ئێوارەى رۆژى هەینى یەکێتى ژوورە بازرگانیەکانى هەرێمى کوردستان و ژوورى بازرگانى روسیا لە هۆڵى شیراتۆن لە شارى هەولێر پرۆتۆکۆڵێکى بازرگانیان ئیمزا کرد.
(یەڤگینى بریماکۆف) سەرۆک وەزیران و وەزیرى دەرەوەى پێشوترى روسیا و سەرۆکى ژوورى بازرگانى و پیشەسازى ئێستاى روسیاى فیدراڵ و شاندى یاوەرى لە درێژەى سەردانەکەیاندا بۆ هەرێمى کوردستان پاش ئیمزا کردنى پرۆتۆکۆڵێکى بازرگانى لە شارى سلێمانى لە سەردانەکەیاندا بۆ شارى هەولێر و لە هۆڵى هۆتێل شیراتۆن لە مەراسیمێکدا کە ژمارەیەکى زۆر لە گەورە بەرپرسانى حیزبى و حکومى ئامادەى بوون بە ئامادەبوونى کەناڵەکانى راگەیاندنى جیهانى و ناوخۆیى پرۆتۆکۆڵێکى بازرگانیان لە گەڵ یەکێتى ژوورە بازرگانیەکانى هەرێمى کوردستان بە سەرۆکایەتى (دارا جلیل خەیات) ئیمزا کرد.
لەو مەراسیمەدا (بریماکۆڤ) وتەیەکى پێشکەش کرد و تێیدا خۆشحاڵى خۆى بۆ ئەم سەردانەى بۆ کوردستان دەربڕى و ستایشى رۆڵى سەرکردایەتى کوردى کرد لە بە دەستهێنانى ئەو ئازادیەى کە ئێستا هاتۆتە بەرهەم و هاو خەمى و دڵسۆزى خۆشى بۆ گەلى کورد دووپات کردەوە و ئیمزاکردنى ئەو پرۆتۆکۆڵەشى لە گەڵ یەکێتى ژوورە بازرگانیەکانى کوردستان بە گرنگ وەسف کرد لە کاتێکدا کە لەمە و دوا دەتوانن پەیوەندیە بازرگانیەکانى نێوان روسیا و حکومەتى هەرێمى کوردستان پەرە پێ بدەن و دەستى کۆمپانیا روسیەکان بگرن تا لە کوردستاندا کارى وەبەرهێنان ئەنجام بدەن ،
وە هەروەها (دارا جلیل خەیات)سەرۆکى یەکێتى ژوورە بازرگانیەکانى کوردستان وتەیەکى پێشکەش کرد و باسى لە گرنگى ئیمزا کردنى ئەو پرۆتۆکۆڵە کرد لە پێشخستن و بەرەو پێشبردنى بارى ئابوورى و رەوتى بازرگانى هەرێمى کوردستاندا و سوپاسى حکومەتى روسیا و ژوورى بازرگانى ئەو وڵاتەى کرد لە بەدەمەوە هاتنى داواکانیان کە هەردەم خەمى یەکێتى ژوورە بازرگانیەکانى کوردستان بووە کە کۆمپانیا بیانیەکان هان بدات تا بێنە کوردستان و کارى وەبەرهێنانیان پێ ئەنجام بدات و هەموو هاو کارى و پشتیوانیەکیشى بۆ ژوورى بازرگانى روسیا دووپات کردەوە .
وە بڕیاریشە بە گوێرەى ئەو پرۆتۆکۆڵە شاندى ژوورە بازرگانیەکانى هەرێمى کوردستان لە داهاتوودا سەردانى وڵاتى روسیا بکەن و پەرەى زیاتر بە پەیوەندیە ئابووریەکانى نێوانیان بدەن.
 

رۆژى دووشەممە لە بارەگاى ژوور کەناڵى ئاسمانى (tv5)ى فەرەنسى چاوپێکەوتنێکى لە گەڵ بەڕێز (دارا جلیل خەیات) سەرۆکى ژوورى بازرگانى و پیشەسازى هەولێر سازدا ،لە وەڵامى پرسیارێکى پەیامنێرى کەناڵى ناوبراودا کە ئایا عێراق بە گشتى و هەرێمى کوردستان بە تایبەتى پاش رووخانى رژێمى بەعسى لە ناو چوو وە ئازاد بوونى عێراق چ گەشە و بەرەو پێشچونێک لە بوارى ئابوورى و بازرگانیدا رووى داوە؟
سەرۆکى ژوور رایگەیاند کە شانازیەکى گەورەیە بۆ حکومەتى هەرێمى کوردستان و بازرگانانى ناوچەکە کە لە پاش ئازاد بوونى عێراق توانیان تەکانێکى باش بدەنە لایەنى پێشخستنى بوارى ئابوورى و بازرگانى بە تایبەت لە هەرێمى کوردستان لە بەرئەوەى ئەمن و ئاسایش لە ناوچەکانى ترى عێراق زیاتر تێیدا بەرقەرارە کەشێکى باشى خولقاندووە بۆ هەنگاو نان بەرە و پێشکەوتن و بەدیهێنانى خەونەکانمان ، لە هەمان کاتدا سەرۆکى ژوور باسى لەوەش کرد کە ژوورەکەمان توانیویەتى گەلێک شانازى بۆ وڵاتەکەمان بە دەست بێنێ لە بوارى هاوکارى کردنى کۆمپانیا بیانیەکان بە بانگهێشت کردنیان و ئیمزا کردنى چەندین پرۆتۆکۆڵى بازرگانى لە گەڵیاندا تا بێنە هەرێم و لە سایەى بارى ئارامى کوردستاندا وەبەرهێنا و کارى بازرگانى ئەنجام بدەن.

بە مەبەستى تاوتوێ کردنى ئالیەتى بەشدارى کردنى بازرگان و پیشەسازانى هەولێر لە پێشانگاى نێودەوڵەتى دیاربەکر لە تورکیا کە لە 15-18/5/2008 ساز دەکرێت ، رۆژى یەک شەممە 4/5/2008 سەرۆک و ژمارەیەک لە ئەندامانى ئەنجومەنى کارگێڕى ژوور پێشوازیان کرد لە محمد قایا سەرۆکى ژوورى بازرگانى دیاربەکر و شاندى یاوەرى ،وە بۆ ئێوارەى هەمان رۆژ شاندى میوان لە هوتێلى شیراتۆن میواندارى کران ،شاندى میوان هەر لە درێژەى سەردانەکەیاندا بۆ رۆژى دواتر لە گەڵ سەرۆک و ئەندامانى ئەنجومەنى ژوورەکەماندا لە بارەگاى ژوور کۆبوونەوە و چەندین بابەتى پەیوەنددار بە بەشدارى کردنى بازرگانان لە پێشانگاى ناو براو باس کران ، دواتریش لە لایەن بەڕێز (دارا جەلیل خەیات)سەرۆکى ژوورەوە چەند دیمەنێکى شارى هەولێر پێشکەش بە سەرۆکى ژوورى دیاربەکر و شاندى میوان کرا،لە لایەن شاندى میوانیشەوە چەند دیاریەکى تایبەت پێشکەش بە سەرۆکى ژوورەکەمان کرا،وا چاوەڕوان دەکرێت شاندێکى گەورەى هاوبەشى حکومى و بازرگانى لە پێشانگاى ناوبراو وەک ساڵانى پێشوو بەشدارى بکەن.
 

پاش ئەوەى ساڵى رابردوو شاندێکى هاوبەشى بازرگانى لە هەرێمى کوردستانەوە سەردانى وڵاتى ئەردەنیان کرد و لەوێ چاویان بە ژمارەیەک بازرگان و پیاوانى خاوەن کارى عێراقى کە لە ئەنجامى تێکچوونى بارى ئارام وئاسایشى عێراق لە وڵاتانى دەرەوە کارى وەبەرهێنان دەکەن و پاش ژمارەیەک دیدار و چاوپێکەوتن داوایان کرد کە بێنە کوردستان و لێە کارە وەبەرهێنان ئەنجام بدەن بۆ ئەوەى کوردستان ببێتە بنکەیەکى بازرگانى و لە لایەکى تریشەوە سود بە ناوچەکانى ترى عێراقیش بگەیەنێت ،رۆژى شەممە بەروارى 3/5/2008 شاندێکى بازرگان و خاوەن کارى عێراقى سەردانى هەرێمى کوردستانیان کرد و لە لایەن ئەنجومەنى ژوورى بازرگانى و پیشەسازى هەلێرەوە لە هۆڵى نیوسیتى میواندارى کران
لەو میوانداریەدا کە فلاح مسته‌فا بەرپرسى پەیوەندیەکانى دەروەى حکومەتى هەرێم و (نەوزاد هادى)پارێزگارى هەولێر ئامادەیبوون و هەریەکەو بە جیا وتەیەکیان پێشکەش کرد و باسیان لە گرنگى ئەو سەردانەى شاندى میوان کرد و هەوڵ و چالاکیەکانى ژوورى بازرگانى و پیشەسازى هەولێریان بەرز نرخاند لە پتەو کردنى پەیوەندى نێوان بازرگانان و پێشخستنى ئابوورى کوردستاندا.
وە هەروەها سەرۆکى ژوور بە رێز دارا جلیل خەیات لە وتەیەکدا میوانەکانى کرد و ئاماژەى بەوە کرد کە هاتنى ئەو ژمارە زۆرەى بازرگان و خاوەن کارانى عێراقى کە سەرمایەکانیان لە دەرەوەى عێراق بە کار دەهێنن بۆ کوردستان کارێکى مێژوییەو ئایندەى ئەم وڵاتە گەش دەکات و لە داڕووخانى ئابوورى دەیپارێزێت کاتیسَک کە بێنە کوردستان و سود لە بارى ئارام و ئاسایشى هەرێمى کوردستان وەرگرن

...

رۆژى شەممە بەروارى 3/5/2008 لەژێر چاودێرى ریزدار نێچیرڤان بارزانى و بە ئامادەبوونى ( دلشاد عەبدولرەحمان ) وەزیرى پەروەردەى حکومەتى هەرێمى کوردستان و ( تەها بەروارى ) وەزیرى وەرزش و لاوان و ( نەوزاد هادى ) پارێزگارى هەولێر و ( دارا جەلیل خەیات ) سەرۆکى ژوورى بازرگانى و پیشەسازى هەولێر و ژمارەیەک لە بەرپرسانى حیزبى و حکومى لە شارى هەولێر مەراسیمى کردنەوەى کۆمەلگەى ( پەروەردەیى هاوچەرخى شەهید فاخیر مێرگەسوورى ) بەرێوەچوو ، ئەم کۆمەلگا پەروەردەیى یە لە لایەن حکومەتى کۆریا و کۆمپانیاى ( کۆیکا ) وە دروست کراوە و لەلایەن ئەوانەوە لەو مەرسیمەدا پێشکەش بە وەزیرى پەروەردە کرا و لەم کۆمەلگایە خوێندن بە زمانى ئینگلیزیە و بۆ هەموو هاولاتیانم بە خۆرایى و بە بێ جیاوازیە.
وەزیرى پەروەردە لە وتارێکدا ستایشى حکومەتى کۆریاى کرد کە لە رێگەى کۆمپانیاى کۆیکاوە هاوکارى حکومەتى هەرێمى کردووە لە دروستکردنى ئەم کۆمەلگا پەروەردەییە
دواتریش نوێنەرى حکومەتى کۆریا و پارێزگاى هەولێر وتارى خۆیان بەم بۆنەیەوە پێشکەش کرد

 .

بە مەبەستى تاوو توێکردنى چۆنیەتى بەشداریکردنى بازرگانانى کوردستان لە سێیەمین پێشانگاى عێراقى نێودەولەتى کە لە شارى غازى عەنتاب لە تورکیا لە 22-25/5/2008 وەزارەتى بازرگانى عێراقى بە هاوکارى کۆمپانیاى گشتى پێشانگاکانى عهێراق سەر بەوەزارەتى بازرگانى عێراقى و بە هاوکارى کۆمپانیاى فورمى تورکى و سەفارەتى عێراقى لە ئەنقەرە سازى دەکات ، رۆژى چوارشەممە 30/4/2008 ئەنجوومەنى کارگێرى ژوورى بازرگانى و پیشەسازى هەولێر بە ئامادەبوونى سەرۆک و ژمارەیەک لە ئەندامانى ئەنجوومەن لەگەل نوێنەرانى کۆمپانیاى فورمى تورکى ئالیەتى بەشدارى بازرگانانى هەولێرى لە پێشانگاى ئاماژەپێکراو دا تاووتوێ کرد ، لە کۆبوونەوەکەدا کە نوێنەرى ژوورەکانى بازرگانى دهۆک و سلێمانى و کەرکوک و موسڵ ئامادەبوون باس لەو گرفت و ئاستەنگانە کرا کە لە ئیبراهیم خەلیل دەبوە هۆى دواکەوتنى پەرینەوەى بازرگانان بۆ ناو تورکیا بە مەبەستى دانانى ئالیەتێک بۆ ئەوەى ئاسانکارى زیاتر لەو بوارەدا بۆ بازرگانان بەرجەستە بکرێت.
 

باڵیۆزی کرواتیا سه‌ردانی ژووری بازرگانی و پیشه‌سازی هه‌ولێر ده‌کات

رۆژى سێ شەممە بەروارى 29/4/2008 کاتژمیێر 11 ى پێش نیوەرۆ بەرێز ( بیرکۆ ڤۆکاسى ) بالیۆز و سەرۆکى شاندى نێردراوى تایبەتى کرواتیا لە عێراق و شاندى یاوەرى که‌ پێک هاتبوو له‌ جاسم زاهیر راوێژکاری ووڵاتی کرواتیا بۆ په‌یوه‌ندییه‌ ئهابووریه‌کان وه‌ میرۆ سیمیلانکۆ نوێنه‌ری کۆمپانیای ئێنگرای کرواتی بۆ په‌ره‌پێدان و ئاوه‌دانکردنه‌وه‌ سەردانى ژوورى بازرگانى و پیشەسازى هەولێریان کرد و لە لایەن بەرێز ( دارا جەلیل خەیات ) سەرۆکى ژوور و ژمارەیەک لە ئەندامانى ئەنجوومەنى ژوورەوە پێشوازیان لێکرا
لە دیدارەکەدا ڤۆکاسى خۆشحالى خۆى بەو سەردانەى بۆ ژوور دەربرى و هیواى خواست کە سەرۆک و ئەندامانى ژوور سەردانى کرواتیا بکەن بۆ زیاتر پێشکەوتنى پەیوەندیە بازرگانیەکان و روونى کردەوە کە وڵاتەکەى بە نیازە دوو نوسینگەى بازرگانى و پەیوەندى لە هەولێرى پایتەختى هەرێمى کوردستان بکاتەوە تا بتوانن وەک حکومەتى کرواتى کۆمپانیاکانیان بهێننە هەرێمى کوردستان و هاوکارى بکەن لە بنیات نانەوەى عێراق بەگشتى و کوردستان بە تایبەتى .
پاشان باس لەوە کرا کە لە چوارچێوەى رێکخستنى سەردانێکى شاندى باڵاى هەرێمى کوردستان لە ماوەیەکى نزیکى داهاتوودا بۆ کرواتیا پێویستە ژوورى بازرگانى و پیشەسازى هەولێریش نوێنەرى هەبێت و بەشدارى لەو سەردانە بکات تا سوود لە ئەزموونى کرواتیا ببینن و بە چاوى خۆیان پێشکەوتنە ئابوورى و بازرگانیەکانى کرواتیا ببینن.
سەرۆکى ژوور بە ناوى خۆى و ئەندامانى ئەنجوومەنى ژوور سوپاسى بالیۆزى کرواتیاى کرد و هاتنى کۆمپانیا کرواتیەکانیشى بۆ کوردستان بە پێویست زانى و ئەم سەردانەشى بە سەردانێکى مێژوویى وەسف کرد و ئامادەیى خۆشى دەربرى بۆ ئەوەى سەردانى کرواتیا بکەن و لەوێ چاویان بە سەرمایەداران و بازرگانانى کرواتیا بکەوێت .
وە بۆ زیاتر رێزلێنان لە شاندى میوان بۆ خواردنى نانى نیوەرۆ هەمان رۆژ شاندەکە لە هوتێلى شیراتۆن میواندارى کرا.
 

ژوورکەمان ئێوارە خوانێک بۆ شاندێکى چیکى و شاندى ژوورى بازرگانى سوریا ساز دەکات

رۆژى دووشەممە بەروارى 21/4/2008 ئەنجومەنى کارگێڕى ژوورى بازرگانى و پیشەسازى هەولێر لە ئێوارە خوانێکدا لە ئوتێلى خانزاد میواندارى باڵیۆزى چیک لە عێراق بەڕێز (پیتەر فۆز نیستا) و بەڕێز (جۆزێف)بەرپرسى ئۆفیسى رۆژهەڵاتى ناوەڕاست و باشورى ئەفریقا کرد، کە هاوکات شاندى ژوورى بازرگانى و پیشەسازى وڵاتى سوریاش ئامادەى ئەو ئێوارە خوانە بوون .
لە گفت و گۆکانى نێوان ئەندامانى ئەنجومەنى ژوورەکەمان و میوانەکاندا قسەو باس کرا لە سەر رێکخستنى پەیوەندى بازرگانى و پیشەسازى و ئابوورى نێوانیان بە تایبەت لە رووى ئاشناکردنى بازرگانان و سەرمایەدارانى کوردستان و چیک بە یەکترى و سود وەرگرتن لە بارى ئارام و ئاسایشى کورستان بۆ وەبەرهێنەرانى ناوخۆ و بیانى .
 

ئەنجوومەنى ژوور بەشدارى لە مەراسیمى بە فەرمى کردنى دەروازەى سنوورى حاجى ئۆمەران دەکەن

رۆژى 15/4/2008 شاندێکى ئەندامانى ئەنجوومەنى کارگێرى ژوورەکەمان کە پێک هاتبوو لە مستەفا محمد خضر و باقى محمد هادى و تاهر مولود مستەفا و ماجد جلال خلیل بەشداریان لە مەراسیمى بەفەرمى کردنى دەروازەى سنوورى حاجى ئۆمەران دا کرد.
مەراسیمەکە بە بەشدارى نەوزاد هادى پارێزگاى هەولێر و نوێنەرى وەزارەتەکانى ناووخۆ و بازرگانى و دارایى حکومەتى هەرێمى کوردستان و بەرپرسى پەیوەندیەکانى حکومەتى هەرێم لە تاران ، هەردوو قایمقامى سۆران و چۆمان وەک شاندى کوردستانى و لایەنى ئێرانیش لە دانایى فەر نوێنەرى سەرۆک کۆمارى ئێران و د. جەعفەرى نوێنەرى رابەرى شۆرشى ئیسلامى ئێران و د. قوربانى پارێزگارى ورمآ و بریکارى وەزارەتى دەرەوە و فەرماندارى خانآ و بەرپرسانى قونسولگەرى ئێران لە هەولێر و سلێمانى و جەماوەرێکى زۆرى خانآ و چۆمان بەرێوەچوو .
بەفەرمى کردنى دەروازەى ئەو سنوورە خزمەتێکى گەورە پێشکەش بە بە بوارى بازرگانى لەنێوان هەرێمى کوردستان و کۆمارى ئیسلامى ئێران دەکات لەهەمان کاتیشدا فیزا بۆ خەلکى کوردستان دەستەبەر دەکات و پەیوەندیەکانى نێوان هەردوولا دەباتە قۆناغێکى تازەوە ، وا چاوەروان دەکرێت ئوتومبێلە بارهەلگرەکان لە شێوەى تراتنزێت بێنە هەرێمى کوردستان و بگەرێنەوە.
 

سکرتێرى یەکەمى بازرگانى وەبەرهێنان لە بالیۆزخانەى سوید لە عێراق سەردانى ژوور دەکات

بە مەبەستى وەرگرتنى زانیارى دەربارەى پێداویستیەکانى کوردستان لە بوارى وەبەرهێناندا رۆژى یەکشەممە 13/4/2008 عێام ێالح سکرتێرى یەکەمى بازرگانى و وەبەرهێنان لە بالیۆزخانەى سویدى لە عێراقدا سەردانى ژوورى کرد و لە لایەن فداءالدین گەردى و ژمارەیەک لە ئەندامانى ئەنجوومەنى کارگێرى ژوور پێشوازیکرا.
دواتر ناوبراو مەبەست و ئامانجى سەردانەکەى روون کردەوە ، هەروەها ووتى من بەرپرسى پەیوەندیەکانى پرۆژە هاوبەشەکانى کوردستان و سویدم .
فداءالدین گەردى ئەندامى ئەنجوومەنى کارگێرى ژوورەکەمان گەلێک دەرفەتى وەبەرهێنان و پێداویستیەکانى کوردستانى لە بوارى جیاجیادا بۆیان روون کردەوە ئامادەیى ژووریشى نیشاندا بۆ پێشکەش کردنى هەرجۆرە هاوکاریەک لە پێناو خزمەت گەیاندن بە رەوشى ئابوورى هەرێمى کوردستان و سوید .
 

لە درێژەى هەوڵەکانى بۆ ره‌خساندنی هه‌لی کار وەفدێکى ژوورەکەمان سەردانى بنکەى مەشقى پیشەیى زەیتونى کۆریاى باشوریان کرد

پاش ئەوەى وەفدێکى بنکەى مەشقى زەیتونى کۆریاى باشور هه‌فته‌ی رابردوو سەردانى ژوورى بازرگانى و پیشەسازى هەولێریان کرد رۆژى سێ شەممە 8/4/2008 لە سەر بانگهێشتى بنکەکە وەفدێکى ژوورەکەمان کە پێک هاتبوو لە بەڕێز (دارا جلیل خەیات)سەرۆکى ژوور و ژمارەیەک لە ئەندامانى ئەنجومەنى ژوور سەردانى بنکەى ناوبراویان کرد لە شارى هەولێر و لە لایەن (پارک موون) فەرماندەى بنکەکە و ژمارەیەک لە ئەندامان و مامۆستایان و شارەزایانى کار لەو بنکەیە پیشوازیان لێ کرا.
لە سەرەتاى سەردانەکەدا بنکەى زەیتوون چەند وێنەیەکى دیکۆمێنتیان نمایش کرد کە هه‌ندێ لە چالاکى و کارەکانى بنکەکەى دەگرتە خۆى ،
پاشان سەرۆک و ئەندامانى ژوورى بازرگانى و پیشەسازى هەولێر یەک بە یەک بەشەکانى بنکه‌که‌ پیشەیى وەکو(کۆمپیوتەر و لێخوڕینى ئامێرى قورس و سوک) و هەروەها بەشى چاککردنەوەى ئامێرە کارەباییەکانى وەک (ساردکەرەوەکان و مۆلیدە)و بەشى هەویرکاریان بە سەر کردەوە .لە کۆتایى سەردانەکەشدا (پارک موون) روونى کردەوە کە مەبەستى لەم بانگهێشتەى ئه‌نجوومه‌ن ژوور ئەوە بووە کە لە نزیکەوە بە چاوى خۆیان بەشەکان ببینن و سەرنج و تێبینیەکانیان بخەنە روو ئەمەش لە بەر ئەوەى کە حکومەتى هەرێمى کوردستان  دەرچووانى مەشق و راهێنانەکانى ئەوان لە فەرمانگەکاندا دانامەزرێنێ هەربۆیە روویان کردۆتە کەرتى تایبەت و بۆ ئەم مەبەستەش ژوورى بازرگانى و پیشەسازى هەولێریان بە باشترین هاوکار زانیوە ،
دواتریش سەرۆکى ژوور هەموو هاوکاریەکى بۆ بنکەى مەشقى پیشەیى زەیتوون دووپات کردەوە لە گەڵ ئەوەى کە پێشنیارى ئەوەى کرد کە پێویستە بنکەکە مەشقەکانیان لە چەند بوارێکدا چڕ بکەنەوە کە کەرتى تایبەت بتوانێت سودى لێ ببینێت تا ژوورەکەشمان بتوانێت هاوکاریان بێت و کار بۆ دەرچوانى ئەو خولانە بدۆزێتەوه‌. بۆ ئەم مەبەستەش رایگەیاند کە دەتوانن ئەوانەى فێرى بوارەکانى کۆمپیوتەر یان لێخوڕینى ئامێرەکان دەکرێن لە کەرتى تایبەت سودمەند بن بەڵام ناتوانن هاوکارى کەسانێک بکەن کە لە بوارى هەویرکارى بڕوانامە بە دەست دێنن ،وە بڕیاریشە ژوورەکەمان لیستێک به‌ ناوى گرنگترین کۆمپانیاکانى کوردستان بداتە بنکەى مەشقى زەیتوون ئەمەش لە پێناوى رەخساندنى هەلى کار بۆ ئەو کەسانەى کە بەشدارى دەکەن لە خولى راهێنانى ئەو بنکەیەدا .
 

شاندێکى سەنتەرى بازرگانى جیهانى سەردانى ژوورى بازرگانى و پیشەسازى هەولێریان کرد

رۆژى یەک شەممە بەروارى 7/4/2008 (جۆن دیکسۆن)سەرۆکى وەفدى (ئاشتى و ئارامى لە ڕێگەى بازرگانیەوە) لە سەنتەرى بازرگانى جیهانى بە یاوەرى لە گەڵ (داسکۆ شێروانى )بەڕێوەبەرى کاروبارى دەرەوەى کومەتى هەرێمى کوردستان لە ئەمریکا سەردانى ژوورى بازرگانى و پیشەسازى هەولێریان کرد و لە لایەن سەرۆک و ژمارەیەک لە ئەندامانى ئەنجومەنى کارگێڕى ژوورەوە بە گەرمى پێشوازیان لێکرا ،
لە دانێشتنێکدا باسیان لە مەبەست و ئامانجى سەردانەکەیان کرد و تەواوى ئەو کارو خزمەتانەى کە دەتوانن پێشکەش بە رەوشى بازرگانى بکەن لە جیهان بەگشتى و هەرێمى کوردستان بە تایبەتى خستیانە روو ،
وە هەروەها (دیکسۆن)ئەوەشى روون کردەوە کە دەکرێت بازرگانانى هەولێر هەماهەنگى لە گەڵ سەنتەرى بازرگانى جیهانى بکەن بە مەبەستى کردنەوەى ئۆفیسَیک لە شارى هەولێر هەروەک چۆن سەنتەرەکەیان لە زۆربەى وڵاتانى دنیادا ئۆفیسیان هەیە بۆ ئەوەى بتوانن زیاتر خزمەت بە بارى ئابوورى و بازرگانى هەرێمى کوردستان بکەن و دەروازەى بە رووى هەموو جیهاندا بکەنەوە ..

ئەنجومەنى ژوور لە گەڵ شاندێکى کۆریدا باس لە پتەو کردنى پەیوەندیەکانى نێوانیان دەکەن

رۆژى پێنج شەممە بەروارى 3/4/2008 سەرۆک و ژمارەیەک لە ئەندامانى ئەنجومەنى کارگێڕى ژوور پێشوازیان لە شاندێکى کۆریاى باشور کرد
لە دانیسشتنێکدا باس لە دانانى بنەمایەک بۆ پەیوەندى و ئالیەتى بەرەو پێش بردنى ئەو پەیوەندیانە لە نێوان هەرێمى کوردستان و کۆریاى باشور لە رێگەى بازرگان و وەبەرهێنەرانەوە کرا و جەختى لە سەر کرایەوە
پاشان بەڕێز (دارا جلیل خەیات )سەرۆکى ژوور باسى لە دەرفەتەکانى وەبەرهێنان کرد و ئامادەیى خۆشیان بۆ هاوکارى کردنیان خستە روو ، داواى کرد کە وەبەرهێنەر و کۆمپانیا کۆریەکان هەوڵى وەبەرهێنان بدەن لە کوردستان.
لە درێژەى گفت و گۆکانیشیاندا ژوورى بازرگانى و پیشەسازى هەولێر پێشنیازیان کرد کە لە رێگەى حکومەتى کۆریەوە کۆمەڵگایەکى تایبەت بە بەرهەم و کاڵاى کۆرى لە کوردستان بکرێتەوە بۆ ئەوەى ببێتە کەناڵێکى گرنگى پەیوەندى لە نێوان بازرگانان و پیشەسازان و هەرێمى کوردستان و وڵاتى کوریاى باشوردا.

ژوورى بازرگانى هەولێرو بنکەى مەشقى پیشەیى زەیتوون هەوڵ بۆ رەخساندنى هەلى کار دەدەن

رۆژى سێ شەممە بەروارى 1/4/2008 وەفدێکى بنکەى مەشقى پیشەیى تیپى زەیتوونى کۆرى لە هەولێر کە پێکهاتبوون لە بەڕێز(پارک موون_کیو) فەرماندەی بنکە و ژمارەیەک لە هاوکارەکانى سەردانى ژوورى بازرگانى و پیشەسازى هەولێریان کرد و لە لایەن بەڕێز (دارا جلیل خەیات) سەرۆکى ژوور و ژمارەیەک لە ئەندامانى ئەنجوومەنى کارگێڕى ژوور پێشوازیان لێ کرا.
لە دانیشتنێکدا پارک موون باسى لەوە کرد کە ماوەى 4 مانگە هاتوونەتە کوردستان و 6 مانگ لە کوردستان دەمێننەوە و یەکێک لە ئەرکەکانى ئەم بنکەیە ئەوەیە کە خولى فێربوون لە بوارەکانى فێربوونى شۆفێرى ئامێرە تایبەتى و ئامێرە قورسەکان وە هەروەها فێربوونى بەرنامەکانى کۆمپیوتەر و چاککردنەوەى کۆمپیوتەر و کردنەوەى خول بۆ ئافرەتان لە بوارى هەویرکاریدا کە بۆ راپەڕاندنى ئەم کارانە پیوەندیان لە گەڵ وەزارەتى کارى حکومەتى هەرێمدا هەیە بەڵام پاش تەواو بوونى خولەکان و پێدانى بڕوا نامە بەو قوتابیانە لایەنێک نیە رێپیشاندەر بێت تا ئەو کەسانەى سودیان لە ئەزموون و شارەزایى مامۆستایانى تیپى زەیتوون وەرگرتووە لە شوێنى شیاودا دابنرێن و سود بە هەرێمى کوردستان بگەیەنن بۆیە داواى لە ژوورى بازرگانى کرد کە بۆ ئەو مەبەستە هاوکاریان بکات ئەمە جگە لەوەى کە رۆڵى ژوورى بازرگانى هەولێرى لە پتەوکردنى پەیوەندیە بازرگانیەکان لە گەڵ وڵاتى کۆریا و هەروەها بەرەو پێشبردنى ئاستى ئابوورى لە کوردستان بەرز نرخاند وە سەرجەم کارەکانى ژوورەکەمانى بە ئیجابى وەسف کرد
پاشان سەرۆکى ژوور سوپاسى هەوڵ و ماندوو بونى تیپى زەیتوونى کۆریاى کرد بۆ ئەو هەوڵانەى کە بۆ پێشخستنى هەرێمى کوردستان دەیدەن و لە هەمانکاتدا کۆمەڵێک کارو چالاکى ژوورى خستە ڕوو وە باسى لەوەش کرد کە زۆر کارى ئەکادیمى و قورس هەیە کە پێویستمان بەوە هەیە لایەنێکى وەک تیپى زەیتوون خولى راهێنانى لەم جۆرە بکەنەوە.
پاشان لە لایەن ئەندامانى ژوورەوە پێشبینى ئەوە کرا کە بنکەى مەشقى پیشەیى زەیتوون لیستى چەند ناوێک بداتە ژوورەکەمان تا ئەمانیش لە لایەن خۆیانەوە هەلى کار بۆ ئەو کەسانە بڕەخسێنن کە لە لایەن ئەو بنکەیەوە بڕوانامەیان پێ دەدرێ لە کۆتایى دانیشتنەکەشدا سەرۆکى ژوور وێناەى منارەى چۆلى هەولێرى پێشکەش بە فەرماندەى بنکەى پیشەیى کرد لە گەڵ چەند دانەیەک لە (رێبەرى بازرگانى و پیشەسازى هەولێر) کە ناوى بازرگانان و پیشەسازانى هەولێر لە خۆ دەگرێت بە مەبەستى وەرگرتنى زانیارى پێویست لە سەریان هاوکات لۆگۆى ژوورەکامانیشیان پێشکەش کرا
 

شاندێکی وه‌زاره‌تی شه‌هیدان و ئه‌نفالکراوه‌کان و ده‌سته‌ی وه‌به‌رهێنان سه‌ردانی ژووری بازرگانی و پیشه‌سازی هه‌ولێر ده‌که‌ن

رۆژى دووشەممە بەروارى 31/3/2008وەفدێکى وەزارەتى شەهیدان و کاروبارى ئەنفالکراوەکانى حکومەتى هەرێمى کوردستان کە پێک هاتبوو لە بەڕێزان (هەڤاڵ رحمان)بەڕێوەبەرى گشتى وەبەرهێنان و پرۆژەکان و لەنجە دزەیى و شێخ کامل راوێژکارانى وەزارەت سەردانى ژوورى بازرگانى و پیشەسازى هەولێریان کرد و لە لایەن سەرۆک و ژمارەیەک لە ئەندامانى ئەنجومەنى ژوورەوە پێشوازیان لێ کرا
لە دانیشتنێکدا وەفدى میوان باسیان لە یاساى سندوقى هاوکارى کەس و کارى شەهیدان و ئەنفالکراوەکان کرد کە لە لایەن پەرلەمان و حکومەتى هەرێمى کوردستانەوە متمانەى پێکراوە وە بڕیارە لە نیوەى یەکەمى مانگى نیساندا ئەو پرۆژەیە لە ژێر چاودێرى رێزدار (نێچیرڤان بارزانى)سەرۆکى حکومەت و بە ئامادەبوونى بازرگانان و خاوەن کۆمپانیا و کەسانى خێرخواز دەست پێبکات وئەو سندوقە بکرێتەوە .
وەفدى میوان روونیان کردەوە کە یەکەم شوێن سەردانیان کردووە بۆ ئەوەى هاوکارییان بکەن ژورى بازرگانى هەولێرە کە متمانەى تەواویان پێ ى هەبووە تا بتوانن زیاتر خزمەت بە خەڵکى لێقەوماوى کوردستان بکەن وە هەروەها باسیان لەوە کرد کە پێویستە لەو سندووقەدا ژوورە بازرگانیەکانى سەرجەم شارەکانى کوردستان نوێنەریان هەبێت ئەمە جگە لەوەى کە داوایان لە ژوورەکەمان کرد کە ناوى نزیکەى 30-35 خاوەن کۆمپانیایان دەوێت تاوەکو ئامادەى مەراسیمەکە بن .
پاشان بەڕێز دارا جلیل خەیات باسى لەوە کرد کە ژوورى بازرگانى و پیشەسازى هەولێر پێشتریش لە هەموو حاڵەتەکاندا هاوکارى خەڵکى کوردستانى کردووە هاوکارى بۆ خەڵکى لێقەوماوى شەنگالیشى بە نمونە هێنایەوە و هەمووهاوکارى و پشتگیریەکى خۆشى بۆ کەسو کارى شەهید و ئەنفالکراوەکان دوو پات کردەوە
پاشان ئەندامانى ژوور گفت و گۆیەکى تێروتەسەلیان لە گەڵ وەفدى میوان کرد و هیوایان خواست کە ئەم سندوقى هاوکاریە ببێتە سندوقێکى جیهانى هەروەک چۆن کارەساتى ئەنفال بە جیهان ناسراوە هەرواش بتوانرێ کۆمەک و هاوکارى لە خەڵکى جیهان بۆ کەسو کارى ئەنفالکراوەکان کۆ بکرێتەوە
 

سه‌رۆک و ژماره‌یه‌ک له‌ ئه‌ندامانی ئه‌نجوومه‌نی ژوور پێشوازیان له‌ به‌رێوه‌به‌ری گشتی کۆمپانیای هیوندای کرد

رۆژى چوار شەممە بەروارى 26/3/2008 بەڕێز (لی یونک جول)بەڕێوەبەرى گشتى کۆمپانیاى هیونداى تایبەت بە ئەندازە و بنیاتنانى سنوردار بە یاوەرى (جلیل حبیب عبداللە) لە بەشى کاروبارى گشتى لە هەمان کۆمپانیا سەردانى ژوورى بازرگانى و پیشەسازى هەولێریان کرد و لە لایەن بەڕێز (دارا جلیل خەیات)سەرۆکى ژوور و ژمارەیەک لە ئەندامانى ئەنجوومەنى کارگێڕى ژوور پێشوازیان لێ کرا.
لە دانیشتنێکدا هەردوولا باسیان لە پتەو کردنى پەیوەندیەکانى نێوانیان کردو ئاواتەخواز بوون کە لە ماوەکانى داهاتوودا بتوانن هەلى زیاتر بڕەخسێت بۆ بەرەو پیشبردنى ئەو پەیوەندیانە.
پاشان سەرۆکى ژوور دەستخۆشى خۆى بۆ بەڕێوەبەرو ستافى کارى کۆمپانیاى هیونداى دەربڕى بۆ ئەو کارانەى کە پێشکەشى دەکەن وە لە هەمان کاتدا هیواى خواست کە گرنگى زیاتر بە هەرێمى کوردستان بدەن کە تینووى پێشکەوتنەو بارو دۆخیش بۆ ئەو مەبەستە گونجاوە ،
(یونک جول)یش لە لاى خۆیەوە مەبەستى سەردانەکەى روون کردەوە کە دەیویست داتا و ژمارەیەک لە سەر گرنگترین و بەناوبانگترین ئەو کۆمپانیایانەى لە هەرێمى کوردستان کاردەکەن وەرگرێت تا بتوانێت وەکو کۆمپانیاى هیونداى کۆرى هاوکاریان بێت لە پێشخستنى بوارى ئابوورى لە کوردستاندا
سەرۆکى ژووریش هەموو هاوکارى و پشتیوانیەکى خۆى بۆ دووپات کردەوە و بڕیارە لە ماوەکانى داهاتوودا بۆ ئەو مەبەستەو بۆ پتەو کردنى پەیوەندى نێوان هەردوو لا دیدارى زیاتر ساز بدەن .
 

سه‌رۆکی ژوور بۆ ئاژانسی هه‌واڵی ئیخڵاسی تورکی : ئه‌گه‌ر بێت و بارگرژی سیاسی نێوان تورکیا و ئێراق زیاتر ته‌شه‌نه‌ بسه‌نێت پێئه‌چێت زیان به‌ په‌یوه‌ندی بازرگانی نێوانمان بگه‌یه‌نێت

رۆژى دوو شەممە بەروارى 24/3/2008 بەڕێز (دارا جلیل خەیات)سەرۆکى ژوورى بازرگانى و پیشەسازى هەولێر لە بارەگاى ژوور وەڵامى چەند پرسیارێکى گرنگى (ئاژانسى هەواڵى ئیخلاێى)تورکى دایەوە سەبارەت بە بارودۆخى سیاسى نێوان تورکیا و عێراق و پەیوەندى بە بارى بازرگانیەوە لە هەرێمى کوردستاندا.
لە چاوپێکەوتنێکى تەلەڤزیۆنیدا لە گەڵ ئەو ئاژانسە سەرۆکى ژوور رایگەیاند کە تا ئێستا پەیوەندیە ئابوورى و بازرگانیەکانى نێوان حکومەتى هەرێم و تورکیا زۆر باشەو هیواى خواست کە زیاتر بەرەو پێش بڕوات لەو سەروبەندەى کە ئێستا ژمارەیەکى زۆر لە کۆمپانیاى تورکى لە هەرێمى کوردستان بە تایبەتى لە بوارەکانى رێگاوبان و بیناسازى کاردەکەن و تا ئێستا کێشەیەکى ئەوتۆ رووبەڕوو نەبوەتەوە لە هەمان کاتدا هیواى خواست کە ئەو بارگرژیەى کە ئیسَتا لە نیوان تورکیا و عێراقدا لە ئارادایە بە رێگەى ئاشتیانە چارەسەر بکرێت وە وتیشى ئەگەر بێت و لەوە زیاتر ئەو بارگرژیە تەشەنە بسێنێت پێئەچێت زیان بە پەیوەندى بازرگانى نێوان هەردوولا بگەیەنێت وە دوا پەیامیشى بۆ خەڵک و بازرگانانى وڵاتى تورکیا ئەوەبوو کە هەرێمى کوردستان دەرگاى ئاوەڵایە بە رووى بەرهەمهێنەرانى وڵاتى تورکیادا کە دەتوانن بێن و لە پێشخستن و ئاوەدانکردنەوە ى هەرێمدا رۆڵى کارا بگێڕن


 

رۆژى دوو شەممە بەروارى 24/3/2008 رۆژنامەنوسێکى یابانى بە ناوى (واتاناب ساتۆرن)لە ژوورى بازرگانى و پیشەسازى هەولێر چاوپێکەوتنێکى لە گەڵ بەڕێز (دارا جلیل خەیات)سەرۆکى ژوور سازدا و لە وەڵامى پرسیارەکانى ئەو رۆژنامەنوسەدا سەرۆکى ژوور باسى لە بارى ئارام و ئاسایشى هەرێمى کوردستان و پەیوەندى بە کارى بازرگانى و وەبەرهێنانەوە کرد ، وە هەروەها رایگەیاند کە حکومەتى یابانى بە پێ ى پێویست نەیتوانیوە لە کوردستان رۆڵى هەبێ لە ئەنجامدانى کارى وەبەرهێنان و بابەتە بازرگانیەکاندا لە کاتێکدا زۆرێک لە وڵاتانى پێشکەوتووى جیهان لە هەرێمى کوردستاندا کونسوڵگەریان کردۆتەوە و ژمارەیەکى زۆرى کۆمپانیاکانیشیان ناردوە تا کارى وەبەرهێنان و بازرگانى ئەنجام بدەن ، وە لە کۆتایدا سەرۆکى ژوور دوو تابلۆى کردە دیارى بۆ ئەو رۆژنامە نوسە یابانیە کە یەکێکیان وێنەى مزگەوتى بەناوبانگى (جەلیل خەیات) بوو لە شارى هەولێر و ئەوى تریان وێنەى منارەى چۆلى و پارکەکەى بوو بۆ ئەوەى خەڵک و میللەتى یابانى لە رێگەى ئەو وێنانەوە بە بیرو باوەڕو کلتورى کوردى ئاشنا بن

سه‌رۆک و ژماره‌یه‌ک له‌ ئه‌ندامانی ئه‌نجوومه‌نی کارگێری ژوور پێشوازیان کرد  له‌ سه‌رۆکی ئۆفیسی بالیۆزخانه‌ی کۆریای باشوور له‌ هه‌ولێر

رۆژى یەک شەممە بەروارى 16/3/2008 سەرۆک و ژمراەیەک لە ئەندامانى ئەنجومەنى کارگێڕى ژوور لە ژوورى بازرگانى و پیشەسازى هەولێر پێشوازیان لە بەڕێز(یونجو کۆ )سەرۆکى ئۆفیسى سەفارەتى کۆریا لە هەولێر کرد
سەرەتا دارا جلیل خەیات دواى بە خێر هێنانى خۆشحاڵى خۆى بۆ ئەو سەردانەى بەڕێزیان دەربڕى باسى لە پەیوەندى نێوان هەرێمى کوردستان و کۆریاى باشوور کرد ئاماژەى بە هەندێ لەو کارو خزمەتگوزاریانە کرد کە حکومەتى کۆریا پێشکەش بە هەرێمى کوردستانى کردووە
پاشان بەڕێز (یونجو) جەختى لە سەر هەوڵدانى زیاتر بۆ بەرەو پێشبردنى پەیوەندى ئابوورى لە نێوان هەرێمى کوردستان و کۆریا کردەوە بەهۆى سەفەرى ئەم دواییەى رێزدار (نێچیرڤان بارزانى) بۆ کۆریاو ئیمزاکردنى یاداشتنامەیەک لە گەڵ لایەنى کۆریدا بە پاڵپشتێکى گرنگ دانا بۆ بەرەو پێشبردنى ئەم پەیوەندیە کە دەبێتە هاندەر بۆ کۆمپانیا کۆریەکان بۆ وەبەرهێنان لە کوردستان بە تایبەت لە بوارى نەوت و کشت و کاڵ و کارەبادا

بەڕێز (دارا جلیل خەیات) سەرۆکى ژوورى بازرگانى و پیشەسازى هەولێر و ژمارەیەک لە ئەندامانى ئەنجومەنى ژوور رۆژى پێنج شەممە بەروارى 13/3/2008 لە بارەگاى ژوور پێشوازیان لە (مایکڵ مۆیڵ)گەورە وەبەرهێنەرى ئەمریکى و شاندى یاوەرى کرد سەرەتا سەرۆکى ژوور باسى لە دەرفەتەکانى وەبەرهێنان لە هەرێمى کوردستان کرد وە ئاماژەى بە بوارى کشت و کاڵى و گەشت و گوزار و دروستکردنى ئوتێل دا
دواتر(مۆیڵ)باسى لە پێشینەى بوارى کاردنى و کەسایەتى خۆى و بنەماڵەکەى کرد وە مەبەستى سەردانەکەى بۆ کوردستان روون کردەوە و باسى لەو لایەنانە کرد کە جێگەى بایەخ پێدانن وە وا چاوەڕوان دەکرێت ناوبراو بەم زووانە جارێکى تر سەدانى کوردستان بکاتەوە و بۆ ماوەى چەند رۆژێک بمێنێتەوە بە مەبەستى ئەنجامدانى چەند پرۆژەیەک هەر بەو هۆیەوە داواى هاوکارى لە ژوورى بازرگانى و پیشە سازى هەولێر کرد سەرۆکى ژووریش لە مەرامبەردا ئامادەیى خۆى نیشاندا بۆ پێشکەشکردنى هەموو جۆرە هاوکاریەک لە پێناو خزمەت گەیاندن بە بوارى ئابوورى و پرۆسەى ئاوەدانکردنەوە لە هەرێمى کوردستاندا

ئەنجوومەنى ژوور پێشوازى لە شاندێکى کۆمپانیاى رۆژهەلاتى ناوین

ئەنجوومەنى ژوور پێشوازى لە شاندێکى کۆمپانیاى رۆژهەلاتى ناوین بۆ ( راوێژکارى کاروبارى بازرگانى و هەماهەنگى کردن ) کرد کە پێک هاتبوو لە ( ابتهال الجمل ) شاندی یاوه‌ری، بە مەبەستى دارشتنى بەرنامەیەک بۆ ئامادەکردنى ژمارەیەک لە وەبەرهێنەرانى میسرى بۆ گفتوگۆکردن لەگەل ئەو شاندە بازرگانیەى کە چاوەروان دەکرێت لە ئایندەیەکى نزیکدا سەردانى میسر بکات بۆیە لەو کۆبونەوەیە باس لە دەرفەتەکانى وەبەرهێنان لە هەرێمى کوردستان کرا و ئەو شاندەى کە دەچێتە میسر پێویستى بە چ جۆرە وەبەرهێنەر و بازرگانێک دەبێت تا شاندى میوان لەوێ ئامادەباشى بۆ بکات بۆیە ئەندامانى ئەنجومەن هەریەکە باسى لە خۆى و ئەو بوارە کرد کە ئیشى تێدا دەکات لە کۆتایى شاندى میوان خۆشحاڵى خۆى بۆ ئەو پێشوازیە دەربرى و ئامادەیى خۆى بۆ هاوکارى کردن و هەماهەنگى لەگەل ژووردا دەربڕى

سەرۆکى ژوور و ژمارەیەک لە ئەندامانى ئەنجوومەنى کارگێرى پێشوازیان کرد لە خاتوو ( ئان سمیچ )

دارا جەلیل خەیات سەرۆکى ژوور و ژمارەیەک لە ئەندامانى ئەنجوومەنى کارگێرى پێشوازیان کرد لە خاتوو     ( Ann Schmidt ) سکرتێرى گشتى رێکخراوى ( Care4You ) بۆ راکێشانى وەبەرهێنەرانى بیانى و دۆزینەوەى بریکار بۆ کۆمپانیا بیانیەکان
لە دانیشتنێکدا باس لە ئالیەتى هەماهەنگى کردن لە نێوان ژوور و رێکخراوى ناوبراودا کرا..

سه‌رۆک و ژماره‌یه‌ک له‌ ئه‌ندامانی ئه‌نجوومه‌نی ژوور میوانداری بالیۆزی ژاپۆنیان له‌ عێراق کرد.

.
ئەندامانى ژوورى بازرگانى و پیشەسازى هەولێر میوادارى بەڕێز (کینجیرۆ مۆنجى) باڵیۆزى وڵاتى ژاپۆن لە عیراق و ژمارەیەک لە هاوکارەکانى و بەڕێز فەلاح مسته‌فا بەرپرسى نوسینگەى پەیوەندیەکانى دەرەوەى حکومەتى هەرێمى کوردستانیان کرد
لەو ئێوارە خوانەدا سەرەتا (دارا جەلیل خەیات) سەرۆکى ژوورى بازرگانى و پیشەسازى هەولێر بەخێرهاتنى کردن و ئاماژەى بۆ ئەو دڵسۆزى و هاوکاریە کرد کە وڵاتى یابان بەرامبەر بە حکومەتى هەرێمى کوردستان پێشکەشى کردوە لە پێناو بەرەو پێشبردنى هەرێمى کوردستاندا و وە باسى لە ئەزموونى تەکنۆلۆژى و پێشکەوتووى وڵاتى یابان کرد کە لەوێوە دەتوانن هاوکارى زیاترى حکومەتى هەرێم بکەن تا ڕەوتى پێشکەوتنى هەرێمەکەمان زیاتر بەرەو پێشەوە بڕوات پاشان باڵیۆزى وڵاتى یابان باسى لە پەیوەندیەکانى نێوان حکومەتى هەرێمى کوردستان و وڵاتى یابان کرد وە جەختى لە سەر ئەوەش کردەوە کە حکومەتى یابانى بە هەموو شێوەیەک ئامادەیە هاوکارى حکومەتى هەرێمى کوردستان بکات بۆ پشتگیرى کرنى ئەزموونى سەرکەوتووى حکومەتى هەرێم وە ئامادەیى دەربڕى لە بەخشینى یارمەتى مرۆیى یابانى بۆ عێراق وە وتیشى کە یابان ئامادەیە هاوکارى حکومەتى هەرێم بکات چ وەک ئەنجامدانى پرۆژەى خزمەتگوزارى و وەبەرهێنان و چ لە ڕووى پێدانى قەرزەوە ئەمە جگە لەوەى کە وڵاتى یابان هەوڵى سەقامگیرى ئەمن و ئاسایشى داوە لە عێراق ئەویش لە ڕێگەى ناردنى هێزى سەربازى بۆ ئەم وڵاتە وە هەروەها باڵیۆزى وڵاتى یابان رایگەیاند کە ئامادەیە هانى کۆمپانیاکان و بازرگانانى وڵاتەکەى بدات تا بتوانن بێن لە کوردستان کارى وەبەرهێنان بکەن و ئەزموونى سەرکەوتووى خۆیان بۆ ئێرەش بگوازنەوە .
 

سەرۆک و ژمارەیەک لە ئەندامانى ئەنجومەنى کارگێڕى ژوور پێشوازیان کرد له‌  جێگرى کونسوڵى بەریتانیا لە هه‌رێمی کوردستان

رۆژى چوارشەممە 5/3/2008 کاتژمێر 10 ى سەرلەبەیانى سەرۆک و ژمارەیەک لە ئەندامانى ئەنجومەنى کارگێڕى ژوورى بازرگانى و پشەسازى هەولێر پێشوازیان کرد لە بەڕێز رۆبێرت راندۆلف جێگرى کونسوڵى بەریتانیا لە هه‌رێمی کوردستان
لە دیداریکدا کە زیاتر لە کاتژمێرێکى خایاند لە سەرەتاى دیدارەکەدا بەڕێز دارا جلیل خەیات سەرۆکى ژوور بە خێرهاتنى جێگرى کونسوڵى بەریتانیاى کرد بۆ ژوورى بازرگانى و پیشەسازى هەولێر و وە باسى لەوە کرد کە حکومەت و گەلى بەریتانی لە ساڵى 1991 ەوە پارێزگارى لە خاکى هەرێمى کوردستان کردووە و هەوڵى داوە بۆ گەشە سەندن و بەرەو پێش چوونى ئەم ناوچەیە وە وتى هیوا دارم کە لەمەو دوا زیاتر هاوکارى بکەن بۆ بەرەو پێش بردنمان لەى سەرجەم بوارەکاندا بە تایبەت لە بوارى ئابوورى بازرگانى
دواتر رۆبێرت راندۆلف مەبەستى سەردانەکەى روون کردەوە کە دەیەوێ سود لە ئەزموونى کارى بازرگانان و خاوەن سەرمایەکان وەربگرێت تا بتوانێ کێشە ئابوورى و بازرگانیەکان دەست نیشان بکات و بە هاوکارى لە گەڵ لایەنەکانى تر هەوڵى چارەسەرکردنیان بدات
دواتر سەرۆک و ئەندامانى ژوور بە پێ ى ئەو ئەزموونو شارەزایى یەى کە هەیانە لە بوارى ئابوورى و بازرگانى دا دەیان سەرنج و تێبینى و پێشنیارى بەپێز و سودمەند بە ئابوورى هەرێمى کوردستانیان خستە بەردەم جێگرى کونسوڵى بەریتانیا لە هه‌رێمی کوردستان


 

 
رۆژى شەممە بەروارى 17/2/2008 دارا جلیل خەیات سەرۆکى ژوورى بازرگانى و پیشەسازى هەولێر لە نوسینگەى خۆى چاوپێکەوتنێکى لە گەڵ کەناڵى ئاسمانى تەلەڤزیۆنى (السومریە)سازکرد لە وەڵامى چەند پرسیارێکى کەناڵى ناو براو سەبارەت بە بۆرسەى کوردستان و بازارى کاغەزە دارایى یەکان سەرۆکى ژوور باسى لە گرنگى ئەو بۆرسەیە کرد لە بنیات نان و بەرەو پێش بردنى ئایندەیەکى ئابوورى گەش و هەروەها لایەنە ئابوورى و بازرگانیەکان چالاک دەکات وە هەروەها بەرَێز دارا جلیل خەیات رایگەیاند کە ئەو بۆرسەیە لە ماوەیەکى نزیکدا دەست بە کارەکانى دەکرێت و دەچێتە بوارى جێ بە جێ کردنەوە

رۆژى دووشەممە بەروارى11/2/2008 کاتژمێر 6 ى سەرلە ئێوارە و لە (پارکى شەهید سامى عبدالرحمن) سەرۆک و ژمارەیەک لە ئەندامانى ئەنجوومەنى ژوورى بازرگانى و پیشەسازى هەولێر میواندارى شاندێکى پەرلەمانتارانى وڵاتى بەریتانایان کرد کە بە یاوەرى (خاتوو بەیان سامى عبدالرحمن) نوێنەرى فەرمى حکومەتى هەرێمى کوردستان لە وڵاتى بەریتانیا هاتبوونە کوردستان
هەر لە چوارچێوەى ئەو میواندارى کردنەدا گفت و گۆ لە سەر پتەو کردنى پەیوەندیە بازرگانى و ئابووریەکانى نێوان حکومەتى هەرێم و وڵاتى بەریتانیا کرا وپاشان سەرۆکى ژوور بە خێرهاتنى میوانەکانى کرد و دواتر ستایشى دۆستایەتى لە مێژینەى گەلى بەریتانیاى کرد بەرامبەر بە گەلەکەمان
وە هەروەها خاتوو بەیان ئاماژەى بە گرنگى ئەو پەیوەندیانە کرد کە لە نێوان هەردوو لادا گەشە و نماى کردووە و پاشان شاندى میوان سوپاسى ژوورى بازرگانى و پیشەسازى هەولێریان کرد بۆ سەرجەمى هەوڵ و کۆششەکانیان کە داویانە لە پێناو پتەو کردنى پەیوەندیە بازرگانى و پیشەسازیەکانى حکومەتى هەرێم لە گەڵ وڵاتانى تر و وە سوپاسى میواندارى و سەرجەمى هاوکاریەکانیان کردن
 

دواى هەڵسانگاندن لە خولێکى راهێنانى ڕاهێنەران لە وڵاتى بەحرێن ستافى کوردستان لە سەر ئاستى عێراق پلەى یەکەمى بە دەست هێنا

بە مەبەستى مەشق پێ کردنى ئەوانەى کە دەیانەوێ بچنە جیهانى کار و سەرمایە بە دەست پێ کردن لە بوارى پرۆژەى بچووک و مامناوەندى ستافى کوردستان کە پێکهاتبوو لە حەوت کەس شان بە شانى ستافى ناوەڕاست و خواروى عێراق بە شداریان لە خولێکى راهێنانى راهێنەراندا کرد کە بۆ 24 کەس لە سەر ئاستى عێراق بۆ ماوەى 15 رۆژ لە وڵاتى بە حرێن کە ساز کرابوو لە لایەن رێخرراوى (UNIDO) تایبەت بە گەشە پێدان و پێشخستنى پیشەسازى سەر بە نەتەوە یەکگرتووەکان کە تێیدا دواى تەواو بوونى خولەکە لە هەڵسەنگاندنێکدا بە ئامادەبوونى بەرێزان هۆگر شاڵى بە نوێنەرایەتى حکومەتى هەرێمى کوردستان و تەها زەنگەنە بەرێوەبەرى گشتى شارو ناوچە پیشەسازیەکان لە دەستەى وەبەرهێنان لە سەر ئاستى بەشدار بووانى هەرسێ ناوچەى کوردستان و ناوەڕاست و باشورى عێراق پلەى یەکەمیان بە دەست هێنا
عبدالواحد گه بەڕێوەبەرى راگەیاندنى ژوورى بازرگانى و پیشەسازى هەولێر و یەکێک لە بەشداربووانى ئەو خولە وتى: مەبەستى سەرەکى لە کردنەوەى ئەو خولە ئەوەبوو کە چەند راهێنەرێک پێ بگەیەنرێت بۆ ئەوەى لە کوردستان خولى راهێنان بکەنەوە بۆ ئەو کەسانەى کە دەیانەوێ کار بکەن و تواناى سەرمایەو وەبەرهێنانیان هەیە نابێ خۆیان ببەستنەوە بە بڕوانامەکانیانەوە بەڵکو دەبێ راهێنانیان پێ بکرێ بۆ ئەوەى شارەزایى لەو بوارەدا پەیدا بکەن و بچنە ناو جیهانى کار و سەرمایەوە بۆ ئەم مەبەستەش لە ماوەى داهاتوو نوسینگەیەک لە شارى هەولێر دەکرێتەوە و بڕیاریشە لە مانگى پێنجى داهاتووى ئەمساڵدا ئێمە ،خولى راهێنان بۆ ئەو کەسانە دەکەینەوە کە ئارەزوویان هەیە لە بوارى کار کردن و سەرمایەداریدا شارەزایى وەرگرن کە ئەمەش خزمەتێکى ترە بە وڵاتەکەمان و هاندانێکە بۆ ئەوانەى لەم دەورانەى ئێمەدا بەشدار دەبن چونکە ئێمە ئەو شتانەى لەو خولانەدا فێرکراوین بەو پەڕى دلسۆزیەوە بۆ بەشداربووانى خولەکانى خۆمانى باس دەکەین ئەمەش کار ئاسانیە بۆ ئەوان لە جێگەى ئەوەى بچن لە وڵاتێکى تر بەشدارى خولێکى راهێنانى لەو جۆرە دا بکەن و شارەزایى وەرگرن دەتوانن لێرە لە کوردستان لە رێگەى ئێمەوە سود لەو شارەزایى یانە وەرگرن
 

سه‌رۆکى ژوور له‌ چاوپێکه‌وتنێکى ته‌له‌فزیۆنى گه‌لى کوردستان دا :
داوا له‌ ولاته‌ عه‌ره‌بیه‌کان ده‌که‌ین بیَنه‌ کوردستان کونسولخانه‌ بکه‌نه‌وه‌.

رۆژى پێننج شه‌ممه‌ به‌روارى 7/2/2008 که‌نالى ناوخۆیى ته‌له‌فزیۆنى گه‌لى کوردستان چاوپێکه‌وتنیکى له‌گه‌ڵ به‌ریَز دارا جه‌لیل خه‌یات سه‌رۆکى ژوورى بازرگانى و ێیشه‌سازى هه‌ولیَر سازدا و له‌و چاوپێکه‌وتنه‌دا له‌ وه‌لامى پرسیارێکدا که‌ ( تایا تا چه‌ند کردنه‌وه‌ى کونسولخانه‌ى ولاته‌ عه‌ره‌بیه‌کان به‌ پێویست ده‌زانن له‌ کاتیَکدا تا ئێستا ئه‌و کاره‌ نه‌کراوه‌ ؟ ) سه‌رۆکى ژوور ووتى : به‌داخه‌وه‌ تا ئێستا وولاته‌ عه‌ره‌بیه‌کان کونسولخانه‌یان له‌ هه‌ریَمى کوردستان نه‌کردۆته‌وه‌ وه‌ به‌پێَویستى ده‌زانین که‌ ئه‌وانیش بێن و لێره‌ کونسولخانه‌یان هه‌بێت و داوایان لێَده‌که‌ین که‌ بێَن سوود له‌ بارى ئه‌من و ئاسایشى هه‌رێمى کوردستان وه‌رگرن و تا بتوانن کارى بازرگانى و وه‌به‌رهێنان له‌ هه‌رێمه‌که‌ماندا ئه‌نجامبده‌ن وه‌ له‌ وه‌لامى پرسیارێکى تردا کردنه‌وه‌ى کونسولخانه‌ى ولاتى چینى به‌ پێویست زانى له‌به‌ر ئه‌وه‌ى ریَژه‌یه‌کى زۆر له‌ کالاى چینى له‌ بازاره‌کانى هه‌رێطمى کوردستان دا به‌ر چاو ده‌که‌ویَت .

سەرۆک و ژمارەیەک لە ئەندامانى ئەنجوومەنى ژوور پێوازیان لە ( گریگۆرى کارمیکایل ) کرد

رۆژى چوارشەممە بەروارى 6/2/2008 کاتژمێر 12ى نیوەرۆ سەرۆک و ژمارەیەک لە ئەندامانى ئەنجوومەنى ژوور پێشوازیان لە ( گریگۆرى کارمیکایل ) راوێژکارى حکومى بۆ پلاندانان و ئەندازە لە رێکخراوى (USAID ) ى ئەمریکى کرد.
لە دانیشتنێکدا باس لە میکانیزمى قەرزپێدان لە کوردستان و دروستکردنى خانوو و بینایە و هاتنى رێکخراوە مێودەولەتیە یارمەتیدەرەکان بۆ بوژانەوەى ئابوورى کوردستان کرا. وە هەروەها گرێگۆرى باسى لە مەبەستى هاتنەکەى بۆ کوردستان کرد کە خۆى لە هەوڵدان بۆ دامەزراندنى تۆرێکى دارایى لە نێوان بانکەکان و کۆمپانیا وەبەرهێن و کۆمپانیا دلنیاییەکان و بازرگانان دەبینێتەوە .
بەرێز ( دارا جەلیل خەیات ) سەرۆکى ژوورى بازرگانى و پیشەسازى هەولێر جگە لەوەى کە هەموو جۆرە پالپشتى و هاوکاریکردنێکى بۆ بەرێزیان دووپاتکردەوە ئاماژەى بەوە کرد کە ئاستى ئابوورى زۆربەى هاولاتیان لە ئاستێکى نزم دایە ئەمەش کارى کردۆتە سەر ناجێگیرى ئابوورى و کۆمەلایەتى کە پێدەچێت ببێتە رێگر لەبەردەم پرۆژەیەکى لەو جۆرەدا بۆیە پێى وابوو کە بە هەوڵ و کۆششى هەموولایەک دەتوانرێت ئەم کێشانە چارەسەر بکرێت بۆ ئەوەى لە کاتى جێبەجێکردنى ئەو پرۆژانەدا رووبەرووى گرفتى لەناکاو نەبینەوە.
 

جێگرى نوێنەرى ئۆفیسى ئێراقى کۆمپانیاى چینى سەردانى ژوورەکەمانى کرد

رۆژى پێنج شەممە بەروارى 24/1/2008 کاتژمێر 11ى پێش نیوەرۆ (پیتەر ژوو) جێگرى نوێنەرى ئۆفیسى ئێراقى کۆمپانیاى چینى بۆ بازرگانى گشتى سەردانى ژوورى بازرگانى و پیشەسازى هەولێرى کرد و لە لایەن ئیبراهیم سۆفى جێگرى سەرۆکى ژوور و ژمارەیەک لە ئەندامانى ئەنجوومەنى کارگێرى ژوورەوە پێشوازى لێکرا، لە دانیشتنێکدا کە ماوەى کاتژمێرێکى خایاند ( پیتەر ژوو ) باسى لە گرنگى هەول و چالاکیەکانى ژوورى بازرگانى هەولێر کرد لە بەرەو پێش بردن و پتەو کردنى پەیوەندیە بازرگانیەکانى نێوان هەرێمى کوردستان و ولاتانى تر بە تایبەت ولاتى چین . وە بەلێنى دا لە ماوەکانى داهاتوودا زیاتر گرنگى بە پەیوەندیەکانیان بدات و بریاریشە لە نێوان هەردوولادا چەند پرۆژەیەک تاووتوێ بکرێت ، دواتر لە لایەن جێگرى سەرۆکى ژوور و ئەندامانى ئەنجوومەنى کارگێریەوە بەلێنى هەموو هاوکاریەکیان بۆ بازرگانان و وەبەرهێنەرانى چینى دووپات کردەوە تا بتوانن بێن و سوود لە بارى ئارام و ئاسایشى هەرێم وەربگرن بۆ ئەوەى وەبەرهێنان لە ناوچەکەدا بکەن.
 

ئەنجوومەنى ژوور پێشوازى لە سکرتێرى تایبەتى بالیۆزى یۆنانى لە بەغدا دەکات

رۆژى پێنج شەممە لە بارەگاى ژوور ایبراهیم سۆفى جێگرى سەرۆکى بازرگانى و پیشەسازى هەولێر ژمارەیەک لە ئەندامانى ئەنجوومەنى کارگێرى پێشوازیان لە خاتوو دلیا جورج شابا سکرتێرى تایبەتى سەفیرى یۆنان لە عێراقى فیدرالدا کرد کە بە مەبەستى دانانى بنەمایەکى پەیوەندى ئابوورى و بازرگانى لە نێوان هەرێمى کوردستان و یۆنان سەردانى ژووریان کرد.
لە دانیشتنیکى ئاساییدا باسیان لە گرنگى پەیوەندى نێوان هەرێمى کوردستان و یۆنان کرد و لە هەماهەنگى و هاوکاریکردنى نێوان هەردوولادا هاوهەلوێستى خۆیان نیشاندا و شاندى میوان خۆشحالى خۆى بۆ ئەو پیێشوازیکردنە دەربرى .
 

 
لە شارى مەشهەد لە ئێران لە 23/2/2008 بۆ ماوەى 3 رۆژ پێشانگایەکى تایبەت بە خواردنەوە ئیسلامیەکان دەکرێتەوە لە لایەن کۆمپانیاى ( همایشى برتو اریان ) ى جیهانى بۆ خواردنەوە ئیسلامیەکان و پیشەسازیە پەیوەندیدارەکانەوە
ئەوەى نیازى بەشدارى کردنى هەیە لەماوەى یەک هەفتە سەردانى ژوورەکەمان بکات بۆ زانیارى زیاتر

رۆژى پێنج شەممە 17/1/2008 ژمارەیەک لە کارمەندانى ئەنجوومەنى ژوور بەشداریان لە مەراسیمى بەرێکردنى رووفاتى قوربانیانى ئەنفال کرد ، لەو رێوورەسمەدا ژمارەیەکى زۆر لە بەرپرس و فەرمانبەر و رێکخراوە پیشەیى و جەماوەریەکان و ژمارەیەکى زۆر لە هاولاتى ئامادەى ئەم رێوورەسمە بوون .
لە رێوو رەسمەکەدا بەدرێژایى شەقامى 100 مەترى لە چوارریانى راستى تا رێگاى کەرکوک بە ئامادەبوونى ژمارەیەکى زۆر لە بەرپرس و نوێنەرو فەرمانبەرانى حزبى و حکومى و رێکخراوە جەماوەرى و پیشەییەکانى سنوورى شارى هەولێر تەرمى ( 354 ) رووفاتى ئەنفالکراوەکانى کوردستان کە لە 14/1/2008 بەئامادەبوونى سەرۆک مەسعود بارزانى رێوورەسمى رێزلێناننیان بۆ کرا بۆ ناوچەکانى خۆیان بەرێکران .
ئەنجوومەنى کارگێرى و ژمارەیەک لە کارمەندانى ژوورى بازرگانى و پیشەسازیمان لە رێوورەسمەکەدا بەشداریان کرد .
 

ریکخراوى ئایندەى گەش بۆ قەرزى بچووک  دەستى بە کارەکانى کرد

ڕۆژى یەک شەممە ڕێکەوتى 9/12/2007 بە ئامادە بوونى بەڕێز نێچیرڤان بارزانى سەرۆکى حکومەتى هەرێمى کوردستان و عومەر فەتاح جێگرى سەرۆکى حکومەت و فەلاح مێگفى بەرپرسى فەرمانگەى پەیوەندیەکانى دەرەوەى هەرێم و نەوزاد هادى پارێزگارى هەولێر و دارا جلیل خەیات سەرۆکى ژوورى بازرگانى و پیشەسازى هەولێرو ژمارەیەک لە ئەندامانى ژوور لە هۆڵى (شەهید سەعد عبداللە) لە مەراسیمێکدا ڕێکخراوى ئایندەى گەش بۆ قەرزى بچوک لە ژێر چاودێرى سەرۆکى حکومەت دەستى بە کارەکانى کردوو لەو کۆنگرەیەدا سەرۆکى حکومەت لە وتەیەکدا باسى لەوە کرد که‌ پرۆژه‌ی قەرزى بچووک خزمەتێکى گەورەیە بە خەڵکى کوردستان و یەکەمجار بیرۆکەى ئەم پرۆژەیە لە وڵاتى بەنگلادشەوە سەرى هەڵداو سەرکەوتنێکى گەورەى بەدەست هێنا و خاوەنى ئەم پرۆژەیە خەڵاتى ئاشتى نێودەوڵەتى پێ بەخشراوە، سەرۆکى حکومەت هیواى خواست کە خەڵکى کوردستان ڕاستگۆبن لە هاوکاریکردنى ئەم پرۆژەیەدا چونکە ئەم پرۆژەیە بۆ ئەوانە و هەر ئەوانیش دەتوانن سودى لێ ببینن و بەرەو پێشى ببەن دواتریش بۆ زیاتر متمانە بەخشین بە ڕێکخراوى ئایندەى گەش و پرۆژەکەیان سەرۆکى حکومەت و جێگرەکەى قەرزى ئەم ڕێکخراوەیان بەخشى بە چەند هاوڵاتیەک کە بڕیاریان دابوو سود لەم پرۆژەیە وەرگرن،شایەنى باسە بڕى پَینج ملیۆن دۆلار لە لایەن کحومەتى هەرێمەوە وەکو قۆناغى سەرەتایى بۆ ئەم پرۆژەیە تەرخان کراوە..

ژووری بازرگانی میوانداری شاندیکی ئیرانی ده‌کات

دوێنێ ئێوارە لە نیو سیتى بە ئامادەبوونى محمد رۆوف وەزیرى بازرگانى هەرێم ، ژوورى بازرگانى و پیشەسازى هەولێر میواندارى شاندێکى هاوبەشى حکومى و بازرگانى کۆمارى ئیسلامى ئێرانى کرد کە ژمارەیەک لە بەرپرسانى پایە بەرزى حکومى و سەرۆکى ژوورى هاوبەشى بازرگانى و پیشەسازى ئێرانى ئێراقى و قونسولى کۆمارى ئیسلامى ئێران لە هەولێر لەخۆ گرتبوو،

ئەم میوانداریکردنەش دەرفەتێک بوو بۆ باس کردنى گەلێک بابەتى گرنگ کە پەیوەندیان بە بازرگانى و ئابووریەوە هەبوو ، وە لە بەرامبەردا میوانان هەولێستى ئیجابیانەیان هەبوو بۆ هەولدان بۆ چارەسەرکردنى ئەو گرفتانە و بەرەو پێشبردنى بازرگانى و پەیوەندى ئابوورى لە نێوان هەرێمى کوردستان و کۆمارى ئیسلامى ئێران ، خۆشحالى خۆشیان لە بەرامبەر ئاستى ئارەزووەکانى حکومەتى هەرێم و ژوورى بازرگانى دەربرى بۆ پێشوازیکردن لە بەرهەمەکانى ئێران و کۆمپانیا ئێرانیەکان بۆ وەبەرهێنان لە کوردستان

دواتر شاندى میوان سەردانى مزگەوتى ( حاجى جەلیل خەیات ) یان کرد و تەواوى مزگەوتەکەیان بەسەرکردەوە و گوێیان لە چەند ئایەتێکى قورئانى پیرۆز گرت .

شاندێکى چینى راپۆرتێک لەسەر هەرێمى کوردستان ئامادە دەکات

رۆژى دووشەممە 3/12 دواى ئەوەى ژمارەیەک لە ئەندامانى ئەنجوومەنى کارگێرى ژوور پێشوازیان لە خاتوو ئەنجێلا گاوى بەرێوەبەرى گشتى رێوێژکارى وەبەرهێنانى دەرەوە لە کۆمپانیاى ( بیز 8 ) ى چینى و شاندى یاوەرى کرد . خاتوو ئەنجێلا مەبەستى سەردانەکەى بۆ کوردستان رەەنکردەوە و وتى ئێمە هاتووین بە چاوى خۆمان بارى ئارامى کوردستان ببینین و راپۆرتێک دەربارەى کوردستان و دەرفەتەکانى وەبەرهێنان تیایدا ئامادە بکەین ، ئەم راپۆرتە لەلایەن حکومەتەوە لەبەرچاو دەگیرێت بەمەش تێروانینى بازرگان و خاوەن کۆمپانیا چینیەکان بۆ کوردستان بێ گومان دەگۆرێت لەبەر ئەوەى زۆربەیان وەکو ئێراق تەماشاى کوردستان دەکەن ، زانیاریان لەسەر ئەو بارە جیاوازە نى یە کە لە کوردستان هەیە ، ئەوەشى ئاشکرا کرد کە جگە لە وەبەرهێنان لە بوارى بازرگانى و پیشەسازى بەنکێکیش لە کوردستان دەکەنەوە

ژوورى بازرگانى هەولێر بانگێشتى ئێران دەکرێت

رۆژى دووشەممە 3/12 سەرۆک و ژمارەیەک لە ئەندامانى ئەنجوومەنى کارگێرى پێشوازیان له‌ شاندێکى ژوورى بازرگانى شارى ( کرماشان ) ى ئێرانى کرد ، بە پێى نووسراوێکى فەرمى ژوورى بازرگانى کرماشان کە لە لایەن فاروق یوسف سەرۆکى شاندەکەوە پێشکەش بە سەرۆکى ژوور کرا ، ژوورى بازرگانى هەولێر بانگهێشت کراوە بۆ سەردانى کردنى کرماشان ، وا چاوەروان دەکرێت لەو سەردانەدا ژوورى بازرگانى و پیشەسازى هەولێر و ژوورى بازرگانى کرماشان ژوورێکى هاوبەش پێک بهێنن ، ئەمەش دەبێتە دووەمین کارى لەو بابەتە دواى ئەوەى کە ژوورى بازرگانى هەولێر ژوورێکى هاوبەشى لەگەل ژوورى بازرگانى ورمێ هەیە ، پێک هێنانى ئەم ژوورە هاوبەشە بۆ ئەو رێککەوتنامە دەگەرێتەوە کە لە نێوان پارێزگاى هەولێر و پارێزگاى کرماشان بە ئامادەبوونى سەرۆک و ژمارەیەک لە ئەندامانى ئەنجوومەنى کارگێرى ژوور لە مانگى حوزەیرانى ئەمسال لە هوتێلى خانزاد مۆرکرا .
پێکهێنانى ژوورى هاوبەش بە پێى ئەو کارانەى کە دەکەوێتە ئەستۆى ئەندامانى بەرێوەبردنى خزمەتێکى باش پێشکەش بە بازرگانانى هەردوولادەکات .


 

  ئەنجوومەنى ژوو بەشدارى لە مەراسیمى کردنەوەى قوتابخانەى محمد ماجدى دەکات

25/11/2007 بە ئامادەبوونى نەوزاد هادى پارێزگارى هەولێر و نوێنەرى وەزیرى پەروەردە و بەرپرسى لقى دووى پارتى دیموکراتى کوردستان و چەندین کەسایەتى و نوێنەرانى کەرتى تایبەت لە رێوورەسمێکى قەشەنگدا قوتابخانەى محمدى ماجدى کرایەوە ، ئەم قوتابخانەیە لەسەر بودجەى تایبەتى گەورە بازرگانى هەولێر محمد ماجدى دروستکراوە ، ئەمەش نموونەیەکە لە بەشداریکردنى کەرتى تایبەت لە پرۆسەى ئاوەدانکردنەوەى کوردستان و خزمەت گەیاندن بە بوارى پەروەردە و فێرکردن کە هەمیشە کوردستان پێویستى زۆرى بەم جۆرە دەست پێشخەرى و هەنگاوانە هەیە ، شایەنى باسە سەرۆک و ژمارەیەک لە ئەندامانى ئەنجوومەنى ژوور دواى بەشداریکردنیان لە مەراسیمى کردنەوەى قوتابخانەکە دەستخۆشیان لە  ناوبراو کرد و هیواى سەرکەوتن و پێشکەوتنى زیاتریان بۆ خواست ، بە هیواى ئەوەى ئەم کارە هاندەرێک بێت بۆ بەرزکردنەوەى ئاستى نیشتمان پەروەرى و بەخشش و بەختکردنى سەرمایە لە پێناویدا .

ئاگادارى

پاشکۆى بازرگانى عێراقى لە بەغدا ئامادەیە بۆ وەلامدانەوەى هەر پرسیارێک و پێشکەشکردنى زانیارى بە بازرگانان ، سەرجەم بازرگانان دەتوانن بە ئێمەیل یان تەلەفۆن یان فاکس یان سەردانى کردنى پاشکۆکە پەیوەندیان پێوە بکەن بۆ هەر پرسیار و زانیاریەک دەربارەى ئەم خالانەى لە خوارەوە دیاریکراون :

•  زانیارى دەربارەى پێشانگاکانى عێراق

•  هاوکارى بۆ وەرگرتنى بریکارى لە کۆمپانیا ئێرانیەکان

•  زانیارى دەربارەى کۆمپانیاى بەرهەمهێن و بازرگانیە ئێرانەکان

•  ناونیشانى دەزگا حکومیەکان

•  هاوکارى بۆ وەرگرتنى ڤیزا بۆ بازرگانانى عێراقى

•  بەدواداچوون لە سەر کێشەکانى نێوان کریار و فرۆشیارى هەردولا

•  زانیارى دەربارەى کۆمپانیا ئێرانیەکان و گەیاندنى داواکاریەکانیان

•  پشگیرى لە بەلگەنامە بازرگانیەکانى بازرگانە عێراقیەکان بۆ مامەلە کردن لەگەل ئێران

•  هاوکاریکردن بۆ تۆمارکردنى کۆمپانیا بە شێوەیەکى سەربەخۆ یان هاوبەشى لەگەل ئێرانیەکان

•  هاوکاریکردن بۆ پێکهێنانى کۆمپانیاى هاوبەشى بازرگانى و پیشەسازى هاوبەش لەگەل ئێرانیەکان

ایمیل : irantrade-iraq@gmail.com

هاتف : 01-53792666

العنوان : بغداد – الصالحیة / محلة 222 / زقاق 19 / مقابل السفارة الایرانیة

کونسولگەرى روسیا لە هەرێمى کوردستان کرایەوە

رۆژى چوارشەممە بەروارى 28/11/2007 بە ئامادەبوونى رێزدار نێچیرڤان بارزانى سەرۆکى حکومەتى هەرێمى کوردستان و پشتیوان سادق بەرپرسى لقى دووى پارتى دیموکراتى کوردستان و پارێزگارى هەولێَر نەوزاد هادى و نوێنەرى تایبەتى ڤلادیمێر پۆتین سەرۆکى روسیاو کونسول و بالوێزى روسیاو بەرێز دارا جەلیل خەیات سەرۆکى یەکێتى ژوورە بازرگانى و پیشەسازیەکانى کوردستان و ژمارەیەک لە ئەندامانى ئەنجوومەنى کارگێرى ژوورى بازرگانى هەولێر و ژمارەیەک لە لێپرسراوانى حزبى و حکومى بارەگاى کونسولگەرى روسیا لە هەولێر کرایەوە .
لە رێوو رەسمى کردنەوەى کونسولگەریەکەدا بالوێزى روسیا ووتى کردنەوەى ئەم کونسولگەریە دواى هەولێکى دوورو درێژى نێوان ڤلادیمێر پۆتن و جەلال تالەبانى سەرۆک کۆمارى عێراق و مەسعود بارزانى سەرکى هەریمَکى کوردستان دێت وە بە هەنگاوێکى گرنگى دانا بۆ بەهێز کردنى پەیوەندیەکانى نێوان روسیاو هەرێکى کوردستان
دواتر رێزدار نێچیرڤان بارزانى لە وتارێکدا ووتى کردنەوەى ئەم کونسولگەریە رەنگدانەوەى پەیەوندیەکى مێژوییە لە نێوان گەلى کورد و خەلکى ولاتى روسیا ، وە کردنەوەى ئەم کومسولگەریەشى بە شانازى وەسف کرد بۆ هەرێمى کوردستان دواتر بە ووتنەوەى هەرسێ سروودى نیشتمانى رووسیاى فیدرال و عێراقى فیدرال و سرودى ئەى رەقیبى هەرێمى کوردستان بە رەسمى ئالاى رووسیا هەلکرا .
 

کۆمپانیاى پێشانگاکانى هەولێرى نێودەولەتى نیازى وایە بازاڕێک بە ناوى (بازاڕى جەژنى قوربانى پیرۆز)لە
14-19/12/2007 ساز بکات ، ئەو بازرگانانەى نیازى بەشدارى کردنیان هەیە تا 4/12/2007 سەردانى ژوورى بازرگانى و پیشەسازى هەولێر یان کۆمپانیاى پێشانگاکان لە پارکى شەهید سامى عبدالرحمن بکەن بۆ تۆمار کردنى ناوەکانیان،
 

ئەنجوومەنى ژوور میواندارى سەفیرى هۆڵەندا دەکات

لە چوارچێوەى ڕێزگرتن لە پرسى نوێنەرانى دەزگا بیانیەکان بۆ بەرەو پێش بردنى پەیوەندى دۆستانەو دروست کردنى پەیوەندى بازرگانى و ئابوورى لە گەڵ وڵاتاندا ئێوارەى ڕۆژى سێ شەممە 27/11/2007 بە ئامادەبوونى (فەلاح مسته‌فا) بەرپرسى پەیوەندیەکانى دەرەوەى هەرێم ئەنجوومەنى ژوور میواندارى (ڕۆبەرت گابریەس )باڵیۆزى هۆڵەندا لە عێراقى فیدراڵ و (سه‌لاح خدر) کونسوڵى فەخرى وڵاتى هۆڵەندا کرد لە هۆڵى مامۆستا سعد عبداللە لە هەولێر ، دارا جلیل خەیات سەرۆکى ژوور پاش بەخێرهێنانى بەڕێزانیان ، خۆشحاڵى خۆى دەربڕى بۆ ئەم هەنگاوە گرنگەى وڵاتى هۆڵەندا بە دانانى (سه‌لاح خدر) بە قونسوڵى فەخرى هۆڵەندا لە هەرێمى کوردستاندا ،هیواشى خواست لە سەر دەستى ئەودا پەیوەندیە بازرگانى و پیشەسازیەکان هەرێمى کوردستان و هۆڵەندا بەرەو پێش بچێت لە هەمان کاتدا ئاماژەى بە ڕۆڵى وڵاتى هۆڵەندا کرد لە حەواندنەوەى ژمارەیەکى زۆر لە هاوڵاتیانى کوردستان لە وڵاتەکەیاندا ....
 

سەرۆکى ژوور بەشدارى لە ڕێوڕەسمى کردنەوەى یەکەمین پیشانگاى ئوتۆمبیلى جۆرى سکودا لە هەرێمى کوردستان کرد

بەمەبەستى بوژانەوەى بازاڕەکانى کوردستان و فراوان کردنى ڕۆڵى کەرتى تایبەت و هاوکات لەگەڵ هەوڵ وکۆششەکانى حکومەتى هەرێم بۆ بوژانەوەى ئابوورى کوردستان ، لە رێوڕەسمێکى شایستەدا بە چاودێرى کۆمەڵێ کۆمپانیا ، بە تازەترین وپێشکەوتوو ترین ئۆتۆمبێلى جۆرى سکۆدا لەسەر ئاستى کوردستان و عێراق بە ئامادەبوونى وەزیرى بازرگانى حکومەتى هەرێم و باڵیۆزى چیک لە عێراق و باڵیۆزى وڵاتى روسیا و سەرۆکى ژوورى بازرگانى هەولێر و بەرپرسى لقى دووى پارتى دیموکراتى کوردستان و جێگرى پارێزگارى هەولێر لەگەڵ ژمارەیەکى زۆر لە بازرگانان و پیاوانى کار لە شارى هەولێر یەکەم پێشانگاى ئوتۆمبێلى سکۆدا لە رۆژى 22ى تشرینى دووەمى 2007 کرایەوە ، ، کە ئەوەش هەنگاوێکى ترى حکومەت وکەرتى تایبەتە لە بوژانەوەى کوردستان ،شیاوى باس لێوەکردنە کۆمپانیاى "شیرین " بۆ بەڵێندەرایەتى و بازرگانى سنووردار دەبێتە وەکیلى سەرەکى کۆمپانیاى ناوبراو لە هەموو عێراقدا
لە ڕێوڕەسمى کردنەوى ئەو پێشانگایەدا باڵیۆزى چیک وتەیەکى پێشکەشى ئامادە بووان کرد و تێیدا ڕایگەیاند کە کۆمپانیاى شیرین خەریکى دانانى پلانێکە بۆ فرۆشتنى ئوتومبێلەکان بە شێوەى قستى مانگانە کە بگونجێت لەگەڵ بارى ئابوورى هاوڵاتیاندا وە هەموو کەلوپەلێکى پێویستى بۆ چاککردنەوەى ئوتومبیلەکان دابینکردووە بە هەرزانترین نرخ ، بۆ ئەم مەبەستەش دەزگایەکى تایبەتى داناوە بۆ پێشکەشکردنى هەموو خزمەتێک بە سەرپەرشتى باشترین و زیرەک ترین ئەندازیار ، دواتر بەڕێز ( دارا جەلیل خەیات ) سەرۆکى ژوورى بازرگانى هەولێر وتارێکى پێشکەشى ئامادەبووان کرد کە تێیدا بەڕێزیان خۆشحاڵى خۆى دەربڕى بە کردنەوەى پیشانگایەکى لەمجۆرە لە هەرێمى کوردستاندا وسوپاسگوزارى خۆى گەیاندە کۆمپانیاى شیرین بۆ کردنى ئەو کارە چاکەیان....