بە مەبەستى یەکترى ناسین و دروستکردنى پەیوەندى بازرگانى لە نێوان شاندە بازرگانیەکان کە سەردانى کوردستان دەکەن لەگەل بازرگانانى هەولێر ئێوارەى رۆژى یەک شەممە 15/11/2009 بە ئامادەبوونى دارا جەلیل خەیات سەرۆکى ژوور و بالیۆزى ولاتى دانیمارک لە بەغدا کۆبوونەوەیەکى فراوان بۆ شاندێکى بازرگانى دانیمارک سازکرا، ژمارەیەکى زۆر لە بازرگانانى هەولێر کە لە لایەن ژوورەوە بانگهێشت کرابوون ئامادەبوون. هەریەک لە سەرۆکى ژوور و بالیۆزى دانیمارک لە ووتەکانیاندا تەئکیدیان لەسەر گرنگى پەیوەندى نێوان هەرێم و دانیمارک کردەوە و ئامادەیی خۆیان دەربرى بۆ هاوکارى کردنى بازرگانان و پێشکەش کردنى ئاسانکارى بۆ ئەنجامدانى کارەکانیان. دواتریش هەریەک لە ئامادەبووان خۆیان و کار و چالاکیەکانیان ناساند و بۆچوون و سەرنجەکانیان خستەروو، لە لایەن سەرۆکى ژوور و بالیۆزى دانیمارک وەلامى پرسیارەکانیان درایەوە. لە پاشان بازرگانان چەندین کۆبونەوەى دووقۆلیان لەگەل یەکترى ئەنجامدا و بۆ خواردنى ئێوارە لە لایەن ژوور میواندارى کران