لە دیدارێکی نێوان برۆنۆ ساکۆمانی باڵیۆزی کەنەدا لە عێراق و دارا جەلیل خەیات سەرۆکی ژووری بازرگانی و پیشەسازی هەولێر، لە رۆژی ١٠ی شوبات لە شاری هەولێر گفتوگۆ لەسەر پەرەپێدانی پەیوەندیی ئابووری و بازرگانی نێوان کەنەدا و کوردستان کرا.
لەو دیدارەدا کە هەردوو جێگری سەرۆکی ژوورو ژمارەیەک لە ئەندامانی ئەنجومەنی کارگێڕی ژوورو جان فیلیپ راوێژکاری ئابووری لە باڵیۆزخانەی کەنەداو خضر سوبیحات کونسولی بازرگانی کەنەدا لە هەولێر ئامادەی بوون، باس لەو پیشانگا نێودەوڵەتییەی تایبەت بە خۆراک کرا کە بڕیارە لە مانگی نیسانی داهاتوو لە وڵاتی کەنەدا ساز بکرێت.
بڕیار وایە هاوشان لەگەڵ شاندی بازرگانی عێراق، شاندێکی گەورەی بازرگانی کوردستان بە سەرۆکایەتی د.عەلی سندی وەزیری بازرگانی و پیشەسازی بە وەکالەت و بە هەماهەنگی ژوورە بازرگانییەکانی هەرێم ئامادەی ئەو پیشانگایە بن و، لە پەراوێزیدا چەند دیدارو چاوپێکەوتنێک لەگەڵ بەرپرسان و دام و دەزگا پەیوەندیدارەکاندا ساز بکرێت.