوبەكر و مەجید سەدیق سێودی جێگرانی سەرۆكی ژوور و فیدائەددین محەممەد ئەمین، سالار جەلال، سەركەوت حاجی جەمال بەزاز و سەدرەددین كەمال ئەندامانی ئەنجومەنی كارگێڕی ژوور ئامادەبوون.