رۆژی 26ی ئایار بەئامادەبونی وەزیری تەندروستی و ووتەبێژی حكومەتی هەرێمی كوردستان و پارێزگاری هەولێر و سەرۆكی ژووری بازرگانی و پیشەسازی هەولێر و ژمارەیەك لە نوێنەر و كونسوڵی وڵاتان لەهەرێم و بەبەشداری 220 كۆمپانیا لە 19 وڵاتی جیاجیا رێوڕەسمی كردنەوەی پێنجەمین پێشانگای نێودەوڵەتی بۆ پێداویستی و چاودێری تەندروستی بەڕێوەچوو.
لەوتەیەكیشیدا بۆ دەزگاكانی راگەیاندن، د.رێكەوت حەمەڕەشید وەزیری تەندروستی ئاماژەی بەگرنگی كردنەوەی پێشانگاكە كرد، بەپێویستیشی زانی پزیشكان و كارمەندانی تەندروستی و كەرتی تایبەت و كەرتی گشتیش سوود لە ئامێر و پێداویستی و زانستە سەردەمییەكانی پێشانگاكە وەربگرن بەوپێیەی چەندین وڵاتی پێشكەوتووی بواری پزیشكی و تەندروستی بەشدارن بە نمایشكردنی بەرهەمەكانیان و تواناكیان لەو بوارەدا.
ئەم پێشانگایە بۆ ماوەی 3 رۆژ بەدەوام دەبێت و لەمیانی بەڕێوەچوونی پێشانگاكەش چەندین بابەت و توێژنەوەی تایبەت بە زانستی سەردەمی پزیشكی و هاتنەكایەی پێداویستی پزیشكی دەخرێتە بەر باس و گفتوگۆ.
