شاندی میوان چەندین پرسیاریان سەبارەت بە قەیرانی دارایی ئێستای هەرێمی كوردستان ئاراستەی سەرۆكی ژوور كرد، لە وەڵامیشدا سەرۆكی ژوور وتی: بەهۆی ئەم بارودۆخە نائاسییەی ئەم دواییە و نە ناردنی مووچە و بودجەی هەرێمی كوردستانەوە لە لایەن حكومەتی عێراقەوە دەتوانین بڵێن ئیش و كارەكانی بەڵێندەرایەتی و رێگاوبان بە شێوەیەكی تەواو وەستاوە وە كاری كردۆتە سەر كۆمپانیاكانی كەرتی تایبەتیش لە گشت بوارەكاندا ئێسیتا بە بەراورد لەگەڵ جاران لە %40ی ئیشو كارەكانیان دابەزیوە.

سەبارەت پاڵپشتی حكومەتی هەرێم لە چارەسەركردنی قەیرانی دارایی بە لایەن كەرتی تایبەتەوە ، دارا جەلیل خەیات رایگەیاند: كۆمپانیاو دەزگاكانی كەرتی تایبەت رۆڵێكی باشیان هەبووە لە پاڵپشتی حكومەتی هەرێم و هێزەكانی پێشمەرگە كە ئێستا لە بەرەكانی شەڕدان بۆ پاراستنی هەرێمی كوردستان وتیشی ئێمە وەكو ژووری بازرگانی  بە شێوەیەكی خۆبەخشانە بە هاوكاری چەند دەزگاو یەكێتی و رێكخراوی كەرتی تایبەتی تر تا ئێستا نزیكەی 102 ملیۆن دۆلار وەكو یارمەتی بۆ پێشمەرگە كۆ بكەینەوە و جگە لەوەش بۆ ماوەی یەك مانگ ژەمی بەیانیانمان بۆ هێزەكانی پێشمەرگە لە هەردوو میحوەری گوێڕ و مەخمور دابین كرد.

لە كۆتاییشدا سەرۆكی ژوور هیوای خواست كە كابینەی نوێ ی حكومەتی عێراق كێشەكانی هەرێم چارەسەر بكات.