رۆژی 30/11 دارا جەلیل خەیات سەرۆكی ژوور لە بارەگای ژوور پێشوازی لە میهایتە ئێنی كونسوڵی گشتی رۆمانیا لە شاری هەولێر كرد.
لە دیدارێكدا كونسوڵی رۆمانیا خۆشحاڵی خۆی بەم سەردانە دەربڕی و بۆ ئاگاداربوون لە بارەی چۆنیەتی ئیش و كار و بەڕێوەچوونی كاری بازرگانی لە هەرێمی كوردستان لەم بارودۆخە و هەروەها جەختی لەوە كردەوە كە وڵاتەكەی دەتوانێ هاوكار و هاوبەشی پێشكەوتنەكانی هەرێمی كوردستان بێت، بۆ ئەم مەبەستەش وتی ژمارەیەك كۆمپانیای رۆمانیا لە گشت سێكتەرەكان بانگێشت دەكەین و ئێوەش وەكو ژووری بازرگانی دەتوانن ژمارەیەك لە كۆمپانیاكانی هەرێمی كوردستان بانگێشت بكەن لە سەرەتای ساڵی داهاتوو چاوپێكەوتن و دانیشتن رێك بخەین بە مەبەستی پێشكەوتنی زیاتر لە كاری بازرگانی و وەبەرهێنانی كۆمپانیا رۆمانیەكان لە هەرێمی كوردستان.
لای خۆیەوە سەرۆكی ژوور وێرای بەخێرهێنانی كونسوڵ، سوپاسی ئەو دەست پێشخەرییەی كرد و روونی كردەوە كە كاری بازرگانی بە شێوەیەكی گشتی باش دەڕوات، سەبارەت بە گرنگترین سێكتەر كە هەرێمی كوردستان لە ئێستا پێویستی پێیەتی ووتی: كشتوكاڵ و پیشەسازی و گەشت و گوزار گرنگترین سێكتەرن بەڵام لە كەرتی تەندروستی و خوێندنیش پێویستمان بە هاوكارییە ساڵانە ژمارەیەكی زۆر لە قوتابیانی هەرێم روو لە ووڵاتی رۆمانیا دەكەن بە مەبەستی خوێندن.
ووتیشی ووڵاتی عێراق لە ئێستادا دەتوانین بڵێین زیاتر لە %90ی كاَلا لە دەرەوە هاوردە دەكات كە پشكی شێر بەر هەردوو ووڵاتی توركیا و ئێران كەوتووە، رۆمانیاش دەتوانێ سوود لەم هەلە وەربگرێت و بەشدار بێت لە هەناردەكردنی كاڵای خۆی بۆ بازاڕەكانی عێراق و هەرێمی كوردستان.
دەربارەی كۆبوونەوە و چاوپێكەوتنی كۆمپانیاكانی هەردوولا سەرۆكی ژوور ئامادەیی ژووری نیشاندا بۆ هەموو جۆرە پاڵپشتی و هاوكارییەك.