7/5/2018 بە ئامادەبوونی وەزیری دادو پارێزگاری هەولێرو کۆنسوڵی گشتی تورکیا لە هەولێر، رۆژی 6ی ئایار ژووری بازرگانی و پیشەسازی هەولێر دیدارێکی لەنیوان بازرگانانی کوردستان و عێراق و تورکیا سازدا، لەبارەی دەرفەتی بازرگانی و وەبەرهێنان لە عێراق، کە ژمارەیەک لە پیاوانی خاوەنکار لە تورکیاو بازرگانانی کوردستران بەشدار بوون.
دارا جەلیل خەیات سەرۆكی یەکێتی ژوورە بازرگانی و پیشەسازییەکانی كوردستان رایگەیاند، هەرێمی كوردستان هەموو كارئاسانییەك دەكات بۆئەوەی ئەو ئاستەنگانە نەمێنێت كە لە نێوان بازرگانی توركیاو هەرێمی كوردستاندا هەیە، لەلایەن توركیاو هەرێمی كوردستانەوە ئەو ئامانجە هەیە كە بازرگانی نێوان هەردوولا فراوانتر بكرێت و ئاستێكی باشتر بچێتە پێشەوە. سوپاسی توركیاشی كرد، كە سنوورەكانیان بەرانبەر هەرێمی كوردستان دانەخست، لەو كاتەی ئابڵۆقەی ئابووری و سیاسیی لەسەر كوردستان هەبوو.
"هاکان کاراچای" کونسوڵی گشتی تورکیا لە هەولێر، وتی: تورکیا گرنگترین هاوبەشی عێراقە، رەهەندی بازرگانی عێراق بە پلەی چوارەم دێ لە تورکیا، زیادبوونی ئەو پەیوەندییە بازرگانییە لە بەرژەوەندی عێراق و تورکیادایە، ئەم نزیکبوونەوەی تورکیا کوالێتی بازاڕی عێراقی بەرز کردۆتەوە، بەڵام داعش زیانی بە پەیوەندییە بازرگانییەکانمان گەیاند. ئاماژەشی بەوەکرد، قەبارەی بازرگانی تورکیا لەگەڵ عێراق نۆ ملیار دۆلاری تێپەڕاندووە.
دواتر پارێزگاری هەولێر وتی: پەیوەندییە ئابووری و بازرگانییەکان لەگەڵ تورکیا ئەزموونێکی پڕ بەرهەم و داهێنەر بووەو، ئەو پێشکەوتنانەی لە هەرێمی کوردستان لە بوارەکانی ئاوەدانی و بارزگانی هەبووە، پشکی شێر بەر وڵاتی تورکیا کەوتووەو جێ پەنجەی تورکیا لە ئاوەدانی دیارەو، زۆربەی پڕۆژەکانی هەولێر کۆمپانیاکانی تورکیا جێبەجییان کردووەو بە ئاستێکی بەرزو کوالێتییە بەرزەکان هۆکارێکی گرنگ بووە بۆ ئاوەدانی، سیاسەتی حکوومەتی هەرێمیش جۆرێک بووە کە پاڵپشت بووە بۆ بەهێزکردنی ئەو پەیوەندییە و تورکیاش پاڵپشتی عێراق و هەرێمی کوردستانی کردووەو تیایدا سەرکەوتووبوون.
نەوزاد هادی وتیشی: هەموو کاتێک تورکیا وەک قوڕگی هەناسە بووە بۆ هەرێمی کوردستان و، تا ئێستا تورکیا ئەو هەناسەیەی دانەخستووەو هەمیشە وەک دوو دۆست سەیری یەکترمان کردووە، داواکارین لە کۆمپانیاکانی تورکیا ئەو پەیوەندییە بەهێزتر بکەن.
دواتر سینان چەلەبی وەزیری داد وتی: دەکرێت سنووری سیاسیمان هەبێت لەگەڵ وڵاتان، بەڵام نابێت سنووری بازرگانیمان هەبێت، چونکە بازرگانی بۆ خۆشگوزارانی خەڵکە و بە شێوەیەکی ئاسایی دەکرێت کێشە لە نێوان دامەزراوە ئیدارییەکان و سنوورەکاندا هەبێت، پێویستە بەردەوام پەرە بە پەیوەندییە بازرگانییەکانمان بدەین.
رۆژی 23/4/2018 لە شاری لەندەن، بە ئامادەبوونی نوێنەری سەرۆکوەزیرانی عێراق و بەریتانیاو بەشداری شاندی کوردستان کۆنفرانسێک لەبارەی ئاوەدانکردنەوە عێراق بەڕێوەچوو، بەمەبەستی گەڵاڵەکردنی بۆچوونێکی پوخت و رۆشن، کە ببێتە بنەمای کارکردنی هاوبەشی بەریتانیاو عێراقییەکان لە داهاتوویەکی نزیکدا بۆ ئاوەدانکردنەوەی ناوچەکانی شەڕ.
بارۆنێس نیكلسن، نوێنەری سەرۆكوەزیرانی بەریتانیا بۆ پرسی بازرگانی و ئاوەدانكرنەوەی عێراق وتی "ئامانجمان بازرگانی زیاترو پەیوەندی بازرگانی تۆكمەترە، وەک زیاتركرنی هاوردەو هەناردەكردن بۆ هەردوولا، ئەم ئەنجوومەنە بۆ بونیاتنانەوەی عێراقە بە هەموو ناوچەكان و بە هەرێمی كوردستانیشەوە".
محەمەد شەیاع سودانی، وەزیری پیشەسازی عێراق رایگەیاند، لە لەندەن لێكگەیشتن و لێكنزیكبوونەوەی زیاتر هەیە، لەگەڵ باڵیۆزی بەریتانیا لە بەغدا گەیشتینە ئەوەی دەرفەت و ئاسانكاری بكەین بۆ كۆمپانیا بەریتانییەكان کە هەندێكیان لەناو عێراق كار دەكەن و، ئەوانی دیکە هان بدەین وەبەرهێنان بكەن لە بازاڕەكانی عێراقدا.
لە کۆنفرانسەکەدا شاندێکی حکومەتی کوردستان بەشدارن، لە بەغداش 130 نوێنەرو وتەبێژی سەرۆکوەزیرانی عێراق بۆ پرسی بازرگانی بەشدار بوون. شاندی حکومەتی کوردستان لە میانی بەڕێوەچوونی کۆنفرانسەکە مێزگردێکیان دەبێت لەگەڵ گەورە بازرگانە بەریتانی و عێراقییەکان کە دەیانەوێ رۆڵی خۆیان ببین لە کوردستان. نەوزاد هادی، پارێزگاری هەولێر رایگەیاند: دەمانەوێ کۆمپانیا بەشداربووەکانی بەریتانیا بێنینە هەرێمی کوردستان.
عوسمان شوانی، سكرتێری ئەنجوومەنی باڵای ئابووری كوردستان دەڵێت: ئەوەی روونكراوەتەوە لەلایەن شاندی هەرێمی کوردستان ئەوە بوو، كە چۆن هەرێمی كوردستان پەیوەندییەکانی لەگەڵ بەغدا باشتر كردووە كە دەبێتە رەوینەوەی ئەو نیگەرانییانەی پێشتر كۆمپانیاكان هەیانبووە.
لە پانڵێکدا باس لە رۆڵی وەبەرهێنان و چۆنێتی پێشکەوتنی هەرێمی کوردستان لەو ساڵانەی رابردوودا کرا، لەگەڵ ئەو دەرفەتانەی ئێستا لە هەرێمی کوردستان هەن لە بوارەکانی وەبەرهێنان و کشتوکاڵ و پیشەسازی، چۆنێتی پێشخستنیان و سوودوەرگرتنی هەرێمی کوردستان لە ئاوەدانکردنەوەی شارەکانی دیکەی عێراق وەکو موسڵ، بۆئەوەی بە بەرژەوەندی و رۆڵی خەڵکی کوردستانیش تەواو ببێت.
بەپێی ئەو گفتوگۆیانەی لە دوو رۆژی کۆنفرانسەکەدا بەڕێوەچوون، بەریتانیا خۆی ئامادە دەکات بۆ وەرگرتنی رۆڵێکی گەورە لە عێراقی دوای داعشدا؛ بۆئەوەی کۆمپانیاکانی جێدەستیان دیار بێت لە نۆژەنکردنەوەی شارە وێرانبووەکانی شەڕ.
1$=1488
بههای گۆرینهوهی دیناری عیراقی به دولاری ئهمری...