رێککه‌وتی 17/10/2012، له‌مه‌راسیمێكدا که له‌سه‌نته‌ری رۆشنبیری و کۆمه‌ڵایه‌تی ژووری بازرگانی و پیشه‌سازی هه‌ولێر به‌ڕێوه‌چوو، دووه‌مین ئه‌جێندای کاره‌کانی هه‌رێمی کوردستان له‌لایه‌ن ده‌سته‌ی ئاماده‌کاری ئه‌جێندایه‌‌که‌وه له‌سه‌نته‌ری زانیاری و لێکۆڵینه‌وه‌ی ستراتیژی کوردستان KISSC پێشکه‌ش به‌نوێنه‌ری حکومه‌تی هه‌رێمی کوردستان کرا. مه‌راسیمه‌که‌ش، به‌ئاماده‌بوونی نوێنه‌ری سه‌رۆکی حکومه‌تی هه‌رێمی کوردستان به‌ڕێز عه‌لی سندی وه‌زیری پلاندانانی هه‌رێم و نه‌وزاد هادی پارێزگاری هه‌ولێر، دارا جه‌لیل خه‌یات سه‌رۆکی یه‌کێتی ژووره‌کانی بازرگانی و پیشه‌سازی هه‌رێمی کوردستان، ژماره‌یه‌ک له‌وه‌زیران و په‌رله‌مانتارانی کوردستان، سه‌رۆک و جێگرانی سه‌رۆک و ئه‌ندامانی ده‌سته‌ی کارگێڕی ژووره‌کانی بازرگانی و پیشه‌سازی هه‌ولێر و سلێمانی و دهۆک، به‌رپرسانی حکومی و حزبی له‌هه‌ولێری پایته‌خت، کونسوڵ و نوێنه‌رانی وڵاتان، که‌سانی ئه‌کادیمی و مامۆستایانی زانکۆ، میدیاکاران و نوێنه‌رانی رێکخراوه‌کانی کۆمه‌ڵی مه‌ده‌نی، به‌ڕێوه‌چوو.له‌ده‌ستپێکی مه‌راسیمه‌که‌شدا، به‌ڕێز ئاراس قادر خۆشناو به‌ڕێوه‌به‌ری سه‌نته‌ری زانیاری و لێکۆڵینه‌وه‌ی ستراتیژی کوردستان له‌وتارێکدا وێڕای به‌خێرهێنانی گه‌رمی میوانان، ئاماژه‌ی به‌قۆناغه‌کانی ئاماده‌کردنی نامه‌ی ئه‌جێندای کاره‌کانی هه‌رێم دا، که له‌ماوه‌ی چه‌ند ساڵێکدا سه‌نته‌ره‌که‌یان به‌هاوبه‌شی له‌گه‌ڵ سه‌نته‌ری پڕۆژه نێوده‌وڵه‌تییه‌کان CIPE و به‌هه‌ماهه‌نگی له‌گه‌ڵ یه‌کێتی ژووره‌کانی بازرگانی و پیشه‌سازی هه‌رێمی کوردستان و وه‌رگرتنی رای لایه‌نه په‌وه‌ندیدا‌ر و که‌سانی ئه‌کادیمی و مامۆستایانی زانکۆ، به‌سێ قۆناغی په‌یوه‌ست به‌کێشه و ئاسته‌نگه‌کانی به‌رده‌م که‌رتی ئابووری، کاریان له‌سه‌ر ئه‌م پڕۆژه‌یه کردووه که ئێستا به‌رهه‌مه‌که‌ی هاتۆته ده‌ست. هه‌ر له‌میانه‌ی وتاره‌که‌یدا ئاماژه‌ی به‌وه‌شدا، که له‌به‌ر رۆشنایی داواکاری به‌ڕێز مه‌سعود بارزانی سه‌رۆکی هه‌رێمی کوردستان له‌خه‌ڵک و که‌سانی ئه‌کادیمی به‌مه‌به‌ستی به‌شداریکردنیان له‌پڕۆسه‌ی ئاوه‌دانکردنه‌وه‌ی کوردستان، ئه‌م ئه‌جێندایه گه‌ڵاڵه کراوه. پاشان نوێنه‌ری سه‌رۆکی حکومه‌تی هه‌رێمی کوردستان به‌ڕێز عه‌لی سندی وه‌زیری پلاندانانی هه‌رێم، له‌‌وتارێكدا باسی له‌مێژووی هه‌ردوو که‌رتی گشتی و تایبه‌تی ئابووری له‌کوردستان کرد، که له‌پاش دامه‌زراندنی په‌رله‌مان و حکومه‌تی هه‌رێم له‌ساڵی 1992 که‌رتی تایبه‌ت رێچکه‌ی خۆی گرتووه و گه‌یشتۆته ئه‌م ئاسته‌ی ئێستای. وتیشی:"له‌پاش ساڵی 2003 که‌رتی تایبه‌ت پاش ئه‌وه‌ی له‌لایه‌ن حکومه‌ته‌وه ئاسانکاری بۆ کرا، توانی زۆر کێشه‌ی ئه‌م هه‌رێمه چاره‌سه‌ر بکات و، بۆ نموونه کێشه‌ی کاره‌با." هه‌روه‌ها ئاماژه‌ی به‌یاسای وه‌به‌رهێنان له‌کوردستان دا، که ئێستا له‌قۆناغی هه‌موارکردنه‌وه‌دایه، هه‌روه‌ها راشیگه‌یاند که له‌مه‌‌وپاش له‌کوردستاندا زیاتر بایه‌خ به هه‌ردوو سێکته‌ری پیشه‌سازی و کشتوکاڵ ده‌درێت. به‌ڕێز سندی به‌ڵێنیشی دا که حکومه‌ت بهوردی پێشنیاره‌کانی نێو ئه‌جێندایه‌که وه‌رده‌گرێت که‌به‌نرخن، هه‌روه‌ها ده‌شیانکات به‌پلانی درێژخایه‌نی خۆی تاوه‌کو ده‌ره‌نجامی ئه‌رێنیان بۆ هه‌رێم لێبکه‌وێته‌وه، هاوکات ده‌ستخۆشی له‌ئاماده‌کارانی ئه‌جێندایه‌که کرد که به‌رێگه‌یه‌کی زانستییانه پڕۆژه‌که‌یان جێبه‌جێ کردووه. له‌لایه‌کی دیکه‌وه، به‌ڕێز نه‌وزاد هادی پارێزگاری هه‌ولێر وتارێکی پێشکه‌ش کرد و تێدا وێڕای ده‌ستخۆشی له‌ئاماده‌کارانی پڕۆژه‌که، وتی:"ئه‌م ئه‌جێندایه له‌ده‌ره‌نجامی کۆمه‌ڵێک سیمینار و چالاکییه که پێشتر ئه‌نجامدراون له‌باره‌ی گرفته‌کانی که‌رتی ئابووری هه‌رێم." وتیشی:"ئێستا ئاستی ئابووری گۆڕاوه و داهاتی ساڵانه‌ی تاک و قه‌باره‌ی وه‌به‌رهێنان زیادیان کردووه، هه‌روه‌ها ده‌ره‌نجامی سیاسه‌تی حکومه‌تی هه‌رێم ژینگه‌یه‌کی له‌بار بۆ که‌رتی تایبه‌ت ره‌خساوه." پاشان به‌ڕێز دارا جه‌لیل خه‌یات سه‌رۆکی ژوور، له وتارێكیدا وێرای ده‌ستخۆشی له‌ستافی سه‌نته‌ری زانیاری وتوێژینه‌وه‌ی ستراتیژی كوردستان به‌بۆنه‌ی ئاماده‌کردنی ئه‌جێندا‌که، وتی:"دوای پێداچوونه‌وه به‌ئه‌جێندای یه‌كه‌م كه به‌ر له (5) ساڵ ئاماده‌كرابوو، خۆش به‌ختانه ئه‌مڕۆ ئه‌جێندای دووه‌م پێشكه‌ش به‌حكومه‌تی هه‌رێم ده‌كرێت به‌مه‌به‌ستی به‌ره‌و پێشبر‌دنی ئابووری كوردستان." هه‌روه‌ها وتی:"ئه‌وه‌ی چاوه‌ڕێ ده‌كرێت له‌حكومه‌تی هه‌رێم ئه‌وه‌یه كه به‌رنامه بۆ چاره‌سه‌ریكردنی یه‌كه‌یه‌كه‌ی ئه‌و گرفتانه دابڕێژێت که له ئه‌جێندایه‌که‌دا ئاماژه‌یان پێکراوه." وتیشی:"هه‌ڵوێست و هاندانی حكومه‌ت بۆ ئێمه‌ی بازرگان و نوێنه‌رانی كه‌رتی تایبه‌ت زۆر گرنگه، ته‌نانه‌ت ته‌نها له‌ماوه‌ی چه‌ند مانگێكی ده‌ست به‌كاربوونی كابینه‌ی حه‌وته‌می حکومه‌تی هه‌رێم ئه‌و گرنگیدانه سه‌لمێندراوه." هه‌روه‌ها به‌ڕێز خه‌یات داواشی کرد که حکومه‌ت پلان و رێنمایی و یاسای پێویست ده‌ربکات تاکو له‌سیسته‌می ئیشتراكی و سه‌نترالیه‌ته‌وه به‌ره‌و سیسته‌می ئابووری ئازاد بچین. دواتر به‌ڕێز محه‌مه‌د عه‌لائه‌دین به‌رێوه‌به‌ری ئۆفێسی عێراق له‌سه‌نته‌ری پڕۆژه نێوده‌وڵه‌تییه‌کان CIPE وتارێکی پێشکه‌ش کرد و تێدا هیوای خواست که ئه‌م ئه‌جێندایه ببێته هۆی پێشخستنی که‌رتی ئابووری له‌هه‌رێمدا. هه‌روه‌ها وتی:"ئه‌م پڕۆژه‌یه و چه‌ند پڕۆژه‌یه‌کی دیکه‌ی هاوشێوه به‌هه‌ماهه‌نگی له‌نێوان سه‌نته‌ری CIPEو لایه‌نه په‌یوه‌ندیداره‌کان، جگه له‌هه‌رێمی کوردستان له‌پارێزگایه‌کانی نه‌جه‌ف، به‌سڕا، ئه‌نبار، بابل و که‌ربه‌لادا ئه‌نجام دراون." به‌ر له‌کۆتایی مه‌راسیمه‌که‌ش، ئه‌جێندای کاره‌کانی هه‌رێمی کوردستان له‌لایه‌ن ئاماده‌کارانی پڕۆژه‌که، پێشکه‌ش به‌نوێنه‌ری سه‌رۆکی حکومه‌ت و ژماره‌یه‌ک له‌وه‌زیره‌کان و پارێزگاری هه‌ولێر و سه‌رۆکی یه‌کێتی ژووره‌كانی بازرگانی و پیشه‌سازی و لایه‌نی په‌یوه‌ندیدار له‌کوردستان و، ئاماده‌بووانی مه‌راسیمه‌که کرا. جێی ئاماژه‌یه، ئه‌جێندای کاره‌کانی هه‌رێمی کوردستان له‌دوو توێی نامایه‌کدا له‌سێ به‌رگ به‌زمانه‌کانی کوردی، عه‌ره‌بی و ئینگلیزی له‌چاپ دراوه، تێدا بهوردی ئه‌و پرس و کێشه و گرفتانه خراونه‌ته روو که له‌هه‌رێمی کوردستاندا به‌ربه‌ست له‌به‌ردم گه‌شه‌کردنی که‌رته ئابوورییه‌کاندا دروست ده‌که‌ن، هاوکات چاره‌سه‌ری گونجاو بۆ گرفته‌کان و ده‌رکردنی راسپارده و ئامۆژگارییه‌کانیش ئاڕاسته‌ی لایه‌نه په‌یوه‌ندیداره‌کان کراون له‌بواره‌کانی (که‌رته‌کانی دارایی و بهنک، کشتوکاڵ، گه‌شتیاری، بازرگانی، پیشه‌سازی، ژێرخانی ئابووری، نیشته‌جێبوون و به‌ڵێنده‌رایه‌تی، گواستنه‌وه، ته‌که‌نۆلۆجیای زانیارییه‌کان و گه‌یاندن، خوێندن و ته‌ندروستی).
رێککه‌وتی 18/10/2012، لهمهراسیمێکدا به‌ئاماده‌بوونی به‌ڕێزان سینان چه‌له‌بی وه‌زیری بازرگانی و پیشه‌سازی هه‌رێمی كوردستان و دارا جه‌لیل خه‌یات سه‌رۆكی ژووری بازرگانی و پیشه‌سازی هه‌ولێر و شێخ سوڵتان بن ئه‌حمه‌د نوێنه‌ری میری ئیماره‌تی شاریقه و ئه‌حمه‌د محه‌مه‌د سه‌رۆكی ژووری بازرگانی و پیشه‌سازی شاریقه، رێککه‌وتننامه‌یه‌کی بازرگانی له‌نێوان هه‌ردوو ژووری بازرگانی و پیشه‌سازی هه‌ولێر و شاریقه‌دا واژۆکرا. له‌وه‌باره‌وه، به‌ڕێز دارا جه‌لیل خه‌یات سه‌رۆکی ژوور له‌لێدوانێكی رۆژنامه‌وانیدا ئاماژه‌ی پێدا و وتی:"رێککه‌وتننامه‌که بریتییه له‌فراوانکردنی ئه‌و یاداشتننامه‌یه‌ی که پێشتر له‌نێوان هه‌ردوولادا مۆرکراوه." راشیگه‌یاند و وتی:"به‌پێی رێککه‌وتننامه نوێیه‌‌که‌ش، دوو سه‌نته‌ری بازرگانی له‌هه‌ولێری پایته‌خت و میرنشینی شاریقه داده‌مه‌زرێن، که له‌رێیانه‌وه کارئاسانی بۆ بازرگانانی کوردستان و ئیمارات ده‌کرێت." جێی ئاماژه‌یه، مۆرکردنی ئه‌م رێککه‌وتننامه‌یه له‌پاش سه‌ردانیکردنی شاندێکی فراوانی بازرگانی میرنشینی شاریقه بۆ کوردستان دێت، که لهمیانهیدا ئه‌و شانده به‌شداری له‌پێشانگه‌ی نێوده‌وڵه‌تی هه‌ولێر کرد و دیدارێكی بازرگانیشی له‌گه‌ڵ ژووری بازرگانی و پیشه‌سازی هه‌ولێردا ئه‌نجامدا.
رێککه‌وتی 17/10/2012، به‌ئاماده‌بوونی به‌ڕێز دارا جه‌لیل خه‌یات سه‌رۆکی ژووری بازرگانی و پیشه‌سازی هه‌ولێر، کۆبوونه‌وه‌یه‌کی رووبه‌رووی بازرگانی له‌نێوان ژماره‌یه‌ک کۆمپانیای به‌ناوبانگی ئیماراتی و لۆکاڵی کوردستان له‌هۆڵی کۆبوونه‌‌وه‌کانی ژوور، به‌ڕێوه‌چوو. له‌سه‌ره‌تای کۆبوونه‌وه‌که‌دا، به‌ڕێز دارا جه‌لیل خه‌یات سه‌رۆکی ژوور وێرای به‌گه‌رمی به‌خێرهێنانی نوێنه‌رانی کۆمپانیا لۆکاڵی و ئیماراتییه‌کان، ئاماژه‌ی به‌گرنگی هاتنی ئه‌و شانده بازرگانی و میدیاییه‌ی میرنشینی شاریقه‌ی ئیماراتی یه‌کگرتووی عه‌ره‌بی دا بۆ کوردستان و به‌شداریکردنیان له‌هه‌شته‌مین پێشانگهی نێوده‌وڵه‌تی هه‌ولێر و وتی:"واژۆکردنی یاداشتی لێکگه‌یشتن له‌نێوان هه‌ردوو ژووری بازرگانی هه‌ولێر و شاریقه زۆر گرنگه، بۆیه هیوادارین کۆمپانیاکانی کوردستان و ئیمارات سوودمه‌ندبن له‌م ده‌رفه‌ته‌دا که هاتۆته پێش، بۆیه چاوپێکه‌وتن و کۆبوونه‌وه‌ی دوو قۆڵیتان سوودی بۆ کۆمپانیاکان و هه‌ردوو گه‌لی کوردستان و ئیمارات ده‌بێت." به‌کۆمپانیا ئیماراتییه‌کانیشی راگه‌یاند و وتی:"له‌کوردستاندا هه‌لی کارتان بۆ ره‌خساوه، بۆیه هه‌وڵ بده‌ن ئه‌و هه‌لانه بقۆزنه‌وه." پاشان ته‌وره‌کانی دیکه‌ی کۆبوونه‌وه‌که ده‌ستی پێکرد و نوێنه‌رانی کۆمپانیاکانی هه‌ردوو له‌گه‌ڵ هاوتاکانی خۆیان به شێوه‌ی گروپ دانیشتنیان و ئه‌نجامدا و بیرورا و سه‌رنجی خۆیان گۆڕییه‌وه. جێی ئاماژه‌یه، ئه‌و کۆمپانیا ئیماراتییانه‌ی که له‌کۆبوونه‌وه‌که‌دا به‌شدارییان کرد، له‌نێو شاندێكى 50 که‌سی باڵاى حکومی و بازرگانى میرنشینى شاریقه‌ی ئیماراتی له‌رێککه‌وتی 14/10/2012 گه‌یشتنه كوردستان و له له‌رێککه‌وتی 15/10/ به‌شداریان له‌هه‌شته‌مین پێشانگای نێوده‌وڵه‌تی هه‌ولێر کرد.
رێککه‌وتی 17/10/2012، به‌ڕێز دارا جه‌لیل خه‌یات سه‌رۆکی ژووری بازرگانی و پیشه‌سازی هه‌ولێر له‌باره‌گه‌ی ژوور، پێشوازی له به‌ڕێز چیری راک به‌رپرسی پاشکۆی بازرگانی له‌باڵیۆزخانه‌ی چیک و خاتوو ئۆلگا زولاکۆڤا به‌ڕێوه‌به‌ری په‌یوه‌ندییه‌کانی ژووری پیشه‌سازی چیک و شاندی یاوه‌ریانی کرد. له‌سه‌ره‌تای دیداره‌که‌دا، به‌ڕێز خه‌یات وێرای به‌خێرهێنانی شاندی میوان ئاماژه‌ی به‌به‌رده‌وامی په‌یوه‌ندییه‌کانی نێوان هه‌ردوولادا، که به تایبه‌تی له‌ماوه‌کانی دواییدا گه‌یشتۆته ئاستێکی پێشکه‌توو، ئه‌ویش به‌هۆی سه‌ردانیکردنی شانده‌کانی چیک بۆ کوردستان و به‌پێچه‌وانه‌شه‌وه. لای خۆیه‌وه، چیری راک وێرای دهربڕینی سوپاسگوزاری خۆی و شاندی یاوه‌ری لهبهرامبهر پێشوازیلێکردنیان له‌لایه‌ن ژووره‌وه، ئاماژه‌ی به‌کاروباره‌کانی هه‌ندێک لهکۆمپانیا چیکییه‌کان کرد، به‌تایبه‌تی ئه‌وانه‌ی که له عێراق و کوردستاندا کار ده‌که‌ن، هاوکات هیوای خواست که به‌به‌رده‌وامی هه‌ردوولا ئاگاداری یه‌کتر بن، که ئه‌مه‌ش ده‌بێته سوود گه‌یاندن به‌بازرگانانی هه‌ردوولا. له‌کۆتایی دیدارهکهشدا، به‌ڕێز خه‌یات ئاماده‌یی ژووری به‌مه‌به‌ستی یارمه‌تدانی هه‌ر شاندێكی چیکی که بێته کوردستان خسته روو.
رێککه‌وتی 17/10/2012، به‌ڕێز دارا جه‌لیل خه‌یات سه‌رۆکی ژووری بازرگانی و پیشه‌سازی هه‌ولێر له‌باره‌گه‌ی ژوور، پێشوازی له‌شاندێکی بازرگانی ئوردونی کرد، که له‌به‌ڕێزان سه‌بری ئه‌حمه‌د زه‌لاعین سه‌رۆکی ژووری بازرگانی که‌رک و محه‌مه‌د ئه‌بو تاڵیب به‌ڕێوه‌به‌ری ناوه‌ندی بازرگانی له‌کونسوڵخانه‌ی ئوردون له‌هه‌ولێر و ژماره‌یه‌ک له‌ئه‌ندامانی هه‌ردوو ژووری بازرگانی و پیشه‌سازی ئوردون و کۆمپانیاکانی ئه‌و وڵاته پێکهاتبوون. له‌سه‌ره‌تای دیداره‌که‌دا، که تیایدا به‌ڕێز سۆران ئه‌بوبه‌کر جێگری سه‌رۆکی ژوور و ژماره‌یه‌ک له‌ئه‌ندامانی ده‌سته‌ی کارگێڕی ژوور ئاماده‌یبوون، به‌ڕێز خه‌یات به‌گه‌رمی به‌خێرهێنانی شاندی میوان کرد و هیوای مانه‌وه‌یه‌کی باشی بۆ خواستن له‌کوردستاندا. پاشان به‌ڕێز خه‌یات باسی له‌ئاستی په‌یوه‌ندییه دوو قۆڵییه‌کانی نێوان هه‌رێمی کوردستان و ئوردون کرد و وتی:"به‌هه‌وڵی دڵسۆزانی هه‌ردوولا، ئێستا په‌یوه‌ندییه‌کانمان له‌قۆناغێکی باشدایه، که ده‌کرێت به‌رده‌وامی و گه‌شه‌یان پێ بده‌ین." هاوکات به‌ڕێز خه‌یات ئاماژه‌ی به‌پێشکه‌وتنه‌کانی هه‌رێمی کوردستان دا به‌تایبه‌تی له‌بواری ئابووریدا و وتی:"ره‌وشی کوردستان بۆته جێی سه‌رنجی کۆمپانیا بیانییه‌کان و رۆژ له دوای رۆژ ژماره‌یان له‌کوردستاندا روو له‌زیادبوون ده‌کات." لای خۆیه‌وه، به‌ڕێز سه‌بری زه‌لاعین سوپاسگوزاری خۆی لهبهرامبهر پێشوازیلێکردنیان ده‌ربڕی و ئاماژه‌ی به‌وه‌دا که ژماره‌یه‌کی زۆری کۆمپانیا ئوردنییه‌کان خوازیارن بێنه کوردستان و هه‌لی کاریان ده‌ست بکه‌وێت، شاندی یاوه‌ریانیش نموونه‌یه‌کن له‌و کۆمپانیایانه. له‌کۆتایی دیدارهکهشدا، خه‌یات ئاماده‌یی ژووری به‌مه‌به‌ستی یارمه‌تیدان و پێشوازیلێکردنی کۆمپانیا ئوردونییه‌کان ده‌ربڕی و دیاری رێزلێنانی به‌خشییه ئه‌ندامانی شاندی میوان.
رێککه‌وتی 16/10/2012، به‌ڕێز دارا جه‌لیل خه‌یات سه‌رۆکی ژووری بازرگانی و پیشه‌سازی هه‌ولێر له‌باره‌گه‌ی ژوور، پێشوازی له‌شاندێکی بازرگانی میرنشینی شاریقه‌ی ئیماراتی یه‌کگرتووی عه‌ره‌بی، به‌سه‌رۆکایه‌تی به‌ڕێز سوڵتان بن ئه‌حمه‌د ئه‌لقاسمی نوێنه‌رى میر و سه‌رۆكی سه‌نته‌ری راگه‌یاندنی شاریقه کرد. دیداره‌که‌ش، به‌ئامادبوونی به‌ڕێزان هه‌رسێ سه‌رۆکی ژووری بازرگانی و پیشه‌سازی سلێمانی و دهۆک و شاریقه و کونسوڵی ئیمارات له‌هه‌ولێر و ئیبراهیم سۆفی و سۆران ئه‌بوبه‌کر جێگرانی یه‌که‌م و دووه‌می سه‌رۆکی ژووری بازرگانی و پیشه‌سازی هه‌ولێر و، ژماره‌یه‌ک له‌ئه‌ندامانی ده‌سته‌ی کارگێڕی ژووره‌کانی بازرگانی و پیشه‌سازی هه‌ولێر و سلێمانی و دهۆک و ژووری بازرگانی شاریقه و راگه‌یه‌ندکاری میرنشینی ناوبراو به‌ڕێوه‌چوو. له‌سه‌ره‌تای دیداره‌که‌دا، به‌ڕێز خه‌یات به‌گه‌رمی به‌خێرهێنانی شاندی میوانی کرد و هیوای مانه‌وه‌یه‌کی باشی بۆ خواستن له کوردستاندا. پاشان به‌ڕێز خه‌یات تیشکی خسته ئاستی په‌یوه‌ندییه دوو قۆڵییه‌کانی نێوان هه‌رێمی کوردستان و ئیمارات و وتی:"هیوادارین نووسینگه‌یه‌کی بازرگانی ئیماراتی له‌کوردستاندا دابمه‌زرێت، چونکه ئه‌و نووسینگه‌یه به‌های تایبه‌تی خۆی ده‌بێت و، گه‌شه به‌چالاکییه ئابوورییه‌کانی نێوان هه‌ردوولا ده‌دات، له‌و رووشه‌وه ئێمه وه‌ک ژوور ئاماده‌ین هاوکار و هاریکار بین." هه‌روه‌ها به‌ڕێز خه‌یات وتی:"ئێستا کوردستان له‌قۆناغی گه‌شه‌ی خۆیدایه، هه‌رێمه‌که‌ی ئێمه خاوه‌ن زه‌وی به‌پیت و که‌شوهه‌وای له‌بار و بودجه‌ی باشه، بۆیه هه‌موو ئه‌مانه‌ش یارمه‌تده‌رن بۆ راکێشانی وه‌به‌رهێنه‌ری بیانی." وتیشی:"ده‌رفه‌تی کار له‌کوردستاندا زۆره، بۆیه داواکارین ئیماراتییه‌کان بێن و ئه‌و ده‌رفه‌تانه بۆ خۆیان بقۆزنه‌وه، چ له بواری بازرگانی یان پیشه‌سازی یاخود گه‌شتوگوزار، به‌گشتی ده‌توانین بڵێین عێراقی تازه پێویستی به‌ژماره‌یه‌کی زۆری کۆمپانیا و وه‌به‌رهێنه‌ری بیانی بۆ کارکردن هه‌یه، به تایبه‌تی له‌هه‌رێمی کوردستاندا." هاوکات، به‌ڕێز خه‌یات دووپاتیکرده‌وه و به‌شاندی میوانی راگه‌یاند که ژووری بازرگانی ده‌رگه‌ی به‌رووی وه‌به‌رهێنه‌ر و سه‌رمایه‌گوزارانی ئیماراتدا کراوه‌یه. لای خۆیه‌وه، به‌ڕێز سوڵتان بن ئه‌حمه‌د قاسم سوپاسگوزاری خۆی و ئه‌ندامانی شاندی یاوه‌ری ده‌ربڕی و ئاماژه‌ی پێدا که ئیماراتییه‌کان به‌گه‌شبینییه‌وه ده‌ڕواننه ژینگه‌ی وه‌به‌رهێنان له‌کوردستان که ده‌کرێت لهمیانهیدا هه‌لی وه‌به‌رهێنانی باش بۆ کۆمپانیا ئیماراتییه‌کان ده‌سته‌به‌ر بکرێت، بۆیه هیوادارین که له‌ئاینده‌دا چالاکی جۆراجۆری هاوبه‌ش له‌نێوان ئیمارات و هه‌رێمدا ئاڵوگۆڕ بکرێت، لێره‌شه‌وه داوا له کۆمپانیا ئیماراتییه‌کان ده‌که‌ین که ئاستی په‌یوه‌ندی هاوبه‌شی راسته‌قینه له‌گه‌ڵ هاوتا‌کانیان له‌کوردستاندا دروست بکه‌ن. پاشان ئه‌ندامانی شانده‌که جگه له‌ناساندنی خۆیان و پۆست و باسکردنی سروشتی کاره‌کانیان، باسی میرنشینی شاریقه‌یان له‌زۆر رووه‌وه کرد. له‌کۆتایی دیدارهکهشدا، دیاری رێزلێنان له‌نێوان هه‌ردوولادا گۆڕدرایه‌وه.
رێککه‌وتی 16/10/2012، له‌باره‌گه‌ی ژوور کۆبوونه‌وه‌یه‌کی فراوان له‌نێوان ژووری بازرگانی و پیشه‌سازی هه‌ولێر و شاندێکی بازرگانی پارێزگه‌ی (مه‌رکه‌ز)ی کۆماری ئیسلامی ئێران به‌ئاماده‌بوونی به‌ڕێزان دارا جه‌لیل خه‌یات سه‌رۆکی ژووری بازرگانی و پیشه‌سازی هه‌ولێر و پارێزگاری مه‌رکه‌ز و حسێنی عه‌زیمی کونسوڵی ئێران له‌هه‌ولێر به‌ڕێوه‌چوو. له‌دیداره‌که‌دا، به‌ڕێزان ئیبراهیم سۆفی و سۆران ئه‌بوبه‌کر جێگرانی یه‌که‌م و دووه‌می سه‌رۆکی ژوور و، سه‌رۆکی ژووری بازرگانی و پیشه‌سازی مه‌رکه‌ز و جه‌مشید زاده به‌رپرسی پاشکۆی ئابووری له‌کونسوڵخانه‌ی ناوبراو و چه‌ند به‌رپرسێکی باڵای حکومی مه‌رکه‌ز و ژماره‌یه‌ک له‌ئه‌ندامانی ده‌سته‌ی کارگێڕی هه‌ردوو ژووره‌کانی بازرگانی و پیشه‌سازی هه‌ولێر و مه‌رکه‌ز و نوێنه‌رانی نزیکه‌ی 15 لهکۆمپانیا به‌ناوبانگه‌کانی پارێزگه‌ی ناوبراو به‌شداربوون. له‌سه‌ره‌تای دیداره‌که‌دا، به‌ڕێز دارا جه‌لیل خه‌یات سه‌رۆکی ژوور به‌ناوی ئه‌ندامانی ده‌سته‌ی کارگێڕی ژوور به‌خێرهێنانی شاندی میوان کرد و وتی:"ئه‌م سه‌ردانه گرنگه چونکه یه‌که‌مجاره شاندێکی ئه‌و شاره سه‌ردانمان ده‌کات." هه‌روه‌ها به‌ڕێز خه‌یات جه‌ختی له‌سه‌ر په‌یوه‌ندییه مێژوویه‌کانی نێوان هه‌ردوو گه‌لی کوردستان و ئێران کرده‌وه و وتی:"جێی شانازییه بۆ ژووره‌که‌مان که توانیویه‌تی له‌ماوه‌ی ساڵانی رابردوودا ببێته هۆکارێک بۆ توندوتۆڵترکردنی په‌یوه‌ندییه دوو قۆڵییه‌کانی نێوان هه‌ولێر و شارهکانی ئێران له‌وانیش ورمێ، ته‌برێز، کرمانشان، ئه‌سفه‌هان و چه‌ند شارێکی دیکه، ئێستاش که شاندێکی پارێزگا‌ی مه‌رکه‌ز هاتوون، خۆشحاڵیان کردین و هیوادارین ئێمه‌ش به‌هه‌مان شێوه بتوانین له‌ئاینده‌دا سه‌ردانی ئه‌وان بکه‌ین". هه‌روه‌ها وتی:"هیوادارین ئێمه له‌خزمه‌تی هه‌موو خاوه‌نکارانی شارهکانی ئێراندا بین و ئه‌وه‌ش یه‌کێکه له‌ئامانجه‌کانمان." لای خۆیه‌وه، به‌ڕێز پارێزگاری مه‌رکه‌ز که له‌هه‌مان کاتدا سه‌رۆکایه‌تی شانده‌که‌ی ده‌کرد، وێڕای دهربڕینی خۆشحاڵی خۆیان به‌بۆنه‌ی هاتنیان بۆ هه‌رێمی کوردستان و پێشوازیلێکردنیان له‌لایه‌ن ژووری بازرگانییه‌وه، سوپاسگوزاری خۆی ئاڕاسته‌ی سه‌رۆک و ئه‌ندامانی ده‌سته‌ی کارگێڕی ژوور کرد لهبهرامبهر سازدانی ئه‌م دیداره‌دا و دووپاتیشی له‌سه‌ر خواستی خاوه‌نکارانیان بۆ به‌رده‌وامیدانی په‌یوه‌ندییه‌کان کرده‌وه و وتی:"ئێمه خۆشحاڵێن که له‌هه‌رێمی کوردستان ئابووری گه‌شه‌ی کردووه و، زه‌مینه خۆشه بۆ به‌رده‌وامیدان به‌به‌ره‌وپێشبردنی په‌یوه‌ندییه‌کان به‌تایبه‌تی په‌یوه‌ندییه ئابووری و کۆمه‌ڵایه‌تییه‌کان، بۆیه ئێمه هاتووین گوێ له‌داخوازی و پێدوایستییه‌کانی ئێوه بگرین، هه‌روه‌ها کۆماری ئیسلامی ئێران لای مه‌به‌سته که‌هاوکاری خه‌ڵکی کوردستان بێت و ئاینده‌یه‌کی باشیش چاوه‌ڕوانی هه‌رێم و عێراقیش بکات، ئێمه‌ش ئاماده‌ین و ده‌مانه‌وێت که به‌شێک له‌گرفته‌کانی ئێوه نه‌هێڵین." له‌به‌شێکی دیکه‌ی دیداره‌که‌دا، له‌رێی داتاشۆوه شاندی میوان پوخته‌یه‌کی ژیان و کار به‌ده‌نگوره‌نگ له‌باره‌ی نه‌خشه‌ی جوگرافی، وێنه‌ی که‌سایه‌تییه به‌ناوبانگه‌کان، رێژه‌ی دانیشتوان، باڵه‌خانه و خانوو، سه‌رچاوه‌کانی ئاو، شوێنه گه‌شتیاریه‌کان، شوێنه ئاینییه‌کان، مۆزه‌خانه، کارگه و کۆمپانیاکانی پارێزگه‌ی (مه‌رکه‌ز)یان که‌سه‌نته‌ره‌که‌ی شاری (ئاراک)ه پیشانی ئاماده‌بووان دا. دواتر، ئه‌ندامانی شاندی میوان وێڕای ناساندنی خۆیان و پێگه‌ی کارکردنیان و سروشتی کاری ده‌زگه و کۆمپانیاکانیان، کۆمه‌ڵێک پرسیاریان ئاڕاسته‌ی ده‌سته‌ی کارگێڕی ژوور کرد، که سه‌رجه‌میان له‌لایه‌ن به‌ڕێزان ئیبراهیم سۆفی و سۆران ئه‌بوبه‌کر جێگرانی یه‌که‌م و دووه‌می سه‌رۆکی ژوور بهوردی وه‌ڵامی پێویستیان درایه‌وه. جێی ئاماژه‌یه، ئه‌و کۆمپانیا ئێر‌انییانه‌ی که له‌رێی نوێنه‌ره‌کانیانه‌وه سه‌ردانی باره‌گه‌ی ژووریان کرد، له‌بواره‌کانی بهنک، کشتوکاڵ و ئاژڵدرای، به‌خێوکردنی په‌له‌وه‌ڕ، ده‌ر‌هێنانی کانزاکان، بیرلێدانی ئاو، به‌رهه‌هێنانی شوشه، به‌رهه‌هێنانی سۆدیۆم و چه‌ند بوارێکی دیکه‌دا کار ده‌که‌ن. له‌کۆتایی دیدارهکهشدا، دیاری رێزلێنان له‌نێوان هه‌ردوولادا گۆڕدرایه‌وه.
رێککه‌وتی15/10/2012، به‌ئاماده‌بوونی به‌ڕێزان نوێنه‌ری سه‌رۆکی هه‌رێمی کوردستان و چه‌ندین به‌رپرسی حکومی و شاندێکی ژووری بازرگانی و پیشه‌سازی هه‌ولێر و نوێنه‌ری ده‌زگه په‌یوه‌نداره‌کان له‌هه‌رێم و به‌به‌شداری 850 كۆمپانیا له 23 وڵات، هه‌شته‌مین پێشانگهی نێوده‌وڵه‌تی هه‌ولێر بۆ بازرگانی له‌پارکی شه‌هید سامی عه‌بدولره‌حمان کرایه‌وه و ماوه‌ی چوار رۆژ به‌رده‌وام ده‌بێت. له‌مه‌راسیمی کردنه‌وه‌ی پێشانگه‌که‌دا، به‌ڕێزان فوئاد حسێن نوێنه‌ری سه‌رۆکی هه‌رێمی کوردستان و سینان چه‌له‌پی وه‌زیری بازرگانی و پیشه‌سازی و فه‌لاح مسته‌فا به‌رپرسی په‌یوه‌ندییه‌كانی ده‌ره‌وه له‌حکومه‌تی هه‌رێمی کوردستان و دارا جه‌لیل خه‌یات سه‌رۆکی ژووری بازرگانی و پیشه‌سازی هه‌ولێر و شێخ سوڵتان بن ئه‌حمه‌د ئه‌لقاسمی سه‌رۆكی سه‌نته‌ری راگه‌یاندنی میرنشینی شاریقه‌ی ئیماڕاتی و شاندێک له‌ده‌سته‌ی کارگێڕی ژوور و، نوێنه‌ری ژماره‌یه‌ک ده‌زگه‌ی په‌یوه‌ندار له‌هه‌رێمی کوردستان، ئاماده‌‌بوون. پێشا‌نگه‌که که له‌لایه‌ن کۆمپانیای (IFP ) رێکخراوه، تێدا 850 كۆمپانیا له 23 وڵاتی جیهانه‌وه به‌شدارن و بواره‌کانی په‌ر‌ورده و خوێندنی باڵا و ته‌ندروستی و چه‌ند بوارێكی دیکه له‌خۆده‌گرێت و، بۆ ماوه‌ی چوار رۆژیش به‌رده‌وام ده‌بێت. جێی ئاماژه‌یه، ئه‌و وڵاتانه‌ی که له پێشانگه‌که‌ی ئه‌مساڵدا به‌شدارن بریتین له‌عێراق، توركیا، سوریا، ئێران، به‌ریتانیا، ئه‌ڵمانیا، چین، نه‌مسا، چیك، ئیماڕات، ئو‌رد‌ن، میسر، كوێت و چه‌ند وڵاتێكی دیکه‌ی جیهان.
رێککه‌وتی 14/10/2012، دوای گه‌یشتنی سه‌رنشینانی یه‌که‌م گه‌شتی ئاسمانیان بۆ هه‌رێمی کوردستان و، به‌ئاماده‌بوونی به‌رپرسانی حکومی و شاندێکی ژووری بازرگانی و پیشه‌سازی هه‌ولێر و نوێنه‌رانی ژماره‌یه‌ک ده‌زگه‌ی په‌یوه‌ندار له‌هه‌رێم، له‌ڕێوڕه‌سمێكدا هێلى فڕۆكه‌وانى ئه‌لعه‌ره‌بیه‌ی ئیماراتی کردنه‌وه‌ی هێڵی هه‌ولێر- شاریقه‌یان راگه‌یاند. له‌م گه‌شته‌ی یه‌که‌مینی هێلى فڕۆكه‌وانى ئه‌لعه‌ره‌بیه‌دا، شاندێكى 50 که‌سی باڵاى حکومی و بازرگانى میرنشینى شاریقه‌ی ئیماراتی به‌سه‌رۆكایه‌تى سوڵتان بن ئه‌حمه‌د ئه‌لقاسمی نوێنه‌رى میر و سه‌رۆكی سه‌نته‌ری راگه‌یاندنی شاریقه و ئه‌ندامێتی و نوێنه‌ری ژماره‌یه‌ك له‌كۆمپانیا و فه‌رمانگه‌كانی شاریقه گه‌یشته هه‌رێمى كوردستان و، له‌لایه‌ن به‌ڕێزان سینان چه‌له‌پی وه‌زیرى بازرگانى و پیشه‌سازى هه‌رێم و دارا جه‌لیل خه‌یات سه‌رۆکی ژووری بازرگانی و پیشه‌سازی هه‌ولێر و فه‌لاح مسته‌فا به‌رپرسى فه‌رمانگه‌ى په‌یوه‌ندییه‌كانى ده‌ره‌وه‌ى حكومه‌تى هه‌رێمى كوردستان و شاندێک له‌ده‌سته‌ی کارگێڕی ژوور و ژماره‌یه‌کی دیکه‌ی به‌رپرسی حکومی و ده‌زگه په‌یوه‌نداره‌کانی هه‌رێم، پێشوازییان لێکرا. مه‌به‌ست له‌هاتنی شانده‌که‌ی میرنشینی شاریقه‌ش له‌م ساته‌وه‌خته‌دا، به‌شداریکردنه له‌هه‌شته‌مین پێشانگای نێوده‌وڵه‌تی هه‌ولێر که بڕیاره له‌رێککه‌وتی 15/10/2012 بکرێته‌وه، هه‌روه‌ها بڕیاریشه چه‌ندین كۆبوونه‌وه له‌گه‌ڵ به‌رپرسانی حکومی و ده‌زگه په‌یوه‌نداره‌کانی هه‌رێم ساز بکات.
رێککه‌وتی 14/10/2012، به‌ڕێز دارا جه‌لیل خه‌یات سه‌رۆکی ژووری بازرگانی و پیشه‌سازی هه‌ولێر له‌باره‌گه‌ی ژوور، پێشوازی له‌شاندێکی بازرگانی ئه‌مه‌ریکی کرد که له‌نوێنه‌ری ژماره‌یه‌ک کۆمپانیای ئه‌و وڵاته پێکهاتبوون. له‌سه‌ره‌تای دیداره‌که‌دا، به‌ڕێز دارا جه‌لیل خه‌یات سه‌رۆکی ژوور به‌خێرهێنانی شاندی میوان کرد و هیوای مانه‌وه‌یه‌کی باشی بۆ خواستن له‌پایته‌ختدا و، وتی:"ئێمه هه‌میشه هانی کۆمپانیا ئه‌مه‌ریکییه‌کانمان داوه که بێنه کوردستان و کاری بازرگانی و وه‌به‌رهێنان ئه‌نجام بده‌ن، چونکه ئێستا کوردستان بۆته ناوچه‌یه‌کی چالاکی بازرگانی بۆ کۆمپانیا لۆکاڵی و بیانییه‌کانیش، ئه‌مه‌ش بۆ کۆمه‌ڵێک هۆکار ده‌گه‌ڕێته‌وه، له‌وانیش بوونی یاسایه‌کی پێشکه‌وتووی وه‌به‌رهێنان له‌کوردستان که جیاوازتره له هه‌ر یاسایه‌کی دیکه‌ی هاوتای خۆی له‌ئاستی رۆژهه‌ڵاتی ناوڕاستدا، جگه له‌مه‌ش سه‌رکردایه‌تییه‌کی سیاسی به‌هێز له کوردستاندا که هه‌ردوو بواری ئابووری و ئاسایشی به‌لاوه گرنگه و کار له‌سه‌ر پڕۆسه‌ی ئاوه‌دانی ده‌کات، هه‌روه‌ها به‌شه بودجه‌ی هه‌رێم له‌بودجه‌ی گشتی عێراق که ئاینده‌یه‌کی گه‌شی بۆ هه‌رێمه‌که مسۆگه‌ر کردووه." لای خۆیه‌وه، خاتوو هیسک ئه‌لخوری ناسراو به(ڤیان خان) سه‌رۆکی کۆمپانیای گڵۆباڵ هۆپی ئه‌مه‌ریکی که هاوکات سه‌رۆکایه‌تی شانده‌که‌ی ده‌کرد، وێڕای دهربڕینی سوپاسگوزاری خۆی و ئه‌ندامانی شاندی یاوه‌ریان لهبهرامبهر پێشوازیلێکردنیان له‌لایه‌ن ژووره‌وه، وتی:"ئه‌ندامانی ئه‌م شانده نوێنه‌ری کۆمه‌ڵێک کۆمپانیای به‌ناوبانگی ئه‌مه‌ریکین له‌هه‌ردوو ویلایه‌تی (ته‌کساس و جۆرجیا)وه هاتوون، که پسپۆر و شاره‌زان له‌بواره‌کانی خۆیاندا، هاوکات تیشکی خسته سه‌ر کاری کۆمپانیاکه‌ی خۆیان که ئێستا سه‌رقاڵه وده‌ستی به‌کارکردن کردووه." پاشان ئه‌ندامانی شاندی میوان وێڕای ناساندنی خۆیان و کۆمپانیاکانیان و سروشتی کاری کۆمپانیاکانیان، ئاماژه‌یان به‌وه‌دا که ته‌واو شاره‌زان له‌مامه‌ڵه‌ی بازرگانیکردن له‌گه‌ڵ ناوچه‌ی رۆژهه‌ڵاتی ناوه‌ڕاستدا و کوردستانیش به‌لای ئه‌وانه‌وه زۆر گرنگه ئه‌ویش به‌مه‌به‌ستی به‌شداریکردنیان له‌هه‌ر پڕۆسه‌یه‌کی ئاوه‌دانکردنه‌وه‌دا، بۆیه خوازیارن که‌له‌کوردستاندا ده‌رفه‌تی کاریان هه‌بێت، تاکو خزمه‌ت به‌خه‌ڵکی کوردستان بکه‌ن. جێی ئاماژه‌یه، ئه‌و کۆمپانیا ئه‌مه‌ریکییانه‌ی که‌ئه‌ندامانی شانده‌که نوێنه‌رایه‌تیان ده‌کردن، له‌بواری پێگه‌‌یاندنی سه‌رکرده بۆ بواره‌کانی ناو کۆمه‌ڵگه به‌تایبه‌تی ئافره‌تان، چێشتخانه و خواردنگه‌ی جیهانی، کارگێڕی کار، بازرگانی ئافره‌تان، گه‌شتوگوزار، بیناسازی‌دا کار ده‌که‌ن. له‌کۆتایی دیدارهکهشدا، به‌ڕێز خه‌یات جه‌ختی له‌سه‌ر ئاماده‌باشی ژوور کرده‌وه بۆ مه‌به‌ستی هاریکاریکردنی شاندی میوان و راشیگه‌یاند که هاتنی شاندی بازرگانی له‌ئه‌مه‌ریکاوه بۆ کوردستان جێی بایه‌خی ژووری بازرگانییه له‌هه‌رێمدا.
1$=1488
به‌های گۆرینه‌وه‌ی دیناری عیراقی به دولاری ئه‌مری...
