رۆژی 31ی ئاب مەحمود حاجی ساڵح وەزیری كاروباری شەهیدان و ئەنفالكراوان لە حكومەتی هەرێمی كوردستان سەردانی ژووری كرد و لە لایەن د. دارا جەلیل خەیات سەرۆكی ژوور پێشوازی لێكرا.
لە دیدارێكدا كە بەشێك لە ئەندامانی ئەنجومەنی كارگێڕی ژوور ئامادەی بوون، هەردوولا باسیان لە دوایین كاروچالاكی خۆیان كرد.
وەزیری ناوبراو رایگەیاند كە وەزارەتەكەیان سندوقێكی هەیە سوودیان لە پارەكەی وەردەگرت بۆ یارمەتی كەس و كاری شەهیدان، بەڵام بە هۆی خراپی بارودۆخی دارایی ئەم سندوقە بە بەتاڵی ماوەتەوە، داوای لە ژووری بازرگانی كرد بە یارمەتی بازرگانان و هەماهەنگی گشت لایەك ئەم سندوقە ببوژێنرێتەوە.
لە لای خۆیەوە سەرۆكی ژوور هەوڵەكانی وەزیری بەرزنرخاند و ئامادەیی خۆی و ژووری نیشاندا بۆ بوژانەوەی ئەم سندوقە و هەموو جۆرە هاوكارییەك بۆ كەس وكاری شەهیدان و ئەنفالكراوەكان.
