رێککه‌وتی 20/11/2012، به‌ڕێز دارا جه‌لیل خه‌یات سه‌رۆکی ژووری بازرگانی و پیشه‌سازی هه‌ولێر له‌باره‌گه‌ی ژوور، پێشوازی له‌به‌ڕێز عه‌بدوڵڵا چه‌لیک به‌ڕێوه‌به‌ری گشتی به‌نکی ئاسیای تورکی و شاندی یاوه‌ری کرد.
له‌سه‌ره‌تای چاوپێکه‌وتنه‌که‌دا که‌تێدا به‌ڕێز ئیبراهیم محه‌مد سۆفی جێگری سه‌رۆکی ژوور ئاماده‌یبوو، به‌ڕێز دارا جه‌لیل خه‌یات به‌گه‌رمی به‌خێرهێنانی شاندی میوانی کرد و له‌کاره‌کانی بانکی ناوبراوی پرسییه‌وه.
لای خۆیه‌وه، به‌ڕێز عه‌بدوڵڵا چه‌لیک وێڕای سوپاسکرنی بۆ پێشوازی لێکردنیان، خۆشحاڵی خۆیان به‌سه‌ردانیکردنی ژوور ده‌ربڕی و هیوای خواست که‌له‌داهتوودا بتوانن خزمه‌تێکی به‌رچاو بکه‌ن له‌بواری به‌نکداری له‌کوردستاندا.
هه‌روه‌ها تیشکی خسته سه‌ر سروشتی کاروباره‌کانی به‌نکی ناوبراو و، ئامانجی سه‌ردانه‌که‌ی بۆ ژوور خسته‌روو ئه‌ویش ئاماده‌باشییه به‌مه‌به‌ستی ئه‌نجامدانی مه‌راسیمی کردنه‌وه‌ی لقی به‌نکه‌که‌یان له‌هه‌ولێری پایته‌ختدا و راشیگه‌یاند که‌بڕیاره ئه‌مڕۆ به‌ڕێوه‌بچێت.
لای خۆیه‌وه، به‌ڕێز خه‌یات ئاماژه‌ی به‌ره‌وشی به‌نکداری له‌کوردستاندا و دووپاتیکرده‌وه که هاتنی به‌نکه بیانییه‌کان بۆ کوردستان گرنگی زۆری بۆ خه‌ڵكی هه‌رێم هه‌یه، چونکه خزمه‌تگوزارییه‌کان ده‌بێته هۆی زیاتر پێشووه‌چوونی کاره بازرگانییه‌کان له‌گه‌ڵ وڵاتانی ده‌‌ره‌وه‌دا.
هه‌روه‌ها وتیشی:"هه‌رێم زۆر پێویستی به‌توانا و شاره‌زایی به‌نکه‌کانی ده‌ره‌وه‌یه له‌وانیش تورکییه‌کان، بۆیه ده‌رگه‌مان به‌روویاندا کراوه‌یه و ئاماده‌ین هاریکارییان بکه‌ین."
