رۆژی 4/5/2017 بە ئامادەبوونی رێزدار نێچیرڤان بارزانی سەرۆكی حكومەتی هەرێمی كوردستان، نەورۆز مەولود وەزیری شارەوانی و گەشت و گوزار، د. دارا جەلیل خەیات سەرۆكی ژووری بازرگانی و پیشەسازی هەولێر و ژمارەیەك لە وەزیرانی حكومەتی هەرێمی كوردستان و نوێنەران و كونسوڵخانەی وڵاتانی بیانی لە هەولێر و ژمارەیەك لە بازرگانان و خاوەن كۆمپانیا خۆماڵی و بیانیەكان لەسەر زەوی پێشانگای نێودەوڵەتی لە پاركی شەهید سامی عەبدولڕەحمان لە شار هەولێر گەورەترین پێشانگای رۆژهەڵاتی ناوەڕاست بۆ گەشتیاری بە بەشداری 200 كۆمپانیا لە 16 وڵاتی جیاواز بۆ ماوەی 3 رۆژ كرایەوە.
ئامانج لە كردنەوەی ئەم پێشانگایە پێشخستنی كەرتی گەشت و گوزارە لە هەرێمی كوردستان وە پاڵپشتێكە بۆ بوژاندنەوەی كەرتی ئابووری، لە هەمان كات دا گەشتیاران و سەردانكەران ئاشنا دەبن بە چۆنیەتی گەشت كردن بە ئاسانترین شێوە و رەخساندنی هەلی گەشت بۆیان، هەر لەم پێشانگایە هاوڵاتیانی هەرێم ئاشنا دەبن بە شوێنە گەشتیارەكانی وڵاتانی بەشداربوو.
لە رۆژانی بەڕێوەچوونی ئەم پێشانگایە چەندین چالاكی و دیمەنی سەرنج راكێش بۆ ئامادەبووان نمایش كرا لە هەمان كات دا ئەم شوێنە بووە جێ"ایەك بۆ گۆڕینەوەی بیروبۆچوونی گەشتیاری لە نێوان كۆمپانیا و وڵاتانی بەشداربوو.
شایانی باسە ژووری بازرگانی و پیشەسازی هەولێر بەشداربوو لەم پێشانگایە بە پێشكەشكردنی چاپەمەنیەكانی خۆی بۆ هاوڵاتیان و پێشكەشكردنی ئەو خزمەتگوزارییانەی كە لە لایەن ژوورەكەمانەوە پێشكەش دەكرێـت.
